რა ელის ჭაჭის კოშკს, რომლის ასაშენებლად 800 ათასზე მეტი ლარი დაიხარჯა

ბათუმში, გოგებაშვილის ქუჩაზე მდებარე ჭაჭის კოშკი ისევ უფუნქციოდაა. ბათუმის მერიაში დღეს ვერ გვიპასუხეს კითხვაზე, რა გეგმები აქვს მერიას – მუშავდება თუ არა რაიმე იდეა ამ კოშკთან დაკავშირებით ან განახლდება თუ არა უფასო ჭაჭის მიწოდება პერიოდულად. პრესსამსახურში საკითხის გარკვევას დაგვპირდნენ, თუმცა დღის განმავლობაში ამ თემაზე პასუხი ვერ მივიღეთ.

ჭაჭის კოშკი ამჟამად ბათუმში იმ ობიექტთა ჩამონათვალშია, რომელთა ფუნქციაც გაურკვეველია.

25 მეტრი სიმაღლის ჭაჭის კოშკი ბათუმში 2012 წლის 17 ნოემბერს გაიხსნა. მისი მშენებლობა ბათუმის მერიის ბიუჯეტიდან 810 055 ლარით დაფინანსდა. თავდაპირველი კონცეფციით, ჭაჭის კოშკის სენსორული აპარატიდან კვირაში ერთხელ ჭაჭა უნდა წამოსულიყო და ტურისტები მიეზიდა, თუმცა ამ ადგილმა გახსნიდან მალევე ტურისტებზე მეტად უფასო ჭაჭის მოყვარული ადგილობრივები მიიზიდა, რომლებიც ბოთლებით ელოდნენ, როდის წამოვიდოდა ჭაჭა სენსორული ონკანიდან.

გასულ წელს კოშკზე საათიც გაფუჭდა, რომლის შესაკეთებლად ბათუმის მერიამ 19 ათასი ლარი გამოყო. 

ამ ადგილთან დაკავშირებით 2016 წელს გეგმები ჰქონდა აჭარის მთავრობას. კერძოდ, ტერიტორიაზე ბუტიკების, სასტუმროების, გალერეებისა და საზოგადოებრივი დანიშნულების ობიექტების მშენებლობას გეგმავდა საინვესტიციო ინტერესების გასაზრდელად. საკითხი ბათუმის საკრებულოს უნდა განეხილა, რადგან ამ ტერიტორიის ნაწილი მუნიციპალიტეტის ქონებაა.

მაშინ საკითხს კრიტიკულად მიუდგა საზოგადოება და მათ შორის პარტია „თავისუფალი დემოკრატები“, რომლებიც მიიჩნევდნენ, რომ შესაძლოა ბათუმს კიდევ ერთი რეკრეაციული ზონა დაეკარგა და ქალაქის იმდროინდელ მერს, გიორგი ერმაკოვს, ამ საკითხის უკან გაწვევა სთხოვეს. საბოლოოდ, ბათუმის საკრებულოს „ჭაჭის კოშკის“ ტერიტორიასთან დაკავშირებული საკითხი არ განუხილავს.

წაიკითხეთ ამავე თემაზე: 

მოუვლელი „ჭაჭის თაუერი“ ბათუმში [ფოტო]

 

 

 

 

ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com