ლაშა კომახიძე ახალი მეჩეთის მშენებლობაზე: შესაძლოა, პროცესი სასამართლოს გარეშე დასრულდეს

ბათუმის მერს, ლაშა კომახიძეს, მოლოდინი აქვს, რომ ბათუმში ახალი მეჩეთის მშენებლობის საკითხი სასამართლოს გარეშე გადაწყდება. მეჩეთის მშენებლობის საკითხის განხილვა ბათუმის საქალაქო სასამართლომ დღეს იმ მოტივით გადადო, რომ ბათუმის მერმა მუსლიმ თემთან მოლაპარაკების გამართვის სურვილი გამოხატა.

„სასამართლო პროცესი არის მოცემულობა, რომელიც ჩვენ დაგვხვდა. მთავრობის თავმჯდომარეს არაერთხელ განუცხადებია და მეც მითქვამს, რომ შეიძლება ეს პროცესი დასრულდეს ყოველგვარი სასამართლოს გარეშე. ჩვენ მზად ვართ და დაწყებული გვაქვს დიალოგი. ამაზე წინასაარჩევნოდ რამდენჯერმე განმიცხადებია, რომ გვაქვს ინტენსიური კავშირი მუსლიმ მრევლთან. ოფიციალურად ახალ მერთან და ახალ თვითმმართველობასთან საუბარი ამ თემაზე არ ყოფილა და ეს ინსტრუმენტი უნდა გამოვიყენოთ. მე დარწმუნებული ვარ, რომ ეს ინსტრუმენტი მოგვიტანს კონკრეტულ შედეგებს და ყველა მხარე იქნება კმაყოფილი,“ – აღნიშნა ლაშა კომახიძემ.

ბათუმის მერიის წინააღმდეგ სასამართლოში სარჩელი ააიპ „ბათუმში ახალი მეჩეთის მშენებლობის ფონდმა“ შეიტანა.

ბათუმის მერიამ 2017 წლის 5 მაისს მუსლიმ თემს უარი უთხრა ქალაქში ახალი მეჩეთის მშენებლობის ნებართვის გაცემაზე.

სასამართლოს მუსლიმმა თემმა გასული წლის 10 ივნისს მიმართა.

ნეტგაზეთის მასალების სხვა გამოცემებში გადაბეჭდვის წესი


ავტორი