სასჯელაღსრულების სამინისტრო: მერაბ ღოღობერიძეზე ჯერ რისკი არ შეფასებულა

სასჯელაღსრულებისა და პრობაციის სამინისტრო მერაბ ღოღობერიძის მიერ ბათუმის საქალაქო სასამართლოში დღეს გაკეთებულ განცხადებას გამოეხმაურა. მერაბ ღოღობერიძის თქმით, სასამართლოს გადაწყვეტილების მიუხედავად, მას დახურული ტიპის დაწესებულებაში ტოვებენ.

სასჯელაღსრულების სამინისტროს პრესსამსახურის განმარტებით, მერაბ ღოღობერიძის, როგორც მსჯავრდებულის რისკი ამ დროისთვის არ შეუფასებია მულტიდისციპლინარულ ჯგუფს, რომელმაც უნდა გადაწყვიტოს, რომელი ტიპის დაწესებულებაში უნდა მოთავსდეს პატიმარი.

სამინისტროს პრესსამსახურის ინფორმაციით, მულტიდისციპლინარულ ჯგუფს ჯერ კიდევ აქვს ვადა ამ საკითხის განხილვისთვის.

სასჯელაღსრულების სამინისტრო ასევე აზუსტებს, რომ მერაბ ღოღობერიძის ღია ტიპის დაწესებულებაში მოთავსებაზე სასამართლოს გადაწყვეტილება არ მიუღია და დაწესებულების ტიპის განსაზღვრა სასამართლოს პრეროგატივა არ არის.

მერაბ ღოღობერიძე “ბათუმის აქციის საქმეზე” იხდის სასჯელს.

ნეტგაზეთის მასალების სხვა გამოცემებში გადაბეჭდვის წესი


ავტორი