„სასამართლოს გადაწყვეტილების მიუხედავად, მე ისევ დახურული ტიპის დაწესებულებაში ვარ, კონკრეტულად კი, მეორე დაწესებულებაში. მოსამართლე დავით მამისეიშვილმა ჩაწერა გადაწყვეტილებაში, რომ უნდა ვიყო ღია ტიპის ციხეში. ჩემ მიმართ ხდება არაადამიანური მოპყრობა პოლიტიკური ნიშნით,“ -განაცხადა დღეს სასამართლო პროცესზე მერაბ ღოღობერიძემ.
მის წინააღმდეგ ამჯერად ბათუმის ბულვარის ადმინისტრაცია დავობს სამოქალაქო წესით. დავის საგანი სარფში იჯარით გაცემული პლაჟის ნაკვეთია, რითაც მერაბ ღოღობერიძე სარგებლობდა დაპატიმრებამდე.
სამოქალაქო დავას მოსამართლე ინდირა მაშანეიშვილი განიხილავს. მას სთხოვა ამ საკითხით დაინტერესება მერაბ ღოღობერიძემ. მოსამართლეს პატიმრის დახურული ტიპის დაწესებულებაში ყოფნაზე კომენტარი არ გაუკეთებია. მან ღოღობერიძეს სთხოვა, სამოქალაქო სარჩელზე ესაუბრა.
მერაბ ღოღობერიძე ირაკლი ჩხვირკიასთან ერთად გაასამართლეს “ბათუმის აქციის საქმეზე”. მათ მოსამართლე დავით მამისეიშვილმა თავისუფლების აღკვეთა წელიწადნახევრით შეუფარდა.
რატომ რჩება მერაბ ღოღობერიძე დახურული ტიპის დაწესებულებაში – სასჯელაღსრულების სამინისტროს ამ დრომდე არ განუმარტავს.
მთავარ ფოტოზე: მერაბ ღოღობერიძისა და ირაკლი ჩხვირკიას სასამართლო პროცესი “ბათუმის აქციის საქმეზე”/ ფოტო “ბათუმელების” არქივიდან
