ქობულეთის საკრებულოს თავმჯდომარე: ხალხს აღარ აინტერესებს, „ნაცმოძრაობის“ წევრი რომ ვიყავი

„ჩვენ არ გვჭირდება საკრებულოს თავმჯდომარე, რომელიც ამბობს, რომ დანაშაულს სჩადიოდა და მსხვერპლი იყო,“ – აცხადებს ქობულეთის საკრებულოში ფრაქცია „ნაციონალური მოძრაობის“ ხელმძღვანელი, ბონდო თედორაძე. ფრაქციამ დღეს, 29 დეკემბერს, ბრიფინგი გამართა და საკრებულოს თავმჯდომარის, დავით მჭედლიშვილის თანამდებობიდან გადადგომა მოითხოვა.

ბონდო თედორაძის თქმით, მან საკრებულოს თავმჯდომარეს გუშინდელ სხდომაზე „მადლიერების საღამოს“ შესახებ ჰკითხა. დავით მჭედლიშვილის ქობულეთის პროფესიული კოლეჯის დირექტორი იყო 22 წლის განმავლობაში. 26 დეკემბერს მის პატივსაცემად გამართული საღამოსთვის ქობულეთის მერიის დაქვემდებარებაში არსებულმა კულტურის სახლმა დარბაზი უფასოდ დათმო, საბიუჯეტო ვოკალურმა ანსამბლმა კი, საკრებულოს თავმჯდომარეს უფასოდ უმღერა.

„დავით მჭედლიშვილს საკრებულოს სხდომაზე ვკითხე „ბათუმელებში“ გამოქვეყნებული სტატიის შესახებ, გრძნობდა თუ არა თავს უხერხულად. მან „ნაცმოძრაობის“ ლანძღვა-გინება დაიწყო. თქვა, რომ პირსისხლიანები ვართ… მას შევახსენეთ, რომ ის ქობულეთის საკრებულოს წევრი იყო „ნაციონალური მოძრაობიდან“. ამ რეპლიკაზე გვიპასუხა, რომ მსხვერპლი ვიყავიო. ასევე ვუთხარი, რომ ერთ-ერთ არჩევნებზე „ნაციონალური მოძრაობის“ საარჩევნო შტაბის ხელმძღვანელი იყო ქობულეთში და მეც მასთან ერთად ვმუშაობდი. რეჟიმი იყო და რა მექნაო… მიგვაჩნია, რომ მას მორალური უფლება არ აქვს, ეკავოს ეს თანამდებობა,“ – ამბობს ბონდო თედორაძე.

„დანაშაულს ხედავთ თქვენ იმაში, რომ „ნაციონალური მოძრაობის“ საარჩევნო სიით ვიყავი ქობულეთის საკრებულოში?“ – შეკითხვითვე უპასუხა ჩვენს კითხვას ქობულეთის საკრებულოს თავმჯდომარემ. მასთან დაზუსტება გვინდოდა, წარმოადგენდა თუ არა ადრე საკრებულოში„ნაციონალურ მოძრაობას“ ამჟამად მოქმედი საკრებულოს თავმჯდომარე.

დავით მჭედლიშვილის განმარტებით, ის „ნაციონალური მოძრაობის“ საარჩევნო სიაში იყო 2010 წლის ადგილობრივი თვითმმართველობის არჩევნებზე. თუმცა საკრებულოს წევრობა დაახლოებით ერთი თვით მოუწია – 2014 წელს. „მაშინ ერთი დეპუტატი გარდაიცვალა და სიაში შემდეგი მე ვიყავი. ერთ თვეში რა უნდა მომესწრო? ცილისწამებაა ეს,“ – ამბობს ის.

ქობულეთის საკრებულოს თავმჯდომარე მიიჩნევს, რომ მედია არ უნდა ინტერესებოდეს ვინ რომელ პარტიას წარმოადგენდა. „ეს ხალხს აღარ აინტერესებს, რეკომენდაციას მოგცემთ, რომ ასეა,“ – გვარწმუნებს დავით მჭედლიშვილი. მიაჩნია, რომ პარტიულ ცვლილებას არ აქვს მნიშვნელობა, თუკი ადამიანს საზოგადოებისთვის სიკეთის მოტანა სურს.

„მე ყოველთვის მინდოდა და ახლაც მინდა, რომ უკეთესი იყოს ჩემი რეგიონი, ჩემი ქალაქი… მასე ზვიად გამსახურდიას დროსაც აქტიური ვიყავი. არანაირ უხერხულობას არ ვგრძნობ ამის გამო,“ – აღნიშნა ქობულეთის საკრებულოს თავმჯდომარემ.

დავით მჭედლიშვილი უხერხულობას არც იმის გამო გრძნობს, რომ საბიუჯეტო ორგანიზაციამ დარბაზი უფასოდ დაუთმო „მადლიერების საღამოსთვის“, ასევე საბიუჯეტო ვოკალურმა ანსამბლმა უფასოდ უმღერა:

„კულტურის სახლს და კოლეჯს შორის არსებობს მემორანდუმი. იქ დაკონკრეტებული არაა, რა საღამოს შეიძლება დაეთმოს დარბაზი. გამართულა მასწავლებლების საღამო. მეც მასწავლებელი ვარ და მადლიერება გამოხატეს. მადლიერებისა და დაფასების სურვილი არ უნდა წავართვათ არავის. მე საერთოდ არ ჩავრეულვარ ამაში და ორი თვე ვბლოკავდი ამ იდეას, თუ დამიჯერებთ. ამ განცხადებებით შეურაცხყოფა მიაყენეს კოლეჯის კოლექტივს, რომ თითქოს ადმინისტრაციული რესურსი გამოიყენა ვინმე… ეს ადმინისტრაციული რესურსის გამოყენება არ ყოფილა.“

 

ნეტგაზეთის მასალების სხვა გამოცემებში გადაბეჭდვის წესი
ავტორი