ქედაში, მერისი-ოქტომბრის მიმართულებით, საავტომობილო გზის გაფართოება მიმდინარეობს. დაბის ტერიტორიაზე გზის გაფართოებასთან დაკავშირებულ სამუშაოებს ქედის გამგეობა ახორციელებს, რისთვისაც გზის მიმდებარედ მწვანე ნარგავები მოჭრეს.
ქედის გამგეობის ინფორმაციით, სულ შვიდი ნაძვის ხეა მოჭრილი. „აღნიშნული მონაკვეთის გაფართოების საჭიროება იყო, რადგანაც ამ ზამთარმა აჩვენა, რომ გზის ამ მონაკვეთზე შეიძლება ფატალურად დასრულებულიყო ავტოსაგზაო შემთხვევა. სულ შვიდი ხე მოვჭარით ნებართვით, ეს სახეობა წითელ ნუსხაში არ არის შეტანილი,“ – ამბობს დავით დუმბაძე, ქედის გამგებელი.
ტერიტორია, სადაც ნაძვები მოჭრეს, გამგეობის ბალანსზეა. ხეების მოჭრის ნებართვა კი გამგეობაში არსებულმა კომისიამ გასცა.
დაბა ქედაში, აღმაშენებლის ქუჩაზე, გზის გაფართოებას და საყრდენი კედლის მოწყობას ტენდერში გამარჯვებული შპს „ზადუ“ ახორციელებს. ქედის გამგეობას ხელშეკრულება კომპანიასთან 180 273 ლარზე აქვს გაფორმებული. სამუშაოები სექტემბრის შუა რიცხვებამდე უნდა დასრულდეს.
საავტომობილო გზის გაფართოება ქედაში / ეკა ბარამიძის ფოტო
