ნეტგაზეთი • RU

მალე ბათუმში ტერფის პრობლემების მქონე პაციენტებს საშუალება ექნებათ, მიიღონ პოდიატრიული მომსახურება

 

არასამთავრობო ორგანიზაცია  “ველფეარ ფაუნდეიშენი”, დიაბეტის მსოფლიო ფონდის (WDF) მხარდაჭერით, ახორციელებს პროექტს „დიაბეტური ტერფის მკურნალობის გაუმჯობესება“, რომლის მიზანია საქართველოში დიაბეტური ტერფის პრევენცია, მისი მოვლისა და მკურნალობის გაუმჯობესება და ახალი სერვისის _ პოდიატრიული სამსახურის დანერგვა საქართველოს 6 რეგიონის 11 სამედიცინო დაწესებულებაში. მათ რიცხვში შედის ქალაქ ბათუმის 2 დაწესებულება: საზღვაო ჰოსპიტალი (მის: მელიქიშვილის ქ. 102) და ბათუმის ენდოკრინოლოგიის ცენტრი (მის: პუშკინის ქ. 118).

 

დიაბეტური ტერფის სინდრომი (დტს) დიაბეტის უხშირესი გართულებაა, რომელიც საფრთხეს უქმნის პაციენტის ჯანმრთელობას და აუარესებს მისი სიცოცხლის ხარისხს. ხშირად არასწორად ან დაგვიანებით დიაგნოსტირებული/ნამკურნალევი დტს-ის გამოსავალი კიდურის ამპუტაციაა და შეიძლება დადგეს პაციენტის სიკვდილიც. ამიტომ, მნიშვნელოვანია ტერფის კვალიფიციური მოვლა, როგორც დტს-ს პირველადი, ასევე მეორეული პროფილაქტიკის მიზნით: ტერფის შემოწმება, დაზიანებების (ჭრილობები, ნევროლოგიური, სისხლძარღვოვანი) აღმოჩენა, სათანადო მოვლა და ა.შ.


ამჟამად საქართველოში არ არსებობს ტერფის მოვლის კვალიფიციური სამსახური. მართალია, რამდენიმე სამედიცინო დაწესებულება სთავაზობს პაციენტებს მსგავს სერვისს, რომელიც სხვადასხვა ექიმი-სპეციალისტის ერთობლივ მუშაობას გულისხმობს, მაგრამ ეს მიდგომა საკმაოდ არახარჯთეფექტურია, ვინაიდან მოითხოვს მნიშვნელოვან მატერიალურ ტექნიკურ, ადამიანურ თუ დროით რესურსებს. პროექტის ფარგლებში კი შეიქმნება კვალიფიციური, მაღალი ხარისხის პოდიატრული სამსახურები, რომლებიც მოემსახურებიან ტერფის პრობლემებით შეწუხებულ ყველა პაციენტს. აღსანიშნავია, რომ პროექტი საშუალებას აძლევს სოციალურად დაუცველ პირებს, ისარგებლონ უფასო პოდიატრიული მომსახურებით.


სწორედ ამ მიზნით 19-25 ოქტომბერს ქ. თბილისში მომზადდნენ ექთან-პოდიატრისტები. სწავლებას უძღვებოდნენ უცხოელი ტრენერები, რომლებმაც ცოდნა დიდ ბრიტანეთში მიიღეს და აქვთ პოდიატრიაში პრაქტიკული მუშაობის რამდენიმეწლიანი პრაქტიკა. სწავლება წარიმართა ქ. თბილისში, დიაბეტის კვლევის ეროვნულ ცენტრში, სადაც მონაწილეებს ყველა საშუალება ჰქონდათ სრულყოფილად მიეღოთ თეორიული თუ პრაქტიკული ცოდნა. პროექტის ფარგლებში შერჩეული სამედიცინო დაწესებულებების აღჭურვა პოდიატრიული სამსახურისთვის საჭირო ყველა ინვენტარით დასრულდება ნოემბრის შუა რიცხვებში, რის შემდეგაც პაციენტებს შეეძლებათ ისარგებლონ პოდიატრიული სერვისებით.


პროექტის ან პოდიატრიული სერვისების შესახებ დამატებითი ინფორმაციის მისაღებად მოგვმართეთ:  „ველფეარ ფაუნდეიშენი“;

ელფოსტა: wf@welfarefoundation.org.ge

ტელ.: +995 32 2912699


ნეტგაზეთის მასალების სხვა გამოცემებში გადაბეჭდვის წესი
[რეკლამა]