ტენდერი ონლაინ მედიებისთვის

არასამთავრობო ორგანიზაცია „თავისუფალ ჟურნალისტთა სახლი“ აცხადებს ტენდერს.

ტენდერი ცხადდება პროექტის ფარგლებში – „ერთიანი საქართველო ევროპისთვის“. პროექტი მიზნად ისახავს საქართველოს ევროკავშირთან დაახლოების ხელშეწყობას, საზოგადოების ფართო ჩართულობითა და თანამშრომლობით; ქვეყანაში დემოკრატიის, სამოქალაქო საზოგადოების, ახალგაზრდების, მედიის, ბიზნესის, ახალგაზრდა ადვოკატებისა და აქტივისტების სამართლებრივ მხარდაჭერასა და გაძლიერებას; სამეცნიერო კვლევებისა და საზოგადოებრივი დიალოგის ინიციირებას; საქართველოს საზოგადოებისა და საერთაშორისო საზოგადოების ინფორმირების ზრდას.

პროექტის ერთ-ერთი აქტივობაა მედია კონტენტის და ასევე სოციალურ ქსელებში კამპანიის წარმოება – „ძალა ევროკავშირშია“ (Strength is in the EU).

„ძალა ევროკავშირშია“(Strength is in the EU) – ამ კამპანიის მიზანია, ხელი შეუწყოს ევროინტეგრაციის პროცესს აქტიური მედიაკამპანიის გზით, ევროპული ღირებულებების დაცვასა და განმარტებას, ევროკავშირში ინტეგრაციის გზაზე არსებული ხელოვნური წინაღობების იდენტიფიცირებასა და მხილებას, მნიშვნელოვანი თემების ინიციირებასა და დისკუსიას.

ტენდერის ფარგლებში შექმნილი მასალების მიზნები:

ცნობიერების გაზრდა – საზოგადოების სხვადასხვა ჯგუფის ინფორმირება საქართველოს და ევროკავშირის თანამშრომლობის ეფექტურ შედეგებზე.

ინფორმირებულობის გაზრდა – საქართველოს იმ რეფორმების შესახებ, რომლებიც აუცილებელია ევროკავშირში გასაწევრიანებლად მოლაპარაკებების გასახსნელად.

მითების დამსხვრევა – ევროკავშირთან დაკავშირებული არასწორი ინფორმაციის გაბათილება და მის სანაცვლოდ გადამოწმებული, ფაქტებზე და შედეგებზე დაფუძნებული ინფორმაციის გავრცელება.

დადებითი შედეგების ჩვენება – საქართველოს და ევროკავშირის მეგობრობის და პარტნიორობის შედეგად მიღებული მრავალმხრივი დადებითი მაგალითების ჩვენება მარტივი, ხელმისაწვდომი და დასამახსოვრებელი ფორმით.

მხარდაჭერის გაზრდა – საზოგადოების სხვადასხვა ჯგუფის, ინდივიდების ჩართულობის ზრდა და თანამონაწილეობის განცდის გაჩენა, რომ ევროკავშირთან დაახლოების პროცესი თითოეულ მათგანს, მათ ოჯახის წევრს ეხება და უკეთესობისკენ ცვლის მათი ცხოვრების ხარისხს.

მნიშვნელოვანია: სატენდერო მასალების წარმოებისას აქცენტი გაკეთდეს ევროკავშირის, როგორც საქართველოს მეგობრის და პარტნიორის სტატუსზე, რაც ხელს შეუწყობს მცდარი აღქმის – ევროკავშირის, როგორც მეურვის და ზედამხედველის იმიჯის ცვლილებას, რომლის დამკვიდრებას და ამ გზით ადამიანების შეცდომაში შეყვანას აქტიურად ცდილობენ. შესაბამისად, უნდა გაძლიერდეს კომუნიკაცია, რომ უკვე მრავალი წელია, რაც საქართველოს ევროკავშირის წევრ ქვეყნებთან აკავშირებს მეგობრული, თანასწორ უფლებებზე დაფუძნებული ურთიერთობა, რომლის საბოლოო მიზანი ისტორიული მიზნის მიღწევა და საქართველოს ევროპულ ოჯახში დაბრუნებაა.

სამიზნე ჯგუფები: ფართო საზოგადოება; სტუდენტები, ახალგაზრდები; ეთნიკური უმცირესობების წარმომადგენლები; მცირე, რეგიონული მეწარმეები; ბიზნესკომპანიები; საგანმანათლებლო სექტორის წარმომადგენლები; საჯარო სექტორის წარმომადგენლები.

საკომუნიკაციო არხები: სატენდერო მასალები უნდა გავრცელდეს სოციალური მედიის სხვადასხვა პლატფორმის (Facebook; Instagram; TikTok; YouTube) საშუალებით და უნდა ეფუძნებოდეს, ტენდერში გამარჯვებული ონლაინ მედია საშუალების ვებგვერდზე გამოქვეყნებულ მასალებს.  

მონიტორინგი და შეფასება

კოალიციის წევრები გამოიყენებენ მონიტორინგისა და შეფასების შემდეგ მეთოდებს:

• ყოველთვიური ანგარიში დასრულებული სამუშაოს დეტალური აღწერა, მათ შორის გამოქვეყნებული მასალები ჰიპერბმულებით
• აუდიტორიის ჩართულობის მონიტორინგი და შეფასება;
• სოციალური მედიისა და ვებგვერდის სტატისტიკის ანალიზი;

წინამდებარე ტენდერში კამპანიის წარმოებისთვის შეირჩევა 10 ონლაინ მედია საშუალება.

ტენდერში გამარჯვებული მედია საშუალებებისთვის მომზადდება კომუნიკაციის სტრატეგიის დოკუმენტი, რომელზე დაყრდნობითაც უნდა აწარმოოს ტენდერში გამარჯვებულმა მედიამ კამპანია – „ძალა ევროკავშირშია“.

ტენდერში მონაწილეობის პირობები: 

• • მოსამზადებელი მედია პროდუქტის ერთეულის ფასის ზედა ზღვარი: 200 ევროს ეკვივალენტი ლარში, თანხის ჩარიცხვის დღეს არსებული შეღავათიანი საბანკო კურსით; თანხაში შედის საქართველოს კანონმდებლობით გათვალისწინებული ყველა გადასახადი; 
  • მოსამზადებელი მედია პროდუქტის მინიმალური რაოდენობა 25 ერთეული, მაქსიმალური რაოდენობა 80 ერთეული. 

• მომზადებისა და გამოქვეყნების პერიოდი: ივლისი – ოქტომბერი, 2024

ტენდერში მონაწილეობის პროცედურა 

ტენდერში მონაწილეობის მსურველმა ონლაინ მედია საშუალებებმა უნდა წარმოადგინონ:

• სრულყოფილად შევსებული სატენდერო წინადადება 
  • განმცხადებელი ორგანიზაციის დასახელება 
  • მედია პლატფორმა 
  • რეგიონული ფოკუსი არსებობის შემთხვევაში 
  • გამომცემლობის ენა 
  • სოციალური მედიის ქსელები [გამომწერების რაოდენობის მითითებით] 
  • განხორციელების პერიოდი
  • საკონტაქტო პირი 
  • ინფორმაცია განმცხადებელი ორგანიზაციის შესახებ – ისტორია და საქმიანობის მოკლე აღწერა, აუდიტორიის დახასიათება და გავლენები. 
  • სატენდერო წინადადება – მიუთითეთ რა ფორმატის და რაოდენობის მედიაპროდუქტს შექმნით თანამშრომლობის შემთხვევაში 
  • გამოცდილება და მაგალითები – მიუთითეთ თუ გქონიათ საინფორმაციო კამპანიის წარმოების გამოცდილება ან/და ის მედიაპროდუქტები, რომელთა მსგავსის შექმნასაც გეგმავთ კამპანიის ფარგლებში  
  • ბიუჯეტი 
• ამონაწერი მეწარმეთა და არასამეწარმეო (არაკომერციული) იურიდიული პირების რეესტრიდან, ამასთან ამონაწერი გაკეთებული უნდა იყოს ტენდერში მონაწილეობის მიღებამდე არაუადრეს 1 წლისა.
• ცნობა შემოსავლების სამსახურიდან დღგ-ს გადამხდელად რეგისტრაციის შესახებ. 

კონკურსში მონაწილეთა შეფასების სქემა

• შეფასების კომპონენტი – გამოცდილება, პროფესიული მედიასტანდარტები და რეპუტაცია; შეფასების წონა – 30%
• შეფასების კომპონენტი – კრეატიული კონცეფცია და ხედვა; შეფასების წონა – 30%;
• შეფასების კომპონენტი – ერთი საინფორმაციო ნიმუში (პოსტის ტექსტი და ვიზუალი), შეფასების წონა – 20%;
• შეფასების კომპონენტი – მომსახურების ღირებულება; შეფასების წონა – 20%.

პროექტის განმახორციელებელი გუნდი საბოლოო გადაწყვეტილების მისაღებად დამატებით ინტერვიუს ჩატარების საჭიროების შემთხვევაში, დაუკავშირდება მხოლოდ შერჩეულ კანდიდატებს.

პრეტენდენტს შეარჩევს პროექტის გუნდი. შემსყიდველი ორგანიზაცია დაუკავშირდება მხოლოდ იმ პრეტენდენტს, რომელიც დააკმაყოფილებს ძირითად მოთხოვნებს.

განაცხადი მიიღება ელექტრონულად 2024 წლის 25 მაისიდან 10 ივნისის ჩათვლით 18:00 საათამდე მისამართზე: batumi_ijh@yahoo.com. სათაურში მიუთითეთ „ძალა ევროკავშირშია“.

სატენდერო დოკუმენტაციასთან დაკავშირებული ნებისმიერი ინფორმაციისთვის შეგიძლიათ დაგვიკავშირდეთ მისამართზე: ბათუმი, მემედ აბაშიძის გამზირი #48;

საკონტაქტო პირი: ასლან ჭანიძე. ელ.ფოსტა: batumi_ijh@yahoo.com

_____

პროექტი მხარს უჭერს ევროკავშირი, მას ახორციელებს კონსორციუმი „კონრად ადენაუერის ფონდის“ (KAS) ხელმძღვანელობით, რომელშიც შედიან ეკონომიკური პოლიტიკის კვლევის ცენტრი (EPRC), სამოქალაქო საზოგადოების ფონდი (CSF) და „თავისუფალ ჟურნალისტთა სახლი“ (IJH).