Batumelebi | სპორტის ახალი სახეობა საქართველოში სპორტის ახალი სახეობა საქართველოში – Batumelebi
RU | GE  

სპორტის ახალი სახეობა საქართველოში

 

 

  13 ნოემბერს ბათუმის სპორტულ-ახალგაზრდულ ცენტრში აჭარის ღია პირველობა ჩატარდა ფუტნეტში. მასში 10 გუნდი და სულ, სპორტის სხვადასხვა სახეობიდან 50-მდე მოთამაშე მონაწილეობდა. პირველი ადგილი გუნდმა „აჭარლებმა“ დაიკავა, მეორე ადგილზე გავიდა „ბენზე“. ტურნირი აჭარის სპორტისა და ახალგაზრდობის საქმეთა დეპარტამენტმა 3000 ლარით დააფინანსა. ფუტნეტის აჭარის პირველ ღია პირველობას კი საქართველოს ფუტნეტის ასოციაცია უწევდა ორგანიზებას. „ბათუმელები“ ფუტნეტის შესახებ ასოციაციის პრეზიდენტს ირაკლი ღლონტს ესაუბრა.

 

საქართველოს ფუტნეტის ასოციაცია 2014 წლის 14 ივნისს დარეგისტრირდა. მისი დამფუძნებლები არიან: ირაკლი ღლონტი, ნიკოლოზ მეგრელიშვილი, ჯაბა ჭანტურია, ირაკლი აბულაძე, ლევან გიორგაძე

 

ბატონო ირაკლი, რა არის ფუტნეტი, როგორია მისი თამაშის წესები?

– სათამაშო მოედანი ტენისის კორტებს ჰგავს, არის სპეციალური ბურთი, ფეხბურთის ბურთის მსგავსი, რომელიც უნდა ითამაშო ფეხით, მკერდით და თავით, ხელის გარეშე. თამაში არის ერთიერთზე, ორი-ორზე და სამი-სამზე. ბათუმის ღია პირველობა ორიორზე და სამი-სამზე ჩავატარეთ. შარშან ევროპის ჩემპიონატი ჩატარდა ახალგაზრდებს შორის. საქართველოდანაც იყვნენ წასული ახალგაზრდები გამოცდილების მისაღებად. კონსულტაციები გვქონდა ევროპის ფედერაციასთან.

 

საიდან გაჩნდა ამ სპორტის სახეობის შექმნის სურვილი საქართველოში, არიან ფუტნეტის მიმდევრები?

– ზოგადად, სპორტის ახალი სახეობაა მსოფლიოში. მეგობრებმა გადავწყვიტეთ, რომ შემოგვეტანა სპორტის ეს სახეობა საქართველოშიც. ახლა კი ვცდილობთ გავუკეთოთ პოპულარიზაცია. ვგეგმავთ სასკოლო ტურნირების ჩატარებას, აჭარის რეგიონული ფედერაციის გახსნას. შემდეგ იმერეთის ტურნირის ჩატარებას და იმერეთის რეგიონალური ფედერაციის გახსნას. ფედერაციების ბაზაზე რეგიონებში განვითარდება ეს სახეობა. ამის შემდეგ ვგეგმავთ საქართველოს ჩემპიონატის ჩატარებასაც. ეს არის საწყისი ეტაპები ფუტნეტის პოპულარიზაციისთვის საქართველოში. დეკემბერში თუ მოვასწრებთ, შეიძლება თბილისშიც გავმართოთ ტურნირი. მომდევნო წლიდან ყველა რეგიონში ჩავატარებთ.

 

ასოციაციას რა ფინანსები გაქვთ, სახელმწიფოსგან იღებთ თანხას?

– სახელმწიფოსგან არანაირი დაფინანსება არ გვაქვს. თუმცა, ამჯერად ფინანსური მხარდაჭერა გაგვიწია აჭარის სპორტისა და ახალგაზრდობის საქმეთა დეპარტამენტმა, თასების, სიგელებისა და საჩუქრებისთვის. კერძო სექტორიდან, მეგობრების დახმარებით, ჩვენი რესურსიდან ვაფინანსებთ ასოციაციას.

 

მწვრთნელი ვინ არის?

– ჯერჯერობით მწვრთნელი არ გვყავს, გვყავდა კოორდინატორები, ვისაც ნათამაშევი ჰქონდა ფუტნეტი და ტურნირებზეც იყო ნამყოფი. ტურნირის ჩატარებამდე კოორდინატორებმა დარეგისტრირებულ ორგანიზაციებს აუხსნეს თამაშის წესები.

 

  

 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი