Batumelebi | WADA-მ სპორტსმენებისთვის აკრძალული პრეპარატების სია განაახლა WADA-მ სპორტსმენებისთვის აკრძალული პრეპარატების სია განაახლა – Batumelebi
RU | GE  

WADA-მ სპორტსმენებისთვის აკრძალული პრეპარატების სია განაახლა

 

 

  მსოფლიოს ანტიდოპინგური სააგენტოს (WADA) აღმასრულებელმა კომიტეტმა 2015 წლის 16 სექტემბერს 2016 წლის აკრძალული პრეპარატების სია დაამტკიცა, რომელიც ძალაში 2016 წლის პირველი იანვრიდან შევა. ეგრეთ წოდებული „აკრძალული სია“ აერთიანებს იმ პრეპარატების ჩამონათვალს, რომლებზეც მსოფლიო მასშტაბით დაწესებულია რეგულაციები, შეზღუდვა და აკრძალვა სპორტმსმენების მიერ მათ გამოყენებაზე. 

 

აკრძალული სია

 

მსოფლიოს ანტიდოპინგური სააგენტო აკრძალულ სიას ყოველწლიურად ამტკიცებს. ეს იმას ნიშნავს, რომ აკრძალული სია ყოველწლიურად იცვლება, ემატება ან აკლდება პრეპარატების ჩამონათვალი და პრეპარატების მიღების მეთოდები. აკრძალული პრეპარატების გამოყენების შემთხვევაში სპორტსმენის წინააღმდეგ ხორციელდება სხვადასხვა სახის სანქცია, მათ შორის დისკვალიფიკაცია (როგორც რამდენიმე წლით, ისე სამუდამოდ) და შედეგების გაუქმება.

 

წელს ცვლილებები შევიდა ჰორმონულ, შარმდენი პრეპარატების, სტიმულატორებისა და ალკოჰოლური ნივთიერებების ჯგუფებში. იმის გათვალისწინებით, რომ საქართველოს ეროვნული ანტიდოპინგური სააგენტო WADA-ს უფლებამოსილი ორგანოა, აკრძალული სია საქართველოშიც პირველი იანვირდან ამოქმედდება.

 

„წელს სერიოზული ცვლილება შევიდა აკრძალულ სიაში. გულის კუნთების მკვებავი პრეპარატი მილდრონატი, რომელსაც ფართოდ ხმარობდნენ სპორტსმენები, აღმოჩნდა, რომ სპორტში ხელოვნურად აძლიერებს შედეგებს. ამის დასადგენად 5-წლიანი კვლევა ჩაატარეს, წელს კი აკრძალულ სიაში შეიტანეს“, – უთხრა „ბათუმელებს“ საქართველოს ეროვნული ანტიდოპინგური სააგენტოს თავმჯდომარემ, პროფესორმა პავლე კასრაძემ.

 

„მილდრონატი“, იგივე „მელდრონიუმი“, აკრძალულ სიაში ჰორმონებისა და მეტაბოლური მოდულატორების ჯგუფს განეკუთვნება. პავლე კასრაძის თქმით, ამ წამალს გულთან დაკავშირებული პრობლემების დროს იყენებენ. წამლის ანოტაციაში კი წერია, რომ მისი გამოყენების შედეგად ორგანიზმი იძენს დატვირთვის ატანისა და ენერგეტიკული რეზერვების სწრაფი აღდგენის უნარს.

 

გარდა ამ ერთი პრეპარატის აკრძალვისა, კორექტურა შევიდა სპორტის ზოგ სახეობაში შარდმენდი პრეპარატებისა და ალკოჰოლის მიღების რეგულაციებში – დასაშვები გახდა შარდმდენი პრეპარატების ჯგუფში შემავალი საშუალებების ოფთალმოლოგიური მიზნით გამოყენება. ეს ცვლილება კვლევის მეთოდების განვითარებას უკავშირდება. „დაიხვეწა მეთოდები, რითაც არკვევენ პრეპარატის მიღების გზას. აქედან გამომდინარე შესაძლებელია დადგენა სპორტსმენმა ცხვირში ჩაიწვეთა პრეპარატი, თუ ვენაში გაიკეთა“, – გვითხრა პავლე კასრაძემ.

 

 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი