როგორ იჭიდავებენ აზერბაიჯანელი და ირანელი მოჭიდავეები ქართულად? აჭარის ეროვნული ქართული ჭიდაობის ფედერაციის პირველი ვიცე-პრეზიდენტი პაატა ურიადმყოფელი ამბობს, რომ ეს ქვეყნები ეროვნული ჭიდაობას ერთმანეთს უზიარებენ:
„ჩვენ ხუთწლიანი ურთიერთობა გვაქვს ამ სფეროში. ქართული ჭიდაობის წესები და ვიდეორგოლები გადავუგზავნეთ ირანსა და აზერბაიჯანში, აქედან გამომდინარე, მათ იციან ქართული ჭიდაობა“.
ტურნირი გაიმართება ოლიმპიური სისტემით, საქართველოს ქართული ჭიდაობის ეროვნული ფედერაციის პრეზიდიუმის მიერ დამტკიცებული ერთიანი წესების შესაბამისად. შეჯიბრებები დაიწყება 26 სექტემბერს 11 სთ-ზე, ხოლო საზეიმოდ გახსნება 13 სთ-ზე და დასრულდება 27 სექტემბერს.
სპორტსმენთა აწონვები ჩატარდება ბათუმის კომპლექსურ სასპორტო სკოლაში, (ფიროსმანის ქ. #14), 16 სთ-დან 18 სთ-მდე.
ტურნირის ორგანიზატორები არიან აჭარის სპორტისა და ახალგაძრდობის საქმეთა დეპარტამენტი და აჭარის ეროვნული ქართული ჭიდაობის ფედერაცია.
