ნეტგაზეთი • RU

30 მაისს ბათუმში წყვილთა რბოლა გაიმართება

 

 

  30 მაისს ბათუმში, გმირთა ხეივანსა და ბაგრატიონის ქუჩის კვეთაში, გიორგი ლეონიძის ქუჩის მიმდებარე ტერიტორიაზე გაიამართება აჭარის ღია პირველობა წყვილთა რბოლაში 1100 მეტრზე. შეჯიბრება ჩატარდება სამ კლასში – წინა წამყვან თვლებს, უკანა წამყვან თვლებსა და კვადროში, ასევე დამატებით მეოთხე – აბსოლუტურ კლასში.

 

აჭარის ღია ჩემპიონატი წყვილთა რბოლაში 2015 | სარბოლო ტრასა

 

წყვილთა რბოლაში ჩემპიონატი  აჭარის რეგიონალური საავტომობილო ფედერაციის ორგანიზებით მოეწყობა. ჩემპიონატს 15 მსაჯი ეყოლება. უსაფრთხოებას 10 პოლიციელი და ერთი სახანძრო მანქანა დაიცავს. ტერიტორია კი, სადაც შეჯიბრება უნდა ჩატარდეს, სპეციალური საშუალებით შემოიღობება.


ფედერაციის პრეზიდენტის იური ლომთათიძის ინფორმაციით, რბოლაში მონაწილეობა საქართველოს ნებისმიერი რეგიონიდან, ყველა მსურველს შეუძლია, ვისაც აქვს მართვის მოწმობა.


ჩემპიონატში მონაწილეთა რეგისტრაცია 30 მაისს, 11 საათზე დაიწყება, უშუალოდ შეჯიბრება კი 2 საათზეა დაგეგმილი და საღამოს დასრულდება.


გამოვლინდება გამარჯვებული წინა წამყვან თვლებს, უკანა წამყვან თვლებსა და კვადროში,  რის შემდეგაც პირველ ადგილზე გასულები, მეოთხე კლასში – აბსოლუტურში გაეჯიბრებიან ერთმანეთს.


იური ლომთათიძის თქმით, ჩემპიონატის ჩატარებისთვის 1500 ლარია გაწერილი, რომელსაც აჭარის სპორტისა და ახალგაზრდობის საქმეთა დეპარტამენტი გამოყოფს. ფედერაცია გამარჯვებულებს თასებს, მედლებსა და სიგელებს გადასცემს, ხოლო აბსოლუტურში გამარჯვებულს – ფულად საჩუქარსაც. 



ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი