Batumelebi | მშვილდოსნები ევროპის ჩემპიონატისთვის ემზადებიან მშვილდოსნები ევროპის ჩემპიონატისთვის ემზადებიან – Batumelebi
RU | GE  

მშვილდოსნები ევროპის ჩემპიონატისთვის ემზადებიან

ირაკლი დარცმელიძე

 

აჭარის მშვილდოსნობის ფედერაცია 2013 წელს სიახლეებით შეხვდა. ორგანიზაციას ახალი პრეზიდენტი ჰყავს. თანამდებობა ლევან ჯიოშვილმა დაიკავა, რომელიც მანამდე აჭარის სპორტისა და ახალგაზრდობის დეპარტამენტში მუშაობდა. ვიცეპრეზიდენტებად აირჩიეს ხათუნა ნარიმანიძე და ზემოაღნიშნული დეპარტამენტის ყოფილი უფროსი ნოდარ ფუტკარაძე. როგორც აჭარის ნაკრების მთავარმა მწვრთნელმა თამაზ ფუტკარაძემ ბათუმელებთან საუბარში განაცხადა, გუნდი ამჟამად საქართველოს ჩემპიონატისთვის ემზადება, რომელიც იანვრის ბოლოს თბილისში გაიმართება.


თამაზ ფუტკარაძე: თბილისში საქართველოს ჩემპიონატი როგორც დიდებში, ასევე ახალგაზრდებში გაიმართება. აჭარიდან დაახლოებით 18 სპორტსმენით წარვდგებით. აქედან ცამეტს სპორტის დეპარტამენტი აფინანსებს, ერთს კი – აჭარის პარაოლიმპიური კომიტეტი. ზვიად დუმბაძე შეზღუდული შესაძლებლობების მქონე პირია, მაგრამ საქართველოს ჩემპიონატში აუცილებლად მიიღებს მონაწილეობას. სწორედ ამ ტურნირზე გაირკვევა, თუ ვინ გაემგზავრება თებერვალში პოლონეთში, სადაც ევროპის ჩემპიონატი გაიმართება.

 

 

ხათუნა ნარიმანიძე ფედერაციის ვიცეპრეზიდენტი გახდა. ნიშნავს ეს იმას, რომ ყველაზე ტიტულოვანმა მშვილდოსანმა სპორტული კარიერა დაასრულა?

 

 

– არა, ხათუნა კვლავ გააგრძელებს აქტიურ სპორტულ კარიერას და ტურნირებშიც იასპარეზებს.

 

 

საუბარი იყო დაფინანსების მომატებაზე

 

 

– სამწუხაროდ ეს არ მოხერხდება. თავდაპირველად საუბარი იყო წლიურ 32 000 ლარზე, თუმცა, საბოლოოდ 20 000 ლარზე ჩამოგვიყვანეს. ამის მიზეზად კი დეპარტამენტმა ფინანსების ნაკლებობა დაასახელა.

 

 

ეროვნული ნაკრების მწვრთნელის ადგილი ვაკანტურია, როგორც ვიცი, თქვენი კანდიდატურა მოიაზრებოდა

 

 

– რამდენიმეს, მათ შორის მეც შემომთავაზეს ნაკრების სათავეში ჩადგომა, თუმცა ჯერჯერობით ყველა თავს ვიკავებთ. როდესაც თბილისში ჩავალთ ჩემპიონატზე, სწორედ იქ დავილაპარაკებთ ამის თაობაზე, ყველა წარმოადგენს საკუთარ გარანტიებს და ვნახოთ საბოლოოდ რა გადაწყდება. თუმცა დაწრმუნებული ვარ, რომ ევროპის ჩემპიონატზე საქართველოს ეროვნული ნაკრები მწვრთნელის გარეშე არ წარსდგება. 

ნეტგაზეთის მასალების სხვა გამოცემებში გადაბეჭდვის წესი
ირაკლი დარცმელიძე