მთავარი,სპორტი

„ნაციონალური მოძრაობა“: მერიამ სპორტული ბაზა მშენებლობის დასრულებამდე ჩაიბარა

08.02.2018 • 3140
„ნაციონალური მოძრაობა“: მერიამ სპორტული ბაზა მშენებლობის დასრულებამდე ჩაიბარა

ბათუმის საკრებულოს წევრი „ერთიანი ნაციონალური მოძრაობიდან“, ნოდარ დუმბაძე აცხადებს, რომ მერიამ ანგისის სპორტული ბაზა მშენებლობის დასრულებამდე ჩაიბარა. სპორტულ კომპლექსის მშენებლობაზე  კომპანია „მონოლითი 2005“-ი მუშაობდა.

„აღნიშნული ობიექტი [კომპანიას] უნდა ჩაებარებინა 2017 წლის 25 დეკემბრამდე. წარმოგიდგენთ კომპლექსის სამუშაოების მიღება-ჩაბარების აქტებს, რომლებითაც დასტურდება, რომ სპორტული კომპლექსის მშენებლობა დასრულებულია და იგი მერიამ ჩაიბარა. თუმცა შეუიარაღებელი თვალითაც ნათლად ჩანს, რომ აქ სამუშაოები არ დასრულებულა და ახლაც მიმდინარეობს. თუ სამუშაოები არ დასრულებულა, მაშინ ჩნდება კითხვა, რა ჩაიბარა ბათუმის მერიამ? სტადიონზე არ არის დაცული უსაფრთხოების ნორმები, სპორტსმენის მხრიდან ტრავმის მიღების ალბათობა არის მაღალი. წვიმაში დგება წყალი და სხვა უამრავი პრობლემა არსებობს. თუმცა ბათუმის მერიამ აქ სამუშაოები შესრულებულად „ჩათვალა“. ეს მიუთითებს, რომ ადგილი გვაქვს კორუფციასთან,“ – განაცხადა ნოდარ დუმბაძემ.

დუმბაძე სამართალდამცავებს მოუწოდებს, გამოიძიონ სპორტული ბაზის მშენებლობის საკითხი და ასევე ის, თუ რატომ ჩაიბარა კომპლექსი ბათუმის მერიამ ნაჩქარევად.

“ბათუმელები” კომენტარისთვის ბათუმის მერიას დაუკავშირდა. მერიაში გვითხრეს, რომ განმარტებას მალე გააკეთებენ.

ბათუმის სპორტული კომპლექსის მშენებლობისთვის ბათუმის მერიის ბიუჯეტიდან  4 116 170 ლარი გაიხარჯა.

 

ამავე თემაზე: ანგისის სპორტული ბაზის მშენებლობაზე ბათუმის მერიამ ხელახალი ტენდერი გამოაცხადა

როდის დასრულდება ანგისის სპორტული ბაზის მშენებლობა

მთავარი ფოტო: ანგისის სპორტული ბაზა სპორტული ბაზის ფეისბუქ გვერდიდან

გადაბეჭდვის წესი