ბათუმის ბულვარში სასტუმრო „შერატონი“ მწვანე ნარგავებს იღებს. „შერატონის“ ადმინისტრაციის ინფორმაციით, ხეები დაზიანებულია და მისი ამოღება ამიტომ ხდება.
„ხე-მცენარეები დაზიანებულია, თავის დროზე არ უნდა მომხდარიყო მათი იმ ადგილზე ჩარგვა, რადგან შეუსაბამო ნიადაგია, ამიტომ დაზიანებული ხეების ამოღება ხდება. ეს ტერიტორია ახალი ნარგავებით განახლდება,“ – ამბობს სასტუმრო „შერატონის“ წარმომადგენელი მამუკა ხაბაძე.
„ბათუმელების“ კითხვაზე, თუ არსებობს სპეციალისტების დასკვნა იმაზე, რომ ხეები ნამდვილად დაზიანებულია, მამუკა ხაბაძე პასუხობს: „დაზიანებული რომ არის, ამაზე მეტყველებს ხეებიც და დასკვნაც არსებობს, რომელიც დაახლოებით 2-3 წლის წინ გაკეთდა. მაშინ ითქვა, რომ არსებული ნიადაგი შეუსაბამო იყო ამ ხეებისთვის. ახლა ამ ხეების გადატანა სხვა ადგილზე, ხელვაჩაურში მოხდება და მათ ადგილზე ასევე წიწვოვანი, მაგრამ სხვა ჯიშის ხეები დაირგვება“.
მამუკა ხაბაძის თქმით, ასამდე ხე უკვე გამხმარია, „ამდენივეს შეცვლას ვაპირებთ კიდევ“. მისივე ინფორმაციით, ხეები აღნიშნულ ტერიტორიაზე „შერატონმა“ დარგო და შეცვლაც მისივე ინიციატივით მიმდინარეობს.
„ბათუმის ბულვარის“ განმარტებით, აღნიშნული ტერიტორია კერძო საკუთრებაა და ხეების დარგვის ან გადატანის პროცესში ჩარევის უფლება ბულვარის ადმინისტრაციას არ აქვს.