Batumelebi | მაჟორიტარი კანდიდატი: ვიცნობ ხულოს მუნიციპალიტეტის ყველა ჩიხს, მთას და სოფელს მაჟორიტარი კანდიდატი: ვიცნობ ხულოს მუნიციპალიტეტის ყველა ჩიხს, მთას და სოფელს – Batumelebi
RU | GE  

მაჟორიტარი კანდიდატი: ვიცნობ ხულოს მუნიციპალიტეტის ყველა ჩიხს, მთას და სოფელს

პროფესიით ექიმი, ბათუმის რეფერალური საავადმყოფოს დირექტორი და ხულოს საკრებულოს ყოფილი წევრი, რაულ პაქსაძე მაღალმთიან აჭარაში, 73-ე ოლქის მაჟორიტარი კანდიდატია საქართველოს პარლამენტში. ის დეპუტატობის კანდიდატად რესპუბლიკურმა პარტიამ დაასახელა.

 

ბატონო რაულ, რა პოლიტიკური გამოცდილება გაქვთ?

2004 წლიდან ჩართული ვარ პოლიტიკაში. 2005 წლიდან 2011 წლამდე „რესპუბლიკური პარტიის“ თავმჯდომარე ვიყავი ხულოს მუნიციპალიტეტში. 2006-2010 წლებში ხულოს საკრებულოს წევრი ვიყავი „რესპუბლიკური პარტიიდან“, ბოლო საპრეზიდენტო არჩევნებზე „ქრთული ოცნების“ საარჩევნო შტაბს ვხელმძღვანელობდი ხულოში.

რა არის თქვენი გზავნილი ამომრჩეველთან, რატომ უნდა აგირჩიონ?

იმიტომ უნდა ამირჩიონ, რომ პრინციპების მატარებელი ვარ და ხშირად არ ვიცლი პოლიტიკურ პოზიციას, პარტიას. მაქვს საკმაოდ დიდი პოლიტიკური გამოცდილება, კარგად ვიცნობ ხულოს მუნიციპალიტეტს, ყველა ჩიხი, მთა და სოფელი ვიცი. პროფესიიდან გამომდინარე მოსახლეობასთან ყოველთვის კავშირი მქონდა და მათ გვერდით ვედექი. ბოლო ორი თვის განმავლობაში კარგად გავიცანი შუახევისა და ქედის მუნიციპალიტეტის სოფლებიც. ვფიქრობ, აქტიური მაჟორიტარი კანდიდატი ვიქნები.

ვერც ერთი ყოფილი მაჟორიტარი, მათ შორის ვერც ბოლო ორი მოწვევის, რომელიც ახლაც ცდილობს ხელისუფლებაში შეძვრომას, ვერ დაიკვეხნის, რომ რაიმე აქტივობა ჰქონოდა საქართველოს პარლამენტში.

ჩემი არჩევანია, ვიყო ჩემი მოსახლეობის გვერდით, გავიზიარო მათი, როგორც ზოგადი, ასე პირადი პრობლემები.

რატომ გინდათ პარლამენტარობა?

მე პოლიტიკასთან მჭიდრო კავშირი ყოველთვის მქონდა. თუ 8 ოქტომბერს ხულოს, ქედისა და შუახევის ამომრჩეველი არჩევანს ჩემზე გააკეთებს, თუ ისინი მენდობიან და გადაწყვეტენ, რომ მე ვიყო საქართველოს პარლამენტში მათი ხმა, მე მათ არჩევანს დავაფასებ და მათ იდეებს გავყვები.

ვიმუშავებ რესპუბლიკურ ფრაქციაში, ძირითადი მიმართულებები, რაც პარტიას აქვს, იქნება ჩემთან თანხვედრაში, მაგალითად, საგარეო მიმართულება, ევროპა და ევრო ატლანტიკური სივრცე… ჩვენ ძალიან ბევრი გეგმა გვაქვს და, შესაბამისად, ბევრი კანონპროექტის ინიციატორი ვიქნები. მთის კანონი რომ გვაქვს კარგია, მაგრამ მე ვამბობ, რომ უნდა მივიღოთ მთის განვითარების გრძელვადიანი გეგმა.

რა საკითხებზე იმუშავებთ პარლამენტში?

კონკრეტული პარტიები ამბობენ, რომ ყველა სოფელს გზა და ყველა სოფელს წყალი. მე ვამბობ, ყველა ოჯახს გზა და ყველა ოჯახს წყალი. სამწუხაროა, რომ 21-ე საუკუნის 20-იანი წლების მიჯნაზე ისევ გზაზე, წყალსა და სოციალურ დახმარების დანიშვნასა თუ მოხსნაზე გვაქვს საუბარი და ამის გარეშე სხვა პრობლემას ვერ ხედავენ პარტიები.

მე ვიმუშავებ მაღალმთიანი მუნიციპალიტეტის გრძელვადიანი განვითარების გეგმაზე.

„რესპუბლიკელების“ პროექტია რეალური თვითმმართველობები შევქმნათ. ის, რომ რაღაც ნაბიჯები გადაიდგა ამ კუთხით და გამგებელი თუ მერი არჩევით ინიშნება კარგია, მაგრამ არ გაგრძელდა თვითმმართველობის რეფორმა. ჩვენ გავაგრძელებთ რეფორმას, ჩემი პირადი ინიციატივა იქნება ყველა თემს ჰქონდეს თვისი ადმინისტრაციული შენობა, ჰყავდეს მისი გამგეობა და ჰქონდეს საკუთარი ბიუჯეტი.

ჩემ მიერ პირველი ინიცირებული პროექტი იქნება გზა ყველა ოჯახს , წყალი ყველა ოჯახს წყალი.

რასაც ამდენი ხნის განმავლობაში ვეცნობი, ყველა პრობლემა ბიუროზე იქნება განხილული, დამუშავებული კანონის დონეზე და მოთხოვნილი, რომ გათვალისწინებული იქნეს მომდევნო ბიუჯეტში.

ჩვენ რეგიონულ და მუნიციპალურ დონეზე შევქმნით დარგობრივ ფონდებს, რაც მიზანმიმართული იქნება დასაქმების პროექტების შემუშავებისკენ.  ჩვენ უნდა მივცეთ შეჭირვებულ ადამიანებს, გზა ბიზნესიდეები განახორციელონ.

საარჩევნო ოლქში, სადაც კენჭს იყრით, მოსახლეობის მთავარი შემოსავალი სოფლის მეურნეობაა. როგორ წარმოგიდგენიათ ამ სფეროს განვითარება აჭარის მთაში?

როგორც ზემოთ ვახსენე, საჭიროა ფონდების შექმნა რეგიონულ და მუნიციპალურ დონეზე. სანამ ჩვენი ფერმერი მყარად ვერ მოიკიდებს ფეხს, მას ფონდი უნდა დაეხმაროს, როგორც დაბალპროცენტიანი, ასევე ნულპროცენტიანი სესხით განახორციელოს საკუთარი ბიზნესიდეა. ამ ფონდებით გაშენდეს სხვადასხვა კულტურა. ის, ვინც მცირემიწიანია და ვერ შეძლებს კარტოფილი გამოიყვანოს, შესაძლებლობა ჰქონდეს მომგებიანი კულტურა გააშენოს, მაგალითად, ჟოლო, რომელიც არის როგორც მოთხოვნადი, ასევე მომგებიანია.

როფესიით ექიმი ხართ. როგორ ფიქრობთ, ამ კუთხით საკანონმდებლო ცვლილება ხომ არ არის გასატარებელი?

პრობლემაა მთაში ექიმის დამაგრება, ჩემ მიერ იქნება ინიცირებული შემუშავდეს შესაბამისი პროექტი, რომ იყოს უფასო რეზიდენტურის პროგრამა, ანუ ჩვენ სამედიცინო კურსდამთავრებულებს შევთავაზებთ უფასო რეზიდენტურის პროგრამას როგორც ქვეყანაში, ასევე საზღვარგარეთ სახელმწიფო ბიუჯეტის დაფინანსებით. მაგრამ მას ხელშეკრულებაში ექნება ჩადებული მინიმუმ 5-წლიანი მუშაობა მთაში, ამა თუ იმ მუნიციპალიტეტში. ეს მკაფიო გზავნილია ჩვენი კურსდამთავრებული ექიმებისთვის და ეს იქნება მათთვის პრობლემის მოგვარება, შეძლებენ სწავლის გაგრძელებას. სწავლის დასრულების შემდგომ კი დაბრუნდებიან თავიანთ მუნიციპალიტეტებში და ამით შემსუბუქდება მთაში ექიმების დამაგრების პრობლემა.

მოქმედი ხელისუფლება მთავარ მონაპოვრად საყოველთაო ჯანდაცვის სისტემის შემოღებას ასახელებს. თქვენი აზრით, რამდენად გამართულია ეს სისტემა, პასუხობს გამოწვევებს?

პროგრამა კარგია, მაგრამ დადგა დრო მის გადახედვასა და დახვეწაზე ვიფიქროთ. საყოველთაო ჯანდაცვა არ უნდა გაუქმდეს, უნდა არსებობდეს, მაგრამ ამის პარალელურად ნელ-ნელა, ეტაპობრივად მიზნობრივი დაზღვევაც უნდა შემოვიდეს. რას ნიშნავს ეს – დასაქმებული ადამიანები კერძო კომპანიებისგან უნდა იყვნენ დაზღვეულები, მათ თვითონ უნდა უზრუნველყონ საკუთარი თავის დაზღვევა. კანონში ჩასაწერი იქნება, რომ დამსაქმებელს ვალდებულება ჰქონდეს დასაქმებულის დაზღვევაში ფინანსური მონაწილეობა მიიღოს. მაგრამ იმ შემთხვევაში, თუ პიროვნება სამსახურს დაკარგავს, არ უნდა ჰქონდეს ბარიერები აღიდგინოს საყოველთაო დაზღვევა და მისი აღდგენა ავტომატურ რეჟიმში უნდა ხდებოდეს.

ხულოსა და შუახევის მოსახლეობამ არაერთხელ გამართა აქცია გვირაბის მშენებლობის შესაჩერებლად. ჰესის მშენებლობა დაგეგმილია ქედაში. რას გააკეთებთ მოსახლეობის ინტერესების დასაცავად?

ნებისმიერი დიდი პროექტი, რაც ჩვენს ქვეყანაში ხორციელდება და დადასტურებულია, რომ მოახლეობას არ ვნებს, მე მისი შეჩერების წინააღმდეგი ვერ გამოვალ. ვფიქრობ, ასეთი პროექტების განხორციელება ჩვენი მოსახლეობისთვის ცუდი არ იქნება, რადგან ინფრასტრუქტურულ სეგმენტს მოაგვარებს და სახელმწიფოსაც ექნება სარგებელი. საქართველოს პარლამენტის წევრის სტატუსი ითვალისწინებს მის სამაჟორიტარო ოქლში არსებულ პრობლემებში რაღაც კუთხით ინფორმირებას და ამ საკითხებში ჩართულობას, მაგრამ ეს საკითხები უფრო მუნიციპალიტეტების დონეზე უნდა იყოს აყვანილი, ისინი უნდა იყვნენ ამ საკითხებში ჩართული.

თქვენ ხულოს საკრებულოს ყოფილი წევრი ხართ. რა ინიციატივები გქონდათ და რა მნიშვნელოვანი პრობლემა მოუგვარეთ ხულოს მოსახლეობას?

ყველამ იცის მაშინ როგორც იყო, „ნაციონალური მოძრაობა“ არანაირ დათმობაზე არ მოდიოდა, ბიუჯეტის ცვლილებისას ცხარე კამათი მქონდა, მაგრამ რომ გითხრათ ჩემს პროექტს ვინმე მხარს უჭერდა-მეთქი, არ მახსენდება. მე უმცირესობაში ვიყავი.

ზუსტად ვერ ვიხსენებ, მაგრამ კარგად მახსოვს, როდესაც მუნიციპალიტეტს აუთვისებელი რჩებოდა 120 000 – 130 000 ლარი და მე ამ თანხის დაბრუნების ნაცვლად გამოყენებას ვითხოვდი, მხარს არავინ მიჭერდა. ზუსტ წელს ვერ ვიხსენებ ეს როდის იყო, მუნიციპალიტეტმა 120 000 ლარი ვერ აითვისა, ბიუჯეტს უბრუნებდა. მე მოვითხოვე ეს თანხა საავადმყოფოს გადასახურად გამოგვეყენებინა, სადაც წვიმის წყალი ჩადიოდა, მაგრამ ჩემი მოთხოვნა არ გაითვალისწინეს. საკრებულოს სხდომები ხულოში მაშინ ტარდებოდა, როდესაც ბათუმში, ხელვაჩაურში… ჩაატარებდნენ. სხდომის მოგვიანებით ჩატარების მიზეზი ის იყო, რომ საკრებულოების მიერ მიღებული პროექტები ამათ გადმოეწერათ და ისე გაეკეთებინათ, როგორც სხვა მუნიციპალიტეტში იყო. ასე მაგალითად, ერთმა მუნიციპალიტეტმა რომ ხის მოსაცდელი გააკეთა, მათაც ეს პროექტი გადმოიტანეს, 7 000 ლარით ხის მოსაცდელებს აკეთებდნენ, მაშინ როცა ჩვენი გათვლით 3 000 ლარი სჭირდებოდა. ჩვენ ვუმტკიცებდით, რომ ამ თანხით კაპიტალური შენობის მოწყობა  იყო შესაძლებელი  და რომ ის ზამთარს გაუძლებდა. არ მოგვისმინეს და ორი წელიწადში მათ მიერ აშენებული ყველა ხის მოსაცდელი დაიშალა.

ამბობთ, რომ იდეები იმის გამო ვერ განახორციელეთ, რომ უმცირესობაში იყავით. თუ პარლამენტში ისევ უმცირესობით შეხვალთ, თქვენი ინიციატივები ისევ ხომ დაიბლოკება?

თუ კანონპროექტი ჯანსაღ იქნება და საჯარო განხილვებზე მოწონებული, ასევე იურიდიულად გამართული,  მაშინ რა დარჩებათ ოპონენტებს იმის დასამტკიცებლად, რომ კანონპროექტი არ ვარგა? ადრე ცენტრალურ დონეზე იმის დამტკიცება, რომ რაღაც ვარგოდა, თითქმის შეუძლებელი იყო. მსგავსი მიდგომა ჯანსაღ პარლამენტში ვერ იქნება.

ჩემი ინიცირებული საკითხები ძირითადად მთაზე იქნება ორიენტირებული და ეს არ იქნება კონკრეტულად მხოლოდ ხულოზე მორგებული. ეს იქნება, ზოგადად, მთაზე მორგებული და ძალიან ბევრ მაჟორიტართან, ექსპერტთან თუ პარლამენტართან იქნება განხილული თუ ნამუშევარი.

ნეტგაზეთის მასალების სხვა გამოცემებში გადაბეჭდვის წესი
ავტორი