უკრაინის პრეზიდენტმა ვოლოდიმირ ზელენსკიმ ABC News-თან ინტერვიუში ისაუბრა სპეცოპერაცია „ობობას ქსელზე“, რომლის შედეგადაც უკრაინამ რუსეთის სტრატეგიულ ბომბდამშენებს დაარტყა.
ზელენსკიმ ინტერვიუში განაცხადა, რომ ოპერაციისთვის მხოლოდ უკრაინული იარაღი გამოიყენეს და არა მოკავშირეებისგან მიღებული.
„მე ძალიან მინდოდა მხოლოდ ის გამომეყენებინა, რასაც ჩვენ ვაწარმოებთ“ – თქვა მან.
მისი თქმით, სატვირთო მანქანის მძღოლებმა, რომელთა მანქანებშიც საბრძოლო დრონები იყო, არ იცოდნენ ამის შესახებ და ისინი „უბრალოდ დავალებას ასრულებდნენ“.
როგორც ზელენსკიმ თქვა, დრონები მოთავსებული იყო სპეციალურ კონტეინერებში, რომლებსაც გასაშლელი სახურავები ჰქონდათ. პოზიციებზე მიტანის შემდეგ სახურავები დისტანციურად გაიხსნა და დრონები ჰაერში აფრინდნენ დარტყმისთვის.
1 ივნისს უკრაინის უშიშროების სამსახურმა ჩაატარა სპეცოპერაცია „ობობას ქსელი“, რომლის შედეგადაც უკრაინამ ოთხ რუსულ აეროდრომზე, საავიაციო თვითმფრინავებზე მიიტანა იერიში დრონებით. უშიშროების სამსახურის ხელმძღვანელმა ვასილ მალიუკმა განაცხადა, რომ რუსეთის მთავარ აეროდრომებზე განლაგებული ფრთოსანი რაკეტების მატარებლების 34% გაანადგურეს.
