ექიმი, ხეჩინაშვილის კლინიკის ტრავმატოლოგიის დეპარტამენტის ხელმძღვანელი ვატო გვაზავა ფეისბუქზე წერს, რომ არ დავიწყებია, როგორ სცემეს 2024 წელს საპროტესტო აქციაზე, ახლა კი ზოგიერთი პაციენტი ცდილობს მასთან პრივილეგიით მიღებას მინისტრების ახლობლობით. ვატო გვაზავა ფოტოსაც აქვეყნებს, რომელიც გასულ წელს, აქციაზე სასტიკი ცემის შემდეგ არის გადაღებული.
„ამ კვირაში რამდენიმე შემთხვევა მქონდა, რომ პაციენტები ცდილობდნენ პრივილეგიის მიღებას მინისტრების ახლობლობით! ადრე არ ვითვალისწინებდი მსგავს რამეს და ეხლა მითუმეტეს!!! ყველა პაციენტი თანაბარია! არავინ მიდის ექიმთან ბედნიერი, შინაურები მელოდებიან და მეც ველოდები რიგს, როცა მჭირდება!
სწორედ ისეთი ქვეყანა არ მინდა, ვინმეს ვიღაცებით რომ პრივილეგიას იღებდნენ!!! თან ექიმთან ვიზიტისას! დაიცადე, მოქცევა ისწავლე, თუ არა და ჩემს გარდაც არიან სხვა ექიმები და იმათთან მიბრძანდით “ჩაწყობით”!
ამ ფოტოს იმიტომ ვდებ, რომ არ დამვიწყებია ექიმობის გამო, სამაგალითოდ, იმ ნაკადში ყველაზე მაგრად რომ მცემეს!! მე არ მახსოვს რომელიმე სამინისტროდან, მით უფრო ჯანდაცვის, რომ ხმა ამოეღოს ან უბრალოდ მოსაკითხად დაერეკათ!!! არც ამის შემდეგ, ოპერაცია რომ დამჭირდა და არც მერე – ათასი პრობლემა რომ შემექმნა!“ – წერს ვატო გვაზავა.
2024 წლის დეკემბერში, თბილისში, საპროტესტო აქციაზე, ტრავმატოლოგ ვატო გვაზავას მაშინ გაუსწორდნენ სასტიკად, როდესაც ის ორ ახალგაზრდა დემონსტრანტს ეხმარებოდა.
„როდესაც უკვე აგვიყვანეს მარშუტკაში და ვეუბნებოდი, მაგარი ნაცემი ვარ, ტრავმატოლოგიის დეპარტამენტის ხელმძღვანელი ვარ-მეთქი, „შეფ“, ეს ექიმი არისო და „შეფი“ მოვიდა და იმან მომკლა ცემაში“ – თქვა მაშინ ვატო გვაზავამ მედიასთან.
