Batumelebi | კობა ჩხეიძე: მთავრობა ილუზიაშია, როცა ჰგონია, რომ საჯარო მოხელეები მათი რესურსია კობა ჩხეიძე: მთავრობა ილუზიაშია, როცა ჰგონია, რომ საჯარო მოხელეები მათი რესურსია – Batumelebi
RU | GE  

კობა ჩხეიძე: მთავრობა ილუზიაშია, როცა ჰგონია, რომ საჯარო მოხელეები მათი რესურსია

კობა ჩხეიძე პარტია „თავისუფალი დემოკრატების“ მაჟორიტარი კანდიდატია აჭარის უმაღლეს საბჭოში. ის ბათუმის 69-ე  საარჩევნო ოლქში იყრის კენჭს. კობა ჩხეიძე ამჟამად ბათუმის საკრებულოს მოქმედი წევრია.

კობა, რომ გვითხრათ, რატომ დაგასახელათ პარტიამ 69-ე ოლქში მაინცადამაინც თქვენ და არა სხვა?

მე ვცხოვრობ ამ სამაჟორიტარო არეალში, უამრავი მეგობარი მყავს და დღეის მდგომარეობით ვარ ამ სამაჟორიტაროს – რუსთაველის მაჟორიტარი საკრებულოში. ჩემთვის ძალიან ნაცნობი სამოქმედო ტერიტორიაა. ეს არის ადგილი, სადაც დავიბადე, გავიზარდე და ჩემი მთელი შეგნებული ცხოვრება გავატარე.

თქვენ ხართ ბათუმის საკრებულოს წევრი. ამ სტატუსით რისი გაკეთება ვერ შეძელით და რატომ ფიქრობთ, რომ უმაღლესი საბჭოდან უფრო მეტი რამის შეცვლა შეიძლება, მით უფრო, რომ უმაღლესი საბჭო ბევრისთვის უფუნქციო ორგანოა?

სამწუხაროდ, საკრებულოს ფუნქცია არის ნულოვანი, მას აქვს მხოლოდ რეკომენდატორის ფუნქცია მერისთვის. კანონით საკრებულოს შეუძლია მერი გადააყენოს, მაგრამ ვერანაირ სხვა ზემოქმედებას მასზე ვერ ახდენს. ჩვენ დაახლოებით 90 ინიციატივა გვქონდა და  კომისიების დონეზე მათი გატანაც მოვახერხეთ, მაგალითად, ეს იყო დევნილთა შეღავათიანი მგზავრობა, ბავშვთა ბაღის აღმზრდელებისთვის შეღავათიანი მგზავრობა და უამრავი სხვა, მაგრამ ფუნდამენტურ საკითხებზე როდესაც მივედით, მაგალითად, სამშენებლო რეგულაციებზე, დღემდე მერი არაფერს აკეთებს. ბათუმი ერთადერთი ქალაქია, ალბათ, სადაც აბსოლუტურად სხვაგვარად კითხულობენ კანონს. მიუხედავად იმისა, რომ საკრებულოს მივაღებინეთ დოკუმენტი, რომლითაც ვთხოვეთ მერს სამშენებლო რეგულაციების სამართლებრივი მოწესრიგება საქართველოს კანონებთან მიმართებაში, მაინც არაფერი შეიცვალა.

იმის თქმა მინდა, რომ ჩვენ გამორჩეულად მუშა ფრაქცია ვართ ბათუმის საკრებულოში, რომელიც მუდმივად სთავაზობს სამართლებრივ დონეზე სისტემური საკითხების გასწორებას, მაგრამ, რადგან ამას მერი ვერ აკეთებს თვითმმართველობის დონიდან, ამიტომ გადავწყვიტეთ, საქართველოს პარლამენტის საკანონმდებლო ცვლილებების დონეზე დავალდებულდნენ თვითმმართველობები, რომ კანონით შექმნან ქალაქის განვითარების ერთიანი გეგმა. ეს შეეხება არამარტო ბათუმს, არამედ ყველას. შესაბამისად, უნდა შევქმნათ სამშენებლო რეგულაციების ისეთი სტანდარტი, რომელიც არავის მისცემს კანონის ორმაგი წაკითხვის საშუალებას, როგორც  დღეს ხდება.

უფრო ზევით, საკანონმდებლო დონეზეა საჭირო აღმოიფხვრას  ორმაგი კანონის წაკითხვის ყველა საშუალება და ამავე დროს, ახალი ვალდებულებები გაუჩნდეს თვითმმართველობებს – გარემო, რომელშიც ცხოვრობენ ჩვენი თანამოქალაქეები, უნდა გახდეს განსხვავებული, ეს ეხება როგორც ეკოლოგიას, ისე სამშენებლო რეგულაციების სტანდარტს, უსაფრთხოებას…

ამის გაკეთება რანაირად წარმოგიდგენიათ უმაღლესი საბჭოდან?

უმაღლესი საბჭო იმით არის განსხვავებული, რომ მას შეუძლია ერთგვარი ხიდის როლი შეასრულოს საკანონმდებლო-სამართლებრივი რეგულაციების გამართვის საკითხში. მაგალითად, საქართველოს კანონმდებლობა ყველა დონეზე უშვებს ბათუმს, როგორც გამონაკლისს, სამშენებლო რეგულაციების კუთხით, ანუ ბათუმში ოდნავ განსხვავებულად შეუძლიათ გადაწყვეტილებების მიღება. სწორედ ამ შემთხვევაში აჭარის უმაღლეს საბჭოს შეუძლია თქვას, რომ ბათუმთან მიმართებაში სამართლებრივი რეგულაციები მშენებლობის ნაწილში მეტად უნდა დაკონკრეტდეს, რომ არ მიეცეთ თვითნებობის საშუალება – K2 კოეფიციენტი იქნება თუ რეკრიაციული ზონების მთლიანად დაბეტონება, რაზეც სულ პროტესტი გვაქვს „თავისუფალ დემოკრატებს“. არსებობს უამრავი სხვა სამართლებრივი შეუსაბამობა და ამის გამოსწორება შეიძლება – უმაღლესმა საბჭომ ეს უნდა დაიწყოს პირდაპირ პარლამენტში ინიცირებით.

უმუშევრობის თემა ამომრჩევლისთვის არის ყველაზე მნიშვნელოვანი გამოწვევა. ამ კონტექსტში რას ეუბნები ამომრჩეველს შეხვედრებზე და მათი კითხვები რაში მდგომარეობს, მათ რა აინტერესებთ?

სხვათა შორის, ამომრჩეველი ძალიან კარგად არის ინფორმირებული ყველა საკითხზე, რომელსაც „თავისუფალი დემოკრატები“ ვაჟღერებთ, მაგალითად, პენსია, მინიმალური ანაზღაურება, რომელიც ძალიან საინტერესო აღმოჩნდა მოქალაქეებისთვის და ძალიან ბევრი კითხვა მოდის იმის შესახებ, თუ რას გამოიწვევს ეს და, რა თქმა უნდა, დღეს არსებული მინიმალური კალათის ზრდის საკითხი, რომელიც საარჩევნო პროგრამაში გვაქვს ჩადებული. არის აგრეთვე მეორე კომპონენტი – კრედიტებთან დაკავშირებული საკითხები, რაზეც ჩვენ ასევე გვაქვს ინიციატივა, სხვათა შორის, ერთი უკვე მიიღო პარლამენტმა დავით ონოფრიშვილის ინიციატივით… მეორე ინიციატივა არის ის, რომ ჩვენ ვიღებთ ვალდებულებას კრედიტის დაბეგვრის განულებაზე. ამ შემთხვევაში პროცენტი დაიწევს, შესაბამისად, მეტი შემოსავალი დარჩებათ ოჯახებს  და არა ბანკების. ეს ინიციატივა ძალიან საინტერესოა მოსახლეობისთვის.

დასაქმებას რაც შეეხება, ეს უდიდესი პრობლემაა და ადამიანები ხედავენ, რამდენად დიდი მნიშვნელობა აქვს ინვესტიციებს. ინვესტორებთან სახელმწიფოს ურთიერთობა პრაქტიკულად არ მიდის სამრეწველო კუთხით, დარგობრივი ეკონომიკა არ იქმნება. სასტუმრო არ არის სამუშაო ადგილები, ეს არის რაღაც პერიოდით სამუშაო ადგილი, სადაც ადამიანი პროდუქციას ვერ ქმნის. ისინი რასაც ითხოვენ, არის სხვა ტიპის სამუშაო ადგილები, რომელსაც სწორად წარმართული სახელმწიფო პოლიტიკა გამოიწვევს და ამაზე ვესაუბრებით კონკრეტული მაგალითებით. მათ ეს აინტერესებთ და იმედიც აქვთ, რომ „თავისუფალი დემოკრატები“ ამას გააკეთებს. ჩვენ შეგვიძლია გარანტიაც მივცეთ, რომ ყველა სიტყვას შევასრულებთ, რაც არის პროგრამაში და ეს არ არის მხოლოდ ერთი ფურცელი, ეს არის უდიდესი ნაშრომი.

თქვენი პოლიტიკური ოპონენტები ამბობენ, რომ თურქული ინვესტიცია არის საფრთხის შემცველი. თქვენთან შეხვედრების დროს ამომრჩეველი განიხილავს ამ საკითხს, როგორც საფრთხეს, ანუ ამაზე რამდენად ხშირად გეკითხებიან?

ძალიან იშვიათად, მაგრამ არის საუბარი არა იმ კონტექსტში, რომ, რატომ, არამედ იმ კონტექსტში, რომ რატომ არ აქვთ სხვა ქვეყნებს ინტერესი. რაც შეეხება ინვესტიციებს, ყველა ადეკვატურად ხვდება, რომ ჩვენ ვართ თურქული პროდუქციის მომხმარებელი, რაც, რა თქმა უნდა, პირადად ჩემშიც იწვევს გულისწყრომას, რადგან მხოლოდ ერთი ქვეყნის პროდუქტის მომხმარებელი ვართ ყველა მიმართულებით. საზოგადოების გულისწყრომა არ მდგომარეობს  იმაში, რომ ეს პროდუქცია არის იმ ქვეყნიდან, რომელზეც გაქვთ საუბარი, არამედ იმაში, რატომ არ გვაქვს ჩვენი, ან რატომ არ არის ევროპული, ან სხვა ქვეყნების პროდუქცია ჩვენს ქვეყანაში წარმოდგენილი.

როგორც ასეთი,  ინვესტიციის [თურქული] წინააღმდეგი საზოგადოება არ არის, რადგან ყველა ხედავს, რომ ეს არის დასაქმების ერთადერთი გზა, მაგრამ არის მეორეც – ჩვენი მოსახლეობა იმასაც ხედავს, რომ ინვესტიცია არ არის მრავალფეროვანი და სწორედ იმას განიცდიან, რომ ინვესტიციებში არის გარკვეულწილად მონოპოლიზება კი არა და უფრო რომელიმე კონკრეტული მიმართულების ხელშეწყობა. ჩვენ მიგვაჩნია და ამაზე ვესაუბრებით მოსახლეობას, რომ ჩვენმა საელჩოებმა სხვადასხვა ქვეყანაში უნდა აიღონ პასუხისმგებლობა ინვესტიციების მოზიდვაზე – ეს იქნება პირველი ფლანგი, რომელიც გაუწევს ქვეყანას პოპულარიზაციას. ევროპული ინვესტიციები გვჭირდება, ისევე როგორც მთელი მსოფლიოდან. რაც უფრო მეტი მიმზიდველი ქვეყნიდან შემოვა ინვესტიცია, მით უფრო ძლიერი ეკონომიკა გვექნება, ძლიერ ეკონომიკას მოყვება მეტი ხელფასი, პენსია, საარსებო მინიმუმი და უკეთესი საცხოვრებელი პირობები.

თქვენი პარტია იყო სახელისუფლო ვერტიკალში. ამას ახლაც გახსენებენ  ხშირად ოპონენტები და გეკითხებიან, მაშინ რატომ ვერ გააკეთეთ ვერაფერი. ამომრჩეველი სვამს იმავე კითხვას?

ამომრჩევლები ამაზე არ გვეკითხება, რადგან ძალიან კარგად იციან, რაც მოხდა და როგორც მოხდა. კითხვები და  წამოძახილი ამაზე აქვთ პოლიტიკურ ოპონენტებს, მაგრამ ესეც წამოძახებისთვის. ჩვენ გვაქვს უამრავი საქმე გაკეთებული, მაგალითად, პროექტი, რომელსაც ვამუშავებდით და, სამწუხაროდ, ჩააფლავა მთავრობამ, ვგულისხმობ პროექტს – „ჩემი სახლი“, რომელიც „თავისუფალი დემოკრატების“ უბინაოების დაძლევის პროექტია და რომელსაც ჩვენ აუცილებლად გავაკეთებთ. ამ პროექტს პირობითად სვიშევსკის ქუჩის პრობლემას ვეძახით. ყველა მთავრობას ჰქონდა აღწერილი ბინების საკითხი და ფიზიკურად არ გადასცეს მათ ეს ბინები, სახელმწიფოს ფაქტობრივ მფლობელობაში არსებულ ბინებს ვგულისხმობ.

ეს არის მემკვიდრეობითი პრობლემა, რომლის გადაწყვეტაც დავაწყებინეთ ამ მთავრობას „თავისუფალმა დემოკრატებმა“. ასევეა გონიოს მიწების პრობლემა, მთავრობის წევრები დაგვთანხმდნენ, რომ ეს საკითხი უნდა გადაწყვეტილიყო პოლიტიკურად, მაგრამ, სამწუხაროდ, აიღეს და პოლიტიკური გადაწყვეტლების ნაცვლად კვლავ სამართლებრივი რეგულაციებით დაიწყეს ამ ადამიანებთან ურთიერთობა. შედეგად მივიღეთ ის, რომ დღესაც 2007 წლის მდგომარეობას ანუ ნულოვან წერტილს დავუბრუნდით. გადაწყვეტილების მიღების შიშით შეპყრობილია ეს ხელისუფალი. ჩვენ სწორედ ამ საკითხების მოგვარება  შეგვიძლია ჩქარა, მარტივად და სამართლებრივად სწორად.

მართალია, ილაპარაკეთ ქალაქის განაშენიანებაზე, მაგრამ პირადად თქვენი ხედვა მაინტერესებს კულტურული მემკვიდრეობის ძეგლებთან მიმართებაში. რა რეგულაციებია შემოსაღები, რაც გააჩერებს ძეგლების ნგრევის ტენდენციას?

ამ მიმართულებით არის ჩაკეტილი წრე. ერთი მხრივ, არიან ადამიანები, რომლებიც ცხოვრობენ ძეგლებში, მეორე მხრივ _ ინვესტორი, რომელიც ვერ კიდებს ხელს ამ შენობებს და არც უნდა მოკიდოს, რადგან ქალაქის ინტერესებში შედის ძეგლების შენარჩუნება. ამ ჩაკეტილ წრეში საზოგადოებას ჩვენ ვთავაზობთ გამოსავალს – პროექტს, რომელსაც ჰქვია „ჩემი სახლი“, რომელმაც უნდა შეიძინოს ბინები და მეორე მხრივ, აამუშავოს ბინათმშენებლობის კომპონენტი. სწორედ ამ ფონდს უნდა ჰქონდეს უფლება, რომ ძეგლში მცხოვრებ მოქალქეს შესთავაზოს პირობების გაუმჯობესება ალტერნატიული ფართობით; როგორც კი გამოთავისუფლდება ძეგლი, უნდა მოახდინოს მისი ან პირდაპირ რეალიზება, რა თქმა უნდა, ძეგლის დაცვის ვალდებულებით ან სრულად უნდა აღადგინოს თავად და შესძინოს სამოქალაქო ფუნქცია.

ვის ხედავთ თქვენს პოლიტიკურ ოპონენტად 69-ე ოლქში?

ერთადერთი ოპონენტი არის ნიჰილიზმი ამომრჩეველში, რომელიც ალბათ ყველაზე დაუძლეველია, რომელიც საჭიროებს დიდ ენერგიას და ბევრ მუშაობას, რადგან მოქალაქეების დარწმუნება არის ძალიან რთული.

ალტერნატივა, როგორც ასეთი, „თავისუფალ დემოკრატებს“ არ გვყავს არა იმიტომ, რომ ჩვენ სახეზე ლამაზები ვართ, არამედ იმიტომ, რომ პრაქტიკულად ყველა საკითხზე ჩვენ გვაქვს ნაფიქრი, ეს ყველაფერი გვაქვს გაწერილი და ვიცით, როგორ გავხადოთ რეგიონი უკეთესი, ყველა ადამიანს როგორ შევუქმნათ განვითარების უკეთესი პირობები.

საარჩევნო გარემო როგორია, გიშლიან ხელს კამპანიის ჩატარების პროცესში?

საარჩევნო კამპანია არის არნახულად მშვიდი – არ არსებობს არავითარი ძალადობრივი ჩარევა მთავრობის მხრიდან. რაც შეეხება ზოგადად საარჩევნო კამპანიას, საბიუჯეტო რესურსის გამოყენებას ვერც „ქართული ოცნება“ შეელია. დაგეგმილიც იყო და ახლა ბიუჯეტებიც გაზარდეს ბეტონის გზების გაკეთებაზე, შემოერთებულ ტერიტორიებზე მეტი სტადიონის გაკეთებაზე და ასე შემდეგ.

რაც შეეხება ადმინისტრაციულ რესურსს, „ქართული ოცნება“ ილუზიაშია – რატომღაც მთავრობას ჰგონია, რომ დასაქმებული საჯარო მოხელეები მათი რესურსია. მე შემიძლია  ჩვენი პარტიის მიმართ მხარდაჭერიდან გამომდინარე გითხრათ, რომ ეს არის „ოცნების“ ხელისუფლების მორიგი ილუზია. ისინი [საჯარო მოხელეები] დამოუკიდებელი ადამიანები არიან აზროვნებით, მოქმედებით და პრაგმატულად, თავიანთი ოჯახების უკეთესი მომავლისთვის გადადგამენ ნაბიჯს.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან