Batumelebi

“არ აქვს აზრი არაფერს, იწელებოდა პროცესები… მოწმეები ვინც გვყავდა, ისინიც აღარ მოვიდნენ, რომ სიმართლე ეთქვათ. ჩვენ ერთიანად ისე გამოგვყარეს სამსახურიდან, რომ არავის უთქვამს, რატომ გაგვიშვეს,” – გვითხრა ირაკლი მამულაძემ. ის ერთ-ერთია მათ შორის, ვინც “იალჩინ მარკეტს” სასამართლოში უჩივლა, სამსახურში აღდგენა მოითხოვა და განაცდურის ანაზღაურებაც.

“იალჩინ მარკეტიდან” 10 კონსულტანტი ერთდროულად 2017 წლის 24 ნოემბერს გაათავისუფლეს. კონსულტანტებს მენეჯერთან ჰქონდათ კონფლიქტი და გასაუბრება დირექტორთან მოითხოვეს.

“ეს მოხდა ღამის საათებში, ადგილზე დირექტორი მივიდა, მაგრამ მას თანამშრომლების პრეტენზია არ მოუსმენია, უთხრა, რომ უშვებდა ყველას ერთიანად სამსახურიდან, რადგან ისინი თავთავიანთ ადგილებზე არ იყვნენ და ერთად შეგროვდნენ, დირექტორისთვის პრეტენზიები რომ ეთქვათ,” – განმარტავს ზურაბ ცეცხლაძე, რომელიც პროფესიული კავშირების იურისტია და სასამართლოში სამსახურიდან გათავისუფლებულების ინტერესებს იცავდა.

“დასაქმებულების მიერ სამუშაო ადგილის ჯგუფურად და თვითნებურად მიტოვება”, – ასე შეაფასა კონსულტანტების მოქმედება დამსაქმებელმა ბრძანებაში. თუმცა გათავისუფლების ბრძანებები კონსულტანტებმა სასამართლოში ჩივილის შემდეგ ნახეს. მანამდე არცერთი გათავისუფლებულისთვის ბრძანება არ ჩაუბარებიათ.

რამდენად სამართლიანი იყო ამ ფორმით დასაქმებულების გათავისუფლება? – ამ კითხვით “იალჩინ მარკეტის” ინტერესების დამცველს, ირაკლი ქამადაძეს მივმართეთ, ვიდრე მოსამართლე დარბაზში შემოვიდა. იურისტმა გვიპასუხა, რომ ამ საკითხზე კომენტარს არ გააკეთებს.

სარჩელში, რომლითაც 10-მა ყოფილმა კონსულტანტმა სასამართლოს მიმართა, აღწერილია სხვა პრობლემებიც: 12-საათიანი სამუშაო დღე, შესვენება ნახევარი საათი და ჯარიმა 1 ლარი თითოეულ დაგვიანებულ წუთზე. კონსულტანტები მარკეტში 350 და 400 ლარად მუშაობდნენ.

გათავისუფლებიდან სამი დღის შემდეგ პროფკავშირმა დამსაქმებელს ბრძანებების წარმოდგენა სთხოვა, თუმცა ბრძანებები “იალჩინ მარკეტმა” მხოლოდ სასამართლოში წარმოადგინა. სარჩელში ხაზგასმულია ეჭვიც, რომ ბრძანებები გვიან მომზადდა ძველი თარიღით.

რატომ თქვეს უარი ყოფილმა კონსულტანტებმა დავის გაგრძელებაზე? – იურისტი ზურაბ ცევხლაძე ამბობს, რომ მოწმეების გარეშე რთული იქნებოდა ამ დარღვევების დადასტურება.

“მორიგება საუკეთესო გამოსავალია, კანონმდებელიც  ამბობს ამას,” – დასძინა ზურაბ ცეცლაძემ.

მორიგება ხელფასის ნაწილობრივ ანაზღაურებაზე შედგა – “იალჩინ მარკეტი”ყოფილ თანამშრომლებს 1000-1000 ლარს გადაუხდის.

“მერე აღარ მინდაო ვეღარ იტყვით, იცოდეთ…” – მიმართა ორ მოსარჩელეს მოსამართლე სალიხ შაინიძემ. დღევანდელ პროცესს მხოლოდ ორი მოსარჩელე დაესწრო.

მოსამართლემ მოსარჩელეებს ასევე უთხრა, რომ ბაჟის საფასურიც დაუბრუნდებათ – 100 ლარი.

“ნაყინს შეჭამთ ალბათ ამით,” – დაასრულა მოსამართლემ ღიმილით და დარბაზიდან გავიდა.

როგორ აისახება დავის ასე დასრულება შრომით ურთიერთობებზე ზოგადად და ვინ ვერ დაეხმარა სამსახურიდან გათავისუფლებულებს ამჯერად? – ვკითხეთ პროფკავშირების იურისტს სასამართლო პროცესის დასრულების შემდეგ.

“რეალურად დამსაქმებელს ერთჯერადად მოუწევს ათი ათასი ლარის გადახდა. ეს ნიშნავს იმას, რომ იგივეს იგი სხვა ვითარებაში აღარ გააკეთებს, ეს არის შედეგი,” – აღნიშნა ზურაბ ცეცხლაძემ.

“ვინც მოიგო დავა, რა შეიცვალა? არაფერი იცვლება… მე ისევ კონსულტანტად ვმუშაობ უკვე სხვა მარკეტში, აღარ მინდა ამაზე საუბარი,” – ეს კიდევ ერთმა მოსარჩელემ, თამარ შარაძემ გვითხრა, ვიდრე ის სასამართლო შენობას დატოვებდა.

ბათუმელი გარემოვაჭრეები, რომლებიც მერიამ წერეთლის ქუჩიდან ავტოსადგურის შენობაში გადაიყვანა, პირობებით უკმაყოფილონი არიან. დღეს, 21 მაისს, ისინი მერიის წარმომადგენელს შეხვდნენ და სავაჭრო ადგილის შეცვლა მოითხოვეს. მოვაჭრეები ამბობენ, რომ ავტოსადგურის ტერიტორიაზე აგებულ სავაჭრო ცენტრში მყიდველი არ შედის, რის გამოც შემოსავლის გარეშე დარჩნენ.

ერთ-ერთი მოვაჭრე, ლია შაინიძე „ბათუმელებთან“ ამბობს, რომ ისინი მერთან შეხვედრას და პირობების შეცვლას მოითხოვენ.

„ვითხოვთ მერთან შეხვედრას, იქნებ უკეთესი გამოსავალი მოძებნოს. მოვიდეს და ნახოს, რომ აქ მყიდველი არ შემოდის. მუშაობა არ არის, როდემდე ვიქნებით ასე.

კლიენტი არ შემოდის, რადგან მიუდგომელი ადგილია, დახურულია სივრცე. ერთი მხრიდან სამშენებლო მასალები გვადგას, მეორე კუთხიდან – მიკროავტობუსები და არც ჩანს გარედან. არ გაამართლა ამ ადგილმა,“ – გვეუბნება ის.

ლია შაინიძე ამბობს, რომ თავდაპირველად შეთანხმება იყო იმაზე, რომ გარემოვაჭრეებს დაუთმობდნენ წინა ხედს რკინიგზის მხრიდან, სადაც განთავსდებოდა მოვაჭრეებისთვის ჯიხურები.

„შემდეგ არ ვიცი, რატომ მოგვცეს უკანა მხარე სამშენებლო მასალების ტერიტორიაზე. გამოდის, საწყობში ვზივართ. ავტოსადგურის წინა მხარეს თუ დავსხდებით, ხალხი დაგვინახავს და ვაჭრობაც იქნება.“

ავტოსადგურის ტერიტორიაზე მერიის მიერ მომზადებული სიის მიხედვით, 104 მოვაჭრეა, თუმცა, როგორც ლია შაინიძემ გვითხრა, ადგილზე მხოლოდ 20 მოვაჭრეა. „იძულებული არიან ქუჩა-ქუჩა იარონ, რომ საღამოს პურის ფული მიიტანონ. ჩვენ გვინდა კანონმორჩილი ვიყოთ, თუმცა არ გვინდა მშიერი დაგვირჩეს ოჯახი,“ – გვეუბნება ლია შაინიძე.

ლია შაინიძე ამბობს, რომ თუ მერია პირობებს არ შეცვლის, იძულებული იქნებიან, პერმანენტული აქციები დაიწყონ.

სადგურის ტერიტორიაზე გადასვლის შემდეგ გარემოვაჭრეებმა აქცია ორ მაისს გამართეს. ბათუმის მერიამ წერეთლის ქუჩის გათავისუფლება გარემოვაჭრეებისგან მიმდინარე წლის თებერვალში დაიწყო, რასაც გარემოვაჭრეების პროტესტი მოჰყვა.

ფემინისტების დამოუკიდებელი ჯგუფი  ბათუმის მერიასა და ბათუმის შოთა რუსთაველის სახელმწიფო უნივერსიტეტს მიმართავს. განცხადებაში ფემინისტების დამოუკიდებელი ჯგუფი ეხმიანება საპატიო ბათუმელის წოდების მინიჭებას იმ ადამიანისთვის, რომელიც ორი წლის წინ ბსუ-ს სტუდენტმა სექსუალურ შევიწროებაში დაადანაშაულა. ჯგუფი მოუწოდებს ბათუმის მერიასა და სახელმწიფო უნივერსიტეტს, ასევე იმ კომისიის წევრებს, რომელთა მხარდაჭერითაც მოხდა ამ წოდების მინიჭება – კარგად დაფიქრდნენ იმ ღირებულებებზე, რასაც „საპატიო ბათუმელის” წოდების მიღმა მოიაზრებენ.

საპატიო ბათუმელის წოდება 28 მაისს, „ბათუმობა 2019“-ზე ხუთ ადამიანს მიანიჭეს.

“საპატიო ბათუმელის წოდება მიენიჭა ადამიანს, ბათუმის შოთა რუსთაველის სახელობის სახელმწიფო უნივერსიტეტის პროფესორს, რომელსაც ორი წლის წინ სტუდენტი ქალი სექსუალურ შევიწროებაში ადანაშაულებდა. ცხადია, სექსუალური შევიწროების ბუნებიდან გამომდინარე, მისი სამართლებრივი პასუხისმგებლობის საკითხის დაყენება იმთავითვე რთული იყო, თუმცა, გამოძიება მალევე შეწყდა ფაქტების არარსებობის გამო…. რასაც წინ უძღოდა სტუდენტი ქალის გარდაცვალება  უბედური შემთხვევის შედეგად”, – წერს ფემინისტების დამოუკიდებელი ჯგუფი.

ფემინისტების დამოუკიდებელი ჯგუფს ასევე აინტერესებს, რა კრიტერიუმებით ხდება საპატიო ბათუმელის წოდებაზე წარდგენილი ადამიანების შეფასება:

ორი წლის წინ, ამავე საქმეზე ფემინისტების დამოუკიდებელმა ჯგუფმა, ასევე ქალთა მოძრაობამ, კავშირმა – “ქალების ინიციატივა თანასწორობისთვის”, ქალთა ინიციატივების მხარდამჭერმა ჯგუფმა (ვისგი); პლატფორმამ – “ქალები საქართველოდან”, საქართველოს ახალგაზრდა მწვანეებმა, „ქალთა მზერამ“ და „აუდიტორია 115-მა“, საჯარო განცხადება გაავრცელა.

ამავე თემაზე: 

2019 წლის პირველ სამ თვეში საქართველოში თავშესაფრის სტატუსის მიღება უცხო ქვეყნის 264-მა მოქალაქემ ითხოვა. შინაგან საქმეთა სამინისტროს სტატისტიკური მონაცემების მიხედვით, პირველ კვარტალში მხოლოდ სამ მოქალაქეს მიანიჭეს ლტოლვილის სტატუსი. აქედან ერთი რუსეთის მოქალაქეა, ორის მოქალაქეობა კი – დაუდგენელი, ისინი არასრულწლოვნები არიან.

სტატისტიკური მონაცემების მიხედვით, ყველაზე ხშირად საქართველოში ლტოლვილის სტატუსს ირანელები ითხოვენ. ჯამში 264 ადამიანიდან 117 ირანის მოქალაქეა. საქართველოში ლტოლვილის სტატუსი ევროკავშირის წევრი ქვეყნის – ნიდერლანდების მოქალაქემაც ითხოვა, თუმცა მას საქართველომ თავშესაფარი არ მისცა. საქართველოში ლტოლვილის სტატუსის მიღებას ძირითადად ერაყის, ბანგლადეშის, ინდოეთის, თურქეთის, სირიის მოქალაქეები ითხოვენ.

იანვარში, თებერვალსა და მარტში საქართველომ შემოსული განცხადებებიდან 137 ადამიანს უთხრა უარი ლტოლვილის სტატუსის მიღებაზე, 20 მოქალაქე კი, დროებითი განთავსების ცენტრში მოათავსა. ამავე პერიოდში საქართველოდან უცხო ქვეყნის 23 მოქალაქე გააძევეს.

შინაგან საქმეთა სამინისტრო აქვეყნებს რეადმისიის მონაცემებსაც, ანუ როცა საქართველოს მოქალაქე მიდის არალეგალურად უცხო ქვეყანაში, იქ დეპორტაციას უკეთებენ, საქართველოში ბრუნდება და აქ მხარდაჭერის სპეციალურ პროგრამაში ჩართვა სურს. რეადმისიის პროგრამაში ჩართვის სურვილი 2019 წლის პირველ კვარტალში სულ 795 საქართველოს მოქალაქეს გამოუთქვამს, მათგან ყველაზე მეტი – 364 ადამიანი გერმანიიდან არის დაბრუნებული, 102 – საფრანგეთიდან.

ამ თემაზე:

ბათუმში აღმოსავლეთ-დასავლეთის მეგობრობისა და მშვიდობის რალი გაიმართება, რომელმაც სტარტი გერმანიაში 11 მაისს აიღო – ინფორმაციას ამის შესახებ თურქეთის საკონსულო ავრცელებს.

აღმოსავლეთ-დასავლეთის მეგობრობისა და მშვიდობის რალი წელს მეცხრამეტედ იმართება. საკონსულოს ინფორმაციით, რალს თვალს ადევნებენ ევროპის წამყვანი სპორტული ჟურნალები, თურქული და გერმანული ტელეარხები.

ბათუმის წყლის ინფორმაციით, მილზე ჩასატარებელი ტექნიკური სამუშაოების გამო, შესაძლოა ხვალ, 21 მაისს, დილის საათებში დაფიქსირდეს წყლის ამღვრევის ფაქტი. “მსგავსი ფაქტის დაფიქსირების შემთხვევაში, ონკანი გააღეთ და წყალი ადინეთ რამდენიმე წუთით, სისტემიდან ამღვრეული წყლის გამოშვების მიზნით. ამღვრეული წყალი შეიცავს მხოლოდ დროთა განმავლობაში მილზე მიკრულ მინერალებს,” – წერს ბათუმის წყალი.

წყალმომარაგების ამღვრევის ფაქტი შესაძლოა დაფიქსირდეს: კლდიაშვილის, ყაზბეგის, მეტაქსას, ზუბალაშვილისა და ფალიაშვილის ქუჩებზე. ხოლო რუსთაველისა და ჭავჭავაძის ქუჩების მონაკვეთში შემდეგ ქუჩებზე: გრიბოედოვის ქუჩა; ლერმონტოვის ქუჩა; თაყაიშვილის ქუჩა; სელიმ ხიმშიაშვილის ქუჩა; ჰაიდარ აბაშიძის ქუჩა; მელიქიშვილის ქუჩა; 26 მაისის ქუჩა; ვაჟა-ფშაველას ქუჩა; ლუკა ასათიანის ქუჩა;

ასევე, გრიბოედოვის და ლუკა ასათიანის ქუჩების მონაკვეთში შემდეგ ქუჩებზე: გორგილაძის ქუჩა; ფარნავაზ მეფის ქუჩა; ახვლედიანის ქუჩა.

წუხელ სახელმწიფო უსაფრთხოების სამსახურმა 8 მოქმედი და 3 ყოფილი ფეხბურთელი დააკავა. „ვიტ ჯორჯიას“ ხუთი ფეხბურთელი ამ კლუბსა და ბათუმის „დინამოს“ შორის გამართული შეხვედრის დასრულების შემდეგ დააკავეს. სუს-ის მიერ დღეს გავრცელებულ განცხადებაში წერია: „უმაღლეს ლიგაში მოასპარეზე საფეხბურთო კლუბ „ვიტ ჯორჯიას“ მოსყიდულმა ფეხბურთელებმა, წინასწარი შეთანხმების საფუძველზე, საფეხბურთო კლუბ „ბათუმის დინამოსთან“ შეხვედრა ორბურთიანი სხვაობით დათმეს“. ბათუმის „დინამომ“ გუშინ „ვიტ ჯორჯიას“ 2:0 მოუგო.

გთავაზობთ ბლიცინტერვიუს ბათუმის „დინამოს“ სპორტულ დირექტორთან, ასლან ბალაძესთან.

• ბატონო ასლან, გუშინ ბათუმის „დინამოსთან“ თამაშის დასრულების შემდეგ „ვიტ ჯორჯიას“ 5 ფეხბურთელის დაკავება რას ნიშნავს თქვენთვის, როგორც ბათუმის „დინამოს“ სპორტული დირექტორისთვის? 

უბრალოდ, ეს არის დამთხვევა, მეტი არაფერი. ჩვენი თამაში დაემთხვა [ვიტ ჯორჯიასთან]. ბათუმის „დინამო“ არ არის არავითარ მაქინაციებში ჩართული, არც იყო და არც იქნება არასდროს. ეს არის გამორიცხული. ჩვენ ვგმობთ ასეთ რაღაცებს. ვინც ნახა ეს თამაში, ჩვენც გაოცებული ვიყავით – უბრალოდ, გამოძიება მიდიოდა, ეტყობა თავიდან ეს გუნდი იყო ეჭვმიტანილი, ვიტ ჯორჯიას ვგულისხმობ და დაემთხვა ჩვენს თამაშს.

• თქვენ გაეცანით სუს-ის განცხადებას?

ვიცი ეს ყველაფერი, გავიგე, წავიკითხე. უბრალოდ, ხდება ეს ყველაფერი… ჩვენ არ ვართ ის კლუბი, რომ ასეთ საქმეებში… კიდევ გიმეორებთ, ჩვენ ვითამაშეთ სუფთა ფეხბურთი. ვინც ნახა ეს თამაში, ყველა მიხვდება, რა მონდომება იყო ბათუმის „დინამოს“ მხრიდან. უბრალოდ, დამთხვევა იყო – „ვიტ ჯორჯიას“ რომ ეთამაშა სხვა გუნდთან, იქ მოხდებოდა ეს ამბავი. ეტყობა მიჰყვნენ ბოლომდე ამ კლუბს, შსს იყო თუ სუს-ი, არ ვიცი, ვინც იყო და დაემთხვა ჩვენს თამაშს. ჩვენ ამ სიტუაციაში არავითარი წვლილი არ გვაქვს.

მე როგორც წავიკითხე, იმიტომ ახსენეს ჩვენი გუნდი, რომ ბოლო მომენტშიც აინტერესებდათ იმ გუნდის მოქმედება და იქვე გასახდელში მოხდა [დაკავება]. ჩემთვის გასაკვირი იყო, რატომ არ მოხდა ეს [დაკავება] თამაშამდე, თუ იცოდნენ. ალბათ ბოლომდე უნდოდათ სიტუაციაში გარკვევა.

• თუმცა, სუს-ის მიერ გავრცელებულ განცხადებაში პირდაპირ წერია, რომ გუშინდელი „თამაშის ორბურთიანი სხვაობით დასრულება წინასწარი იყო გადაწყვეტილი“.

კიდევ ვიმეორებ, ბათუმის „დინამოსთან“ ეს იყო დამთხვევა. უბრალოდ, ამ გუნდს ჩვენთან მოუწია თამაში. ჩვენ ვითამაშეთ სუფთად. სხვათა შორის, ძალიან მძიმე თამაში იყო. ის გოლები, რომლებიც გავიტანეთ და გამარჯვებამდე მივიყვანეთ თამაში, არავითარ ეჭვს არ ბადებდა. „ვიტ ჯორჯიას“ ამბავი ჩვენი საქმე არ არის. იცოდეს სულ ყველამ, რომ ბათუმის „დინამო“ ამ საქმეში არ იყო და არც იქნება მომავალში. ჩვენ ვთამაშობთ ფეხბურთს, გვიყვარს მაყურებელი და ქართული ფეხბურთი.

ჩვენ  ეჭვი რომ შეგვპარვოდა გუშინ რამეში, თამაში არ ჩატარდებოდა. ჩვენთვისაც მოულოდნელი იყო, როცა ის ხალხი შემოვიდა. შევიდნენ გასახდელში, არავითარი ფორიაქი არ ყოფილა, გაესაუბრნენ, დაადეს ხელბორკილები და გაიყვანეს.

• თუ დადგინდება, რომ თამაშები გაყიდულია, ამას რა გაგრძელება მოჰყვება კლუბისთვის, ფეხბურთელებისთვის?

მე მომხრე ვარ იმის, რომ მკაცრად დაისაჯოს ის ხალხი, ვინც ამაში მონაწილეობს ან მონაწილეობას ხელს უწყობს. თუ დამტკიცდა, რომ ეს ნამდვილი ამბავია, მოქმედი ფეხბურთელები, ვინც მონაწილეობდნენ, მიიღებენ დისკვალიფიკაციას. ევროპაშიც იყო ასეთი, მსოფლიოშიც მოდებული არიან ეს „ტოტალიზატორშიკები“ და ბევრი ქვეყანა იყენებს ამ მეთოდს. სადამსჯელო მოქმედებები არის სხვადასხვა – მაგალითად, კლუბი იხსნება გათამაშებიდან. ფეხბურთელები ისჯებიან. ასევეა ჯარიმდება კლუბი.

გააჩნია, რას ადგენს გამოძიება.

საავტომობილო გზების დეპარტამენტის  ცნობით, 22 მაისიდან 7 ივნისამდე, ეტაპობრივად, ზაფხულის სეზონის დადგომასთან დაკავშირებული პროფილაქტიკური სამუშაოების გამო, გორის, ქობულეთის შემოვლითი გზისა და ჩაქვი-მახინჯაურის გვირაბებში მოძრაობა დროებით შეიზღუდება.

[checklist]

•  22 მაისის 08:00 საათიდან 23 მაისის 08:00 საათამდე იკრძალება ყველა სახის ავტოტრანსპორტის მოძრაობა ქობულეთის შემოვლითი საავტომობილო გზის 24-ე და 28-ე კმ-ებზე მდებარე საავტომობილო გვირაბებში. [/checklist]

დეპარტამენტის ინფორმაციით, საავტომობილო გვირაბების ჩაკეტვის პერიოდში, ფოთიდან მოძრავი ავტოტრანსპორტის მოძრაობა გადაერთვება შიდასახელმწიფოებრივი მნიშვნელობის ქობულეთის შემოვლითი საავტომობილო გზის 13-ე კმ-ზე არსებული სატრანსპორტო კვანძიდან, შიდასახელმწიფოებრივი მნიშვნელობის საჯავახო-ჩოხატაური-ოზურგეთი-ქობულეთის და საერთაშორისო მნიშვნელობის სენაკი-ფოთი-სარფის საავტომობილო გზების გავლით.

სარფიდან მოძრავი ავტოტრანსპორტის მოძრაობა კი გადაერთვება შიდასახელმწიფოებრივი მნიშვნელობის ქობულეთის შემოვლითი საავტომობილო გზის 30-ე კმ-ზე არსებული სატრანსპორტო კვანძიდან, საერთაშორისო მნიშვნელობის სენაკი-ფოთი-სარფის საავტომობილო გზის გავლით.

[checklist]

• 29 მაისის 08:00 საათიდან 31 მაისის 08:00 საათამდე, ყველა სახის ავტოტრანსპორტის მოძრაობა მოძრაობა იკრძალება საერთაშორისო მნიშვნელობის სენაკი-ფოთი-სარფის საავტომობილო გზის 92-ე კმ-ზე მდებარე ჩაქვი-მახინჯაურის საავტომობილო გვირაბში – ქობულეთი-ბათუმის მიმართულებაზე;
• 5 ივნისის 08:00 საათიდან 7 ივნისის 08:00 საათამდე კი, ამავე [ჩაქვი-მახინჯაურის] გვირაბში – ბათუმი-ქობულეთის მიმართულებაზე.

[/checklist]

ჩაქვი-მახინჯაურის საავტომობილო გვირაბის ქობულეთი-ბათუმის მიმართულების ჩაკეტვის პერიოდში ავტოტრანსპორტის ნაკადი გადაერთვება გვირაბის ბათუმი-ქობულეთის მიმართულებაზე. ხოლო ბათუმი-ქობულეთის მიმართულების ჩაკეტვის პერიოდში – გვირაბის ქობულეთი-ბათუმის მიმართულებაზე.

• საერთაშორისო მნიშვნელობის თბილისი–სენაკი–ლესელიძის საავტომობილო გზის 88-ე კმ-ზე მდებარე გორის საავტომობილო გვირაბში, ყველა სახის ავტოტრანსპორტის მოძრაობა იკრძალება 2019 წლის 22 მაისის 08:00 სთ-დან 24 მაისის 08:00 სთ-მდე, გვირაბის თბილისი-სენაკის მიმართულებაზე; 
• ხოლო, 2019 წლის 29 მაისის 08:00 სთ-დან 31 მაისის 08:00 სთ-მდე, გორის გვირაბის სენაკი-თბილისის მიმართულებაზე.

საავტომობილო გვირაბის თბილისი-სენაკის მიმართულების ჩაკეტვის პერიოდში ავტოტრანსპორტის ნაკადი გადაერთვება გვირაბის სენაკი-თბილისის მიმართულებაზე, ხოლო სენაკი-თბილისის მიმართულება გადაერთვება  შიდასახელმწიფოებრივი მნიშვნელობის გორის გვირაბების შემოსავლელ საავტომობილო გზაზე.

საავტომობილო გვირაბის სენაკი-თბილისის მიმართულების ჩაკეტვის პერიოდში ავტოტრანსპორტის ნაკადი გადაერთვება შიდასახელმწიფოებრივი მნიშვნელობის გორის გვირაბების შემოსავლელ საავტომობილო გზაზე.

ივენთკომპანია „კლიკი“ ბათუმში რუსეთში მცხოვრები მომღერლის, ქეთა თოფურიასა და A-Studio-ს  ჩამოყვანას აპირებს. განცხადება კონცერტის შესახებ განთავსებულია კლუბ „UP2U ბათუმის“ ფეისბუქგვერდზე.

ამ განცხადების თანახმად, ქეთა თოფურია და ჯგუფი A-Studio ბათუმში 27 ივლისს იმღერებს.

ქეთა თოფურია რამდენიმე წელია რაც რუსეთში ცხოვრობს და ცნობილია მისი ლოიალური დამოკიდებულება  რუსეთის პრეზიდენტის, პუტინის მიმართ. ქეთა თოფურიამ  და ჯგუფმა  A-Studio-მ 2018 წელს პუტინის მხარდამჭერ კლიპში, სახელად „გზამკვლევი ვარსკვლავი“, იმღერეს. კლიპი ვლადიმერ პუტინის მხარდამჭერების Team Putin-ის კამპანიის ფარგლებში შეიქმნა.

მომღერალს არაერთხელ გამოუხატავს თავისი პოზიცია რუსულ-ქართულ ურთიერთობებთან დაკავშირებითაც, 2018 წლის რუსეთის საპრეზიდენტო არჩევნების წინ კი თოფურიამ ინტსაგრამზე რუსეთის მოსახლეობას არჩევნებში მონაწილეობისკენ მოუწოდა და კომენტარებში აღნიშნა, რომ პუტინის არ არჩევის შემთხვევაში რუსეთში ცხოვრება აუტანელი გახდებოდა.

„ბათუმელების“ კითხვაზე, რატომ გააკეთეს არჩევანი A-Studio-სა და ქეთა თოფურიაზე და იციან თუ არა, რომ ისინი პუტინის მხარდამჭერ კლიპში მონაწილეობდნენ,  კლუბის მენეჯერი ირაკლი თირანიშვილი გვეუბნება: „ჩვენ ვაკეთებთ კონცერტებს და პოლიტიკას არ ვეხებით, დიდად არ გვაინტერესებს. ვისაც მოსწონს ის მოვა, ვისაც არ მოსწონს – არა“.

ირაკლი თირანიშვილი ამბობს, რომ რუსეთი ოკუპანტია, მაგრამ ამავე დროს დასძენს, რომ ბიზნესი უფრო მნიშვნელოვანია.

„ამ საკითხს ბიზნესის ჭრილიდან ვუყურებთ.  ძალიან ბევრის სურვილია მოუსმინოს ამ ჯგუფს, მიუხედავად იმისა, რაც მოხდა ქვეყანაში (აგვისტოს ომი).  ჩვენ ვმუშაობთ ტურისტულ სეგმენტზე, ბათუმი არის ტურისტული ზონა და აქ არ არიან მხოლოდ ბათუმელები და ქართველები,“ – გვითხრა კლუბის მენეჯერმა.

კითხვაზე, თუ ვისი მხრიდან იყო შეკვეთა, მენეჯერი პიროვნებებს და კომპანიებს არ აკონკრეტებს, თუმცა ამბობს, რომ ქეთა თოფურიასთან მისი მეგობრები მეგობრობენ და მათი სურვილი იყო ჯგუფის ბათუმში ჩამოსვლა:

„არიან სპონსორები, ვინც შეგვიკვეთა, ჩემი მეგობრები არიან, ჩვენ მხოლოდ დავუკავშირდით და ჩამოგვყავს“.

კითხვაზე, რას ფიქრობს იმაზე, რომ ქეთა თოფურია პუტინის მხარდამჭერ ჰიმნს მღერის, ირაკლი თირანიშვილი ამბობს: „არ ვიცით რატომ უმღერა, ალბათ რაღაც დავალება ჰქონდათ. ჩვენ ხომ არ ვიცით, რა მოხდა იქ“.

სუს-ის მიერ 8 მოქმედი და 3 ყოფილი ფეხბურთელის დაკავების შესახებ გავრცელებულ ინფორმაციას ეხმაურება საქართველოს ფეხბურთის ეროვნული ფედერაცია. სუს-მა წუხელ, 19 მაისს, „ვიტ ჯორჯიას“ ხუთი, ლანჩხუთის „გურიას“ – ორი, „ჭიათურის“ ერთი ფეხბურთელი დააკავა. სუს-ის ინფორმაციით, ეს ფეხბურთელები საფეხბურთო მატჩებს ყიდდნენ.

ფეხბურთის ფედერაციის განცხადებას უცვლელად გთავაზობთ:

სახელმწიფო უსაფრთხოების სამსახურის ანტიკორუფციული სააგენტოს მიერ ჩატარდა სპეცოპერაცია, რომლის შედეგადაც ბრალდებულის სახით დაკავებულია თბილისის „ვიტ ჯორჯიას“ ხუთი, ლანჩხუთის „გურიას“ ორი, „ჭიათურის“ ერთი და ასევე სამი ყოფილი მოთამაშე. საქმე ეხება მათ მიერ მატჩის შედეგსა ან მსვლელობაზე მანიპულირების მცდელობას.

საყოველთაოდ ცნობილია საქართველოს ფეხბურთის ფედერაციის შეურიგებელი პოზიცია მატჩების გარიგებასთან დაკავშირებით. სფფ-ის შესაბამისი სამსახურების მუშაობის შედეგად აქამდეც მოხდა გამოვლენილი მოთამაშეებისა თუ სხვა პირების ჩამოშორება საფეხბურთო საქმიანობიდან სხვადასხვა ვადით. ამ საკითხის სპეციფიკურობიდან გამომდინარე, ყოველთვის აუცილებელია პროცედურების მკაცრი დაცვა და ზოგჯერ სპორტული სამართალი არ არის დანაშაულის პრევენციისთვის საკმარისი ბერკეტი.

სავარაუდოდ, კვლავ ჰქონდა ადგილი მატჩის შედეგსა ან მსვლელობაზე მანიპულაციის ცალკეულ შემთხვევებს, რომლებზეც სახელმწიფო უსაფრთხოების სამსახურმა სპეციალური განცხადება და შესაბამისი მასალა გაავრცელა. სამწუხაროდ, ყველა სრულად ვერ ითავისებს, რომ მსგავსი მოქმედება, რომელიც შეიცავს დანაშაულის ნიშნებს, უარყოფით გავლენას ახდენს არამხოლოდ კონკრეტული გუნდის სახელსა და იმიჯზე, არამედ მთელ საფეხბურთო ოჯახზე.

მსგავსი ფაქტების აღმოსაფხვრელად, სფფ-სა და შსს-ს შორის გაფორმებული ურთიერთთანამშრომლობის მემორანდუმის საფუძველზე საქართველოს ფეხბურთის ფედერაცია აგრძელებს თანამშრომლობას საგამოძიებო უწყებებთან. ამ პროცესის პარალელურად სფფ-ის იურიდიული ორგანოები საკუთარი კომპეტენციისა და უფლებამოსილების ფარგლებში დამატებით იმსჯელებენ, რათა არც ერთი მსგავსი დანაშაული არ დარჩეს სათანადო რეაგირების გარეშე.

სახელმწიფო უსაფრთხოების სამსახურის მიერ გავრცელებული ინფორმაციის მიხედვით, გუშინ, 19 მაისს, „ვიტ ჯორჯიასა“ და ბათუმის „დინამოს“ შორის გამართული შეხვედრის ბედი წინასწარ იყო გადაწყვეტილი.

„2019 წლის 19 მაისს, ორგანიზებული დანაშაულებრივი ჯგუფის წევრების მიერ, საქართველოს ეროვნული საფეხბურთო ჩემპიონატის უმაღლეს ლიგაში მოასპარეზე საფეხბურთო კლუბ „ვიტ ჯორჯიას“ მოსყიდულმა ფეხბურთელებმა, წინასწარი შეთანხმების საფუძველზე, საფეხბურთო კლუბ „ბათუმის დინამოსთან“ შეხვედრა ორბურთიანი სხვაობით დათმეს“, – წერია სუს-ის მიერ გავრცელებულ განცხადებაში.

სახელმწიფო უსაფრთხოების სამსახურმა ცოტა ხნის წინ გაავრცელა ერთ-ერთ სასტუმროში გადაღებული ფარული ჩანაწერები, რომლის მიხედვითაც, ექვსი პირი ადგენს საფეხბურთო მატჩების „დათმობის წესებს“.

კადრებში ჩანს თანხის გადაცემის პროცესიც. თითოეული მათგანი სავარაუდოდ 2 ათას დოლარს იღებს.

ახლახან სახელმწიფო უსაფრთხოების სამსახურა გაავრცელა განცხადება, რაც წუხელ ჩატარებულ სპეცოპერაციას უკავშირდება. სუს-მა წუხელ სხვადასხვა ქალაქში ფეხბურთელები დააკავა.

განცხადებას უცვლელად გთავაზობთ:

„ვიტ ჯორჯიას“ 5 ფეხბურთელი დააკავეს, „ლანჩხუთის გურიის“ – 2 ფეხბურთელი.

საქართველოს ფინანსთა სამინისტროს შემოსავლების სამსახურის ინფორმაციით, 14-17 მაისს საბაჟო გამშვებ პუნქტებში – „სარფი“ და „წითელი ხიდი“ არადეკლარირებული სიგარეტის ქვეყნის საზღვარზე კანონდარღვევით შემოტანის მცდელობის ფაქტები აღიკვეთა.

„შემოსავლების სამსახურის მებაჟე ოფიცრებმა, ეჭვის საფუძველზე,  საქართველოსა და აზერბაიჯანის მოქალაქეების ფიზიკური დათვალიერების შედეგად, ჯამში, 7 480 ღერი არადეკლარირებული სიგარეტი აღმოაჩინეს,“ – ნათქვამია შემოსავლების სამსახურის განცხადებაში.

საქართველოს საგადასახადო კოდექსის 289-ე მუხლის მე-14 ნაწილის შესაბამისად, კანონდამრღვევ მოქალაქეებს ჩამოერთვათ საქონელი და სანქციის სახით,  შეეფარდათ ფულადი ჯარიმა, ათას-ათასი  ლარის ოდენობით.

გუშინ, 19 მაისს, ბათუმის „დინამოსა“ და „ვიტ ჯორჯიას“ მატჩის დასრულების შემდგ, ანგისის ბაზაზე ფეხბურთელები დააკავეს. „ვიტ ჯორჯიას“ ფეხბურთელების დაკავების შესახებ ინფორმაცია აჭარის ტელევიზიამ გაავრცელა. „ბათუმელებს“ სუს-ის პრესცენტრში ასევე დაუდასტურეს, რომ ფეხბურთელები სუს-ის ანტიკორუფციულმა სააგენტომ დააკავა.

აჭარის ტელევიზიის ინფორმაციით, ფეხბურთელებს სავარაუდოდ მატჩების გაყიდვას ედავებიან. დაკავებულია 5 ფეხბურთელი.

„ვიტ ჯორჯიას“ გუშინ ბათუმის „დინამოსთან“ გასვლითი შეხვედრა ჰქონდა და დამარცხდა 2:0

ამ თამაშის შემდეგ კლუბი ეროვნულ ლიგაში ბოლოდან მეორე პოზიციაზეა. ბათუმის „დინამო“ კი, ჯერჯერობით, ლიგის ფავორიტია.

საქართველოს ფეხბურთის ფედერაციაში, ისე როგორც სუს-ში აცხადებენ, რომ ფეხბურთელების დაკავებაზე განცხადებას მალე გაავრცელებენ.

ხულოს საოლქო საარჩევნო კომისიაში ხმები უკვე დათვლილია. წინასწარი მონაცემებით, მუნიციპალიტეტის მერის პოსტს ვახტანგ ბერიძე დაიკავებს, „ქართული ოცნების“ კანდიდატი.

ხულოს საოლქო საარჩევნო კომისიის ცნობით, მთავარ კონკურენტებს, „ოცნებისა“ და „ნაციონალური მოძრაობის“ კანდიდატებს შორის ხმები ასე გადანაწილდა:

[checklist]

• ვახტანგ ბერიძე [„ქართული ოცნება“]  – 70,91 % [9 909 ხმა]
• ირაკლი ჯორბენაძე [„ნაციონალური მოძრაობა“] –  23,74 % [3 318]

[/checklist]

19 მაისის არჩევნებზე ხულოში ხმა მისცა 14 163 ამომრჩეველმა, აქედან 187 ხმა ბათილად იქნა ცნობილი. ოლქში სულ 22 საჩივარია შესული, მათგან 18 „ნაციონალურმა მოძრაობამ“ დაწერა, ხოლო 4 – „სამართლიანმა არჩევნებმა“.

3,63 პროცენტი მიიღო „ქართული ოცნების“ კანდიდატის სეხნიამ, ვახტანგ ბერიძემ,  რომელიც  „მოძრაობა სახელმწიფო ხალხისთვის” კანდიდატი იყო. ხულოში ამბობენ, რომ მას არ ჰქონია აქტიური კომუნიკაცია ამომრჩეველთან და შესაძლოა მიღებული შედეგის მიზეზი ისაა, რომ იგი ამომრჩეველმა „ოცნების“ კანდიდატად მიიჩნია. 

ხულოს მუნიციპალიტეტში არჩევნები მას შემდეგ დაინიშნა, რაც პირდაპირი წესით არჩეული მერი გოჩა მელაძე 2018 წლის 17 ოქტომბერს თანამდებობიდან გადადგა.

„ხულოში, შემოსასვლელში, არის ძალიან ლამაზი სოფელი, ჩაო. ჩაო ნიშნავს როგორც გამარჯობას, ისე დამშვიდობებას და იმ დესანტს, რომელიც ნაციონალურმა მოძრაობამ აქ გადმოასხა და გარკვეული ილუზიები შეუქმნეს, მათ შორის მათ პარტიულ ხელმძღვანელებსაც, რომ აქ ნდობის მოპოვებას შეძლებდნენ, ეხლა ის დროა  ჩაიარონ ამ სოფელში ბოლოს, ახლა უკვე დამშვიდობების დრო არის და მინდა მათ დავპირდე, რომ ჩვენი ხელისუფლების პირობებში ისინი ვერასდროს ვერ შეძლებენ მათი მეთოდებით და იმ ბინძური მეთოდებით, რომელსაც ჩვენ დღის განმავლობაში გვაბრალებდნენ…

თქვენ ნახეთ ის გავრცელებული ჩანაწერები, სადაც პირდაპირ მიუთითებდნენ დესტაბილიზაციაზე, მათ განზრახვაზე, რომ რეგიონში შექმნან დესტაბილიზაცია, დაძაბულობის ფონი, ხალხი დააშინონ და შემდეგ უკვე ამ დაშინების ფონზე ხალხთან მიმართებაში გააკეთონ გარკვეული მოქმედებები. ჩვენ დღეს არ დავუშვით, ხალხმა მიიღო გადაწყვეტილება“ – განაცხადა აჭარის მთავრობის თავმჯდომარემ, თორნიკე რიჟვაძემ საზოგადოებრივი მაუწყებლის აჭარის ტელევიზიისა და რადიოს პირდაპირ ჩართვაში.

მან ასევე აღნიშნა, რომ ხულოს მუნიციპალიტეტში დაიბადა, ცხოვრობდა სამი წელი და მისთვის მნიშვნელოვანი იყო, მმართველი პარტიის გამარჯვება აქ ყოფილიყო დამაჯერებელი.

წინასწარი მონაცემებით, ხულოში მერის არჩევნებს „ოცნების“ კანდიდატი, ვახტანგ ბერიძე იგებს. 19 მაისის არჩევნებზე ხულოში ხმა მისცა 14 051 ამომრჩეველმა, რაც ამომრჩეველთა 52 პროცენტია.