ხულოს არჩეული მერი გადადგა – ხელისუფლება ინფორმაციას არ ასაჯაროებს


„ბათუმელების“ ინფორმაციით, ხულოს მერი გოჩა მელაძე გადადგა. ამ ინფორმაციის გადამოწმებას „ბათუმელები“ დღეს დილიდან ცდილობდა, მაგრამ ყველა ოფიციალური პირი თუ უწყება ბათუმში, ვისაც შეიძლება სცოდნოდა არჩეული მერის გადადგომაზე, ერთხმად აცხადებდნენ, რომ „ინფორმაცია ჩვენგან გაიგეს“.

გოჩა მელაძის გადადგომის შესახებ ინფორმაცია „ბათუმელებს“ ახლახან ერთ-ერთმა ინფორმირებულმა პირმა დაუდასტურა.

თავად ხულოს მერიის ადმინისტრაციაში კი გაურკვევლობაში არიან – მუნიციპალიტეტში არაერთი თანამდებობის პირი არაოფიციალურ საუბარში აცხადებს, რომ გადადგა არა მხოლოდ მერი გოჩა მელაძე, არამედ მისი პირველი მოადგილე ლაშა ბოლქვაძეც. თუმცა ეს საჯარო მოხელეები დასძენენ, რომ მათ „გადადგომის დამადასტურებელი დოკუმენტი არ უნახავთ“.

თავად ხულოს მერი და მისი პირველი მოადგილე სატელეფონო ზარებს არ პასუხობენ. ოფიციალური ინფორმაციით, ხულოს მერი 31 ოქტომბრამდე შვებულებაში იმყოფება. ამ დროის განმავლობაში მერის მოვალეობას სწორედ ლაშა ბოლქვაძე შეასრულებს, თუმცა, როგორც ხულოს მერიაში ამბობენ, ეს იქამდე, ვიდრე მას შემცვლელს მოუძებნიან.

რაც შეეხება აჭარის მთავრობას, აქ ხულოს მერის გადადგომას ჯერ არ ასაჯაროებენ, უფრო უარყოფენ. კანონმდებლობის თანახმად, აჭარის მთავრობას არც აქვს ბერკეტი არჩეული მერი გადააყენოს.

ხულოს მერი რომ აუცილებად შეიცვლებოდა პირველად მაშინ ითქვა, როდესაც აჭარის მთავრობის თავმჯდომარედ თორნიკე რიჟვაძე დაინიშნა. მაშინ ითქვა ისიც, რომ ხულოსა და ბათუმის მერები აუცილებლად დატოვებდნენ თანამდებობას. თუმცა, მაშინ ეს ინფორმაცია არ დადასტურდა.

დღეის მდგომარეობით ბათუმის მერი ლაშა კომახიძე თანამდებობაზეა.

ხულოს მერი მუნიციპალიტეტში იყო საპრეზიდენტო არჩევნებში მართველი გუნდის მხარდაჭერილი კანდიდატის – სალომე ზურაბიშვილის საარჩევნო შტაბის ხელმძღვანელიც.

2017 წლის თვითმმართველობის არჩევნების შემდეგ, დღეის მდგომარეობით, თანამდებობა დატოვა სამი მუნიციპალიტეტის მერმა.

მარნეულის მერი პროკურატურამ დააკავა. თემურ აბაზოვს ბრალი ედება მოქალაქის მიმართ ჯგუფურად განხორციელებულ არაადამიანურ და დამამცირებელ მოპყრობაში. მას უფლებამოსილება აქვს შეჩერებული.

გამოძიება ქრთამის აღების ფაქტზე მიმდინარეობს ზუგდიდის მერის – ლაშა გოგიას მიმართაც, მან თანამდებობა სკანდალურად დატოვა.

ჭიათურის მერმა პაატა ნადირაძემ თანამდებობიდან წასვლამდე თქვა: “მე არაერთხელ ვეცადე დამერეგულირებინა ურთიერთობები საკრებულოს ბომონდთან, მაჟორიტარ დეპუტატთან, პოლიციის უფროსთან, სხვადასხვა ძალისმიერ სტრუქტურებთან, მაგრამ ამაოდ… ამ რეალობაში მიზანშეუწონლად მიმაჩნია, დავრჩე თანამდებობაზე, რადგან ჩასაფრებების, ღალატის, პროვოკაციის არც გაძლება შემიძლია და არც გადატანა”.

ხულოს მერს ჯერ არ დაუსახელებია ოფიციალური მიზეზი, თუ რამ აიძულა თანამდებობის დატოვება.

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან