ფემინისტების დამოუკიდებელი ჯგუფი ბათუმის მერიასა და ბათუმის შოთა რუსთაველის სახელმწიფო უნივერსიტეტს მიმართავს. განცხადებაში ფემინისტების დამოუკიდებელი ჯგუფი ეხმიანება საპატიო ბათუმელის წოდების მინიჭებას იმ ადამიანისთვის, რომელიც ორი წლის წინ ბსუ-ს სტუდენტმა სექსუალურ შევიწროებაში დაადანაშაულა. ჯგუფი მოუწოდებს ბათუმის მერიასა და სახელმწიფო უნივერსიტეტს, ასევე იმ კომისიის წევრებს, რომელთა მხარდაჭერითაც მოხდა ამ წოდების მინიჭება – კარგად დაფიქრდნენ იმ ღირებულებებზე, რასაც „საპატიო ბათუმელის” წოდების მიღმა მოიაზრებენ.
საპატიო ბათუმელის წოდება 28 მაისს, „ბათუმობა 2019“-ზე ხუთ ადამიანს მიანიჭეს.
“საპატიო ბათუმელის წოდება მიენიჭა ადამიანს, ბათუმის შოთა რუსთაველის სახელობის სახელმწიფო უნივერსიტეტის პროფესორს, რომელსაც ორი წლის წინ სტუდენტი ქალი სექსუალურ შევიწროებაში ადანაშაულებდა. ცხადია, სექსუალური შევიწროების ბუნებიდან გამომდინარე, მისი სამართლებრივი პასუხისმგებლობის საკითხის დაყენება იმთავითვე რთული იყო, თუმცა, გამოძიება მალევე შეწყდა ფაქტების არარსებობის გამო…. რასაც წინ უძღოდა სტუდენტი ქალის გარდაცვალება უბედური შემთხვევის შედეგად”, – წერს ფემინისტების დამოუკიდებელი ჯგუფი.
ფემინისტების დამოუკიდებელი ჯგუფს ასევე აინტერესებს, რა კრიტერიუმებით ხდება საპატიო ბათუმელის წოდებაზე წარდგენილი ადამიანების შეფასება:
„ამ კონკრეტული შემთხვევის მაგალითზე, საპატიო ბათუმელის წოდება ატარებს სწორედ იმ მესიჯს, რომ:
1. ქალის მიმართ სექსუალური შევიწროების განხორციელება არ არყევს „საპატიო მამაკაცის“ იმიჯს და როგორც ფაქტები ცხადყოფს, პირიქით, აძლიერებს მას;
2. ქალაქის ხელმძღვანელობისა და სახელმწიფო უნივერსიტეტისთვის, ქალის მიმართ ჩადენილი დანაშაული ნორმიდან გადახვევა არ არის.
ხელისუფლებისა და სახელმწიფო სასწავლო დაწესებულების მხრიდან სექსუალური შევიწროების საკითხის ამგვარი უგულებელყოფა განსაკუთრებით უხერხულია გლობალური Me Too კამპანიის ფონზე. ეს შემთხვევა ცდება ერთი კონკრეტული დანაშაულის ფარგლებს და ქალთა მიმართ ძალადობის სისტემური და ინსტუციონალიზებული კვლავწარმოების თვალსაჩინო მაგალითია”.
ორი წლის წინ, ამავე საქმეზე ფემინისტების დამოუკიდებელმა ჯგუფმა, ასევე ქალთა მოძრაობამ, კავშირმა – “ქალების ინიციატივა თანასწორობისთვის”, ქალთა ინიციატივების მხარდამჭერმა ჯგუფმა (ვისგი); პლატფორმამ – “ქალები საქართველოდან”, საქართველოს ახალგაზრდა მწვანეებმა, „ქალთა მზერამ“ და „აუდიტორია 115-მა“, საჯარო განცხადება გაავრცელა.
ამავე თემაზე:
