Batumelebi

გამოძიების ვერსიით დაკავებულმა 4 ივლისს,ბათუმში, 6 მაისის პარკში, დანით სამი ჭრილობა მიაყენა 17 წლის გოგონას  და შემთხვევის ადგილიდან მიიმალა.

სამართალდამცველებმა ბრალდებულლი რამდენიმე საათში,  ზესტაფონში დააკავეს. გოგონა საავადმყოფოშია გადაყვანილი. 

მაღალი ხარისხის, გამორჩეული ვიზუალისა და მაქსიმალური კომფორტის ძიებით კომპანიამ წარმოადგინა ავეჯის მწარმოებელი ისეთი მსოფლიო ბრენდები, როგორებიცაა: Hülsta,  Now! By Hülsta,  KOINOR,  Freistil by ROLF BENZ,  Gautier,  VONDOM,  Life,  Désirée,  Ozzio, Hacker.

განათების სფეროში კი წარმოდგენილია ახალი ნათების პარტნიორი ბრენდების უახლესი და საუკეთესო მოდელები, როგორებიცაა: Artemide, Kolarz, Linealight, Deltalight, Philips, Flos, Prolicht, Fumagali…
ფორუმი განასხვავებს ევროპულ ბრენდებსა და „დამზადებულია ევროპაში“ იარლიყს.

ფორუმში წარმოდგენილი  ბრენდების პროდუქცია იწარმოება გერმანიაში, საფრანგეთში, იტალიაში, ესპანეთსა და ჰოლანდიაში.

პატიმრები რედაქციაში წერილებს გვწერენ მხოლოდ ბათუმის მესამე დაწესებულებიდან. ამბობენ,  რომ  არ აქვთ საჭირო მედიკამენტები, პრეტენზიები აქვთ ე.წ. ანტივანდალურ საკნებში განთავსებასთან დაკავშირებით… როგორ ფიქრობთ მე-3 დაწესებულებიდან რატომ იგზავნება ყველაზე მეტი წერილი პატიმრების, სადაც ძირითად ისინი ცუდ პირობებზე საუბრობენ?

ეს დაწესებულება არის მაღალი რისკის პატიმრებისთვის, ჩვენ ჩასაფრებულის პოზიციიდან არც ერთი პატიმრის მიმართ არ ვართ, პირიქით, ჩვენ მაქსიმალურად ვცდილობთ კომუნიკაცია გვქონდეს ამ ადამიანებთან. თუ ისინი ღირსეულად იხდიან სასჯელს, რაც სასამართლომ მიუსაჯა, ჩვენ მაქსიმალურად ვცდილობთ ხელი შევუწყოთ  და შევუქმნათ სასჯელის მოხდის ღირსეული პირობები. ამ დაწესებულებაში ფაქტობრივად არიან უმრავლესობა ის პატიმრები, რომლებიც მუდმივად არღვევენ რეჟიმს, რომლებიც მუდმივად არღვევენ სხვა პატიმრების უფლებებს. მერწმუნეთ, თითონ პატიმრებიც შეწუხებული არიან იმ კატეგორიის პატიმრებისგან, რომლებიც ახლა აქ იმყოფებიან. არ ემორჩილებიან დაწესებულების თანამშრომლების  კანონიერ მოთხოვნებს. შესაბამისად, ჩვენ გვიწევს ამ ადამიანების იზოლირება ცალკე დაწესებულებაში.

ასეთი  მაღალი რისკის  პატიმრები გადმოგვყავს ბათუმში, სადაც ეს ადამიანები არიან იზოლირებულები სხვა დანარჩენი პატიმრებისგან და აქ იხდიან სასჯელს.  ის პირობები, რასაც თქვენ მეუბნებით, რომ არის სიცხე, არის უჰაერობა… ინდივიდუალურად, ყველა საკანში დავამონტაჟეთ კონდიცირების სისტემა, მაქსიმალურად ყოველ დღე ვცდილობთ  გავაუმჯობესოთ მათი საცხოვრებელი პირობები. შევდივართ მათ მდგომარეობაში, სეზონზე მოგეხსენებათ ბათუმში ძალიან ცხელა, 10-12 კვადრატულ მეტრში მესმის რომ გაუსაძლისი ხდება ყოფა. მე მესმის მათი, ეს რომ გავითვალისწინეთ იმიტომ დავამონტაჟეთ კონდიცირების სისტემები და საშუალება მივეცით იმის, რომ პატიმრები სიცხემ აღარ შეაწუხოს. მგონია, რომ აბსოლუტურად ზედმეტია ის პრეტენზიები, რაც აქედან მოდის. ეს არის დაახლოებით თავდაცვა თავდასხმაო რომ იტყვიან, აი ასე გვესხმიან თავს არაფრის გამო. იმიტომ რომ მიიპყრონ სხვა საზოგადოების ყურადღება და შეიქმნან ტანჯულის იმიჯი. რეალურად ეს ასე არ არის.

როგორც  ვიცი, საუბარი იყო იმაზე, რომ ბათუმის მე-3 დაწესებულებიდან პატიმრების ნაწილის გადაყვანა იგეგმებოდა მე-6 დაწესებულებაში, ეს პროცესი დაიწყო?  მაინტერესებს ვისი გადაწყვეტილებით გადაჰყავთ პატიმრები ერთი დაწესებულებიდან მეორეში და კონკრეტული კრიტერიუმები თუ არსებობს, მაგალითად, ვინ შეიძლება მოხდეს სამარტოო საკანში?

მე გამოვეცი ბრძანება, [მსჯავრდებულის რისკის სახეების, რისკის შეფასების კრიტერიუმების, რისკის შეფასებისა და გადაფასების წესის, მსჯავრდებულის იმავე ან სხვა ტიპის თავისუფლების აღკვეთის დაწესებულებაში გადაყვანის წესისა და პირობების, აგრეთვე მულტიდისციპლინური გუნდის შმადგენლობის და უფლებამოსილების განსაზგვრის წესის დამტკიცების თაობაზე ბრძანება] რომელიც არეგულირებს რისკების მიხედვით პატიმრების გადანაწილებას დაწესებულებაში. ასე ვიღაცის ნებასურვილით პატიმარს მაგალითად ა პუნქტიდან ბ პუნქტში ვერ გადაიყვან. შეიქმნება მულტიდისიპლინური ჯგუფი, რომელიც გაითვალისიწნებს ამა თუ იმ პატიმრის ყველა რისკს  და ამის მიხედვით იქნებიან პატიმრები გადანაწილებული სხვადასხვა დაწესებულებში.

გვაქვს ოთხი რისკის: დაბალი, მაღალი, ნახევრად ღია და დახურული ტიპის დაწესებულებები. მულტიდისიპლინური ჯგუფის წევრები წყვეტენ პატიმარი სად უნდა იხდიდეს სასჯელს და არა ინდივიდუალურად – პატიმრები დირექტორის ან  მინისტრის შეხედულებით არ არიან გადანაწილებული.

ვინ იქნებიან ამ ჯგუფის წევრები?

ჯგუფი შედგება  ფსიქოლოგისგან, სოციალური მუშაკისგან, რეჟიმისა და უსაფრთხოების სამსახურის თანამშრომლებისგან. ჯგუფის წევრი იქნება ასევე ექიმი. ესენი გადაწყვეტენ თუ სად უნდა მოიხადოს სასჯელი ამა თუ იმ პატიმარმა. დაახლოებით 11 ათასამდე პატიმარი იხდის სასჯელს ჩვენს დაწესებულებებში. 11 ათასი პატიმარი ინდივიდუალურად იქნება შესწავლილი და იმის მიხედვით იქნება გადანაწილება. ერთხელ და სამუდამოდ დაესმება წერტილი იმ საბჭოურ გადმონაშთს, რასაც ჰქვია ოპერატიული წერილების საფუძველზე პატიმრების გადაყვანა ერთი დაწესებულებიდან მეორეში.

ეს ბრძანება უკვე ამოქმედდა?

არა, ჯერ ახალია. ხელი მაქვს მოსაწერი ბრძანებაზე და მომავალ კვირას მოვაწერ ხელს.

სახალხო დამცველის ანგარიშში ეწერა, რომ ლგბტ თემის  პატიმრების ტრანსპორტირება იყო ადამიანის პატივისა და ღირსების შემლახავი, ნახსენები იყო ე.წ ფურგუნის ტიპის მანქანები, რომლის გაუქმებასაც მოითხოვდა ომბუდსმენი, ამ კუთხით ხომ არ შეცვლილა რაიმე?

მე ვეთანხმები იმ მოსაზრებას, რომ მოძველებული ტექნიკით გადაჰყავდათ ეს ადამიანები სასამართლოებში თუ დაწესებულებიდან დაწესებულებაში, ვადაგასული და ამორტიზირებული დაჟანგუბული მანქანებით. ეს ტექნიკა შეუსაბამო იყო ადამიანების ტრანსპორტირებისთვის. ეს უკვე გამოვასწორეთ, ვიყიდეთ ახალი სპეცტექნიკა. ორი საბადრაგო მანქანა გვაჩუქა ჰოლანდიის მთავრობამ. მერსედესის ტიპის, დანარჩენი ვიყიდეთ.

სახალხო დამცველის შუალედურ ანგარიშში ასევე ეწერა, რომ  საკნებში ხშირად არ მოდის წყალი,  ამ დაწესებულებაში არის თუ არა ავზები?

კი, ავზები შეძენილია და ეს პრობლემა მოგვარებულია. გაძლევთ იმის პირობას, რომ უახლოეს მომავალში ყველა ინფრასტრუქტურული პრობლემა, რაც აწუხებთ მსჯავრდებულებსა და ბრალდებულებს  იქნება მოგვარებული. ჩვენ ვცდილობთ საცხოვრებელი პირობების გაუმჯობესებას პატიმრებისთვის. პრობლემები არის, მაგრამ ეტაპობრივად ვაგვარებთ, ერთი ხელის მოსმით ყველა პრობლემა ვერ  გვარდება.

[შუაში] თამთა დემურიშვილი

სამინისტროს სამედიცინო სამსახურის ხელმძღვანელმა, თამთა დემურიშვილმა ჟურნალისტებს დაწესებულებაში სამედიცინო კუთხით არსებული მდგომარეობა გააცნო. მისი გამარტებით, სასჯელაღსრულების N3 დაწესებულებაში განახლდა აფთიაქი. მისივე განმარტებით, აფთიაქში ბრალდებულებისა და მსჯავრდებულებისთვის 500- მდე დასახელების მაღალი ხარისხის მედიკამენტია ხელმისაწვდომი.

ზეინაბ ვარშალომიძესთან დღეს ექოსკოპიის გადასაღებად რიგში 21 პატიმარი ჩაეწერა

ასევე დღეს, აჭარის ჯანდაცვის სამინისტროს დახმარებით, სხვადასხვა პროფილის ექიმებმა კონსულტაცია და გამოკვლევები ჩაუტარეს პატიმრებს. ყველაზე მეტი პაციენტი დღეს ნევროპათოლოგს ჰყავდა. პატიმრების წამლებისთვის ბიუჯეტიდან წელიწადში 2 მილიონამდე ლარი იხარჯება.

პაციენტებს დღეს გამოკვლევა ღვიძლზე ჩაუტარდა

საქარათველოში სულ 11 სასჯელაღსრულების დაწესებულებაა. მათ შორის ერთია ბათუმში.

ბათუმის მესამე დაწესებულებაში ახლა 160 ადამიანი იხდის სასჯელს.

სამედიცინო ნაწილის საკანი

სამედიცინო ნაწილის საკანი

საკანი, სადაც ექიმები პაციენტებს გამოკვლევებს უტარებდნენ

დღესვე, სასჯელაღსრულებისა და პრობაციის მინისტრი გიორგი მღებრიშვილი სასჯელაღსრულების N3 დაწესებულების მსჯავრდებულებს შეხვდა, ზაფხულის სეზონთან დაკავშირებით ინდივიდუალური კონდიცირების ახალი სისტემის მონტაჟის სამუშაოები დაათვალიერა და პატიმართა სამედიცინო პრევენციულ გამოკვლევებს დაესწრო.

მსჯავრდებულთა კვლევები სასჯელაღსრულებისა და პრობაციის სამინისტროს ინიციატივით, აჭარის ჯანდაცვის სამინისტროს მხარდაჭერითა და N1 პოლიკლინიკის ექიმ-სპეციალისტების დახმარებით ჩატარდა.
ექიმ-კონსულტანტებმა პატიმრობისა და თავისუფლების აღკვეთის N3 დაწესებულებაში მყოფ ბრალდებულებსა და მსჯავრდებულებს სამედიცინო მომსახურება უსასყიდლოდ გაუწიეს.

გამოფენაზე წარმოდგენილი ისტორიული შენობების საარქივო ფოტოები ფოტოხელოვან შოთა გუჯაბიძეს ეკუთვნის, რომელიც იმავე შენობების ამჟამინდელი ფოტოვერსიების ავტორიცაა.

პროექტის მიზანია წარმოაჩინოს კულტურული მემკვიდრეობის ნუსხაში შესული შენობების სახეცვლილებები და პრობლემის აქტუალიზაცია. პროექტისთვის შერჩეულია ოთხი სამიზნე ქალაქი: ქუთაისი, თელავი, გორი და ბათუმი, სადაც ასევე ეწყობა მსგავსი გამოფენები. პროექტის ფარგლებში მოპოვებული და გადაღებული ფოტოები ოთხივე ქალაქიდან, ჯამში 400-ზე მეტი ფოტო, განთავსდება სპეციალურად შექმნილ ვებგვერდზე.

ბათუმის თანამედროვე არქიტეტურა. მანანა ქველიაშვილის ფოტო

მშენებელი კომპანიების უმეტესობას საცხოვრებელი კორპუსის აშენება ბათუმის ცენტრალურ ნაწილში, ზღვასთან ახლოს სურს. რაც უფრო ახლოსაა დაგეგმილი ან მიმდინარე პროექტი ზღვასთან, უფრო მეტად ცდილობს დეველოპერი, რომ შენობა, რომელსაც ის მომავალში გაყიდვის მიზნით აშენებს, მაქსიმალურად მაღლივი იყოს, ეს გასაყიდ ფართობს რამდენიმე ასეული კვადრატული მეტრით ზრდის, შესაბამისად, რამდენიმე ასეული ათასი დოლარით იზრდება შემოსავალიც.

უკვე დაწყებულ ან დაგეგმილ სამშენებლო პროექტზე კ2-კოეფიციენტის, ანუ განაშენიანების ინტენსივობის კოეფიციენტის გაზრდაზე მერიასთან შეთანხმებას დეველოპერები ხშირად აჭარის მთავრობის თავმჯდომარის დახმარებით აღწევენ. არჩილ ხაბაძე მერიას შუამდგომლობით მიმართავს, შედეგად კი დეველოპერი განაშენიანების ინტენსივობის კოეფიციენტის (K2 -ის) გაზრდაზე თანხმობას იღებს.
2013 წლიდან დღემდე აჭარის მთავრობის თავმჯდომარემ ბათუმის საკრებულოსა და მერიას კონკრეტული პროექტის K2-კოეფიციენტის გაზრდაზე, რაც უმეტესწილად დაგეგმილი ან მიმდინარე მშენებლობის სიმაღლის გაზრდას გულისხმობს, შუამდგომლობით 95-ჯერ მიმართა. 56 შემთხვევაში კი კომპანია უარით გაისტუმრა. შუამდგომლობების დოკუმენტებში არჩილ ხაბაძე მერიას კომპანიის თხოვნის გათვალისწინებას პროექტის ეკონომიკური და საზოგადოებრივი მნიშვნელობით უსაბუთებს, რიგ შემთხვევებში კი, მთავრობის თავმჯდომარე მერისადმი გაგზავნილ სარეკომენდაციო მიმართვაში პროექტის არქიტექტურაზეც ამახვილებს ყურადღებას.

რაც შეეხება შუამდგომლობაზე უარის შესახებ დოკუმენტებს, ყველა მათგანს ხელს მთავრობის აპარატის უფროსი რუსლან ქორიძე აწერს და თითქმის ყველა მათგანში იდენტური ტექსტია: “მთავრობამ შუამდგომლობის გაწევა მიზანშეწონილად არ მიიჩნია“. ამ დოკუმენტების მიხედვით, უარის მიზეზი აჭარის მთავრობას დეველოპერისთვის ერთხელაც არ დაუსაბუთებია.

„ბათუმელები„ თითქმის ყველა იმ დეველოპერს დაუკავშირდა, რომლებმაც აჭარის მთავრობის პირველი პირისგან K2-კოეფიციენტის გაზდასთან დაკავშირებით შუამდგომლობაზე უარი მიიღეს. მათგან რამდენიმემ არჩილ ხაბაძეს შუამდგომლობა მეორედ სთხოვა. „დოკუმენტები გავასწორეთ და ახლა პასუხს ველოდებით,“ – უთხრეს მათ „ბათუმელებს“.

რას გულისხმობენ დეველოპერები განმარტებაში – „დოკუმენტები გავასწორეთ“, მაშინ, როცა აჭარის მთავრობის ადმინისტრაციაში არქიტექტურის სამსახური არ არსებობს? – ამას ბიზნესმენების უმეტესობა არ აკონკრეტებს. მეტი კონკრეტიკა „ბათუმელებმა“ ვერც აჭარის მთავრობისგან მიიღო – პრესსამსახურის ინფორმაციით, არჩილ ხაბაძე სტატიის მომზადების დროს საქმიანი ვიზიტით საზღვარგარეთ იმყოფებოდა, დოკუმენტების ხელმომწერმა რუსლან ქორიძემ კი კომენტარი არ გააკეთა.

უარით გასტუმრებულ დეველოპერებს სჯერათ და ამბობენ კიდეც, რომ ვისაც მთავრობის თავმჯდომარის შუამდგომლობის მიღება შეუძლია, მას „გაღების შესაძლებლობაც აქვს“.

„შეიძლება ეს იყოს ფართობი იმავე ბინაში, 100 კვ/მეტრი ან მეტი, გააჩნია რა მასშტაბების პროექტია“, – გვიხსნის დეველოპერი. ხომ არ ნიშნავს ეს იმას, რომ კ2-ით კონკრეტული მოხელეები სარგებლობენ? – ამ კითხვაზე დეველოპერი კომპანიის წარმომადგენლის პასუხია: „მთავრობა ამბობს, რომ ამ ფართობს სოციალურად დაუცველებისთვის ითხოვს…“ დეველოპერს საჯაროდ საუბარი იმის გამო არ სურს, რომ „მომავალში, მთავრობასთან შეთანხმებით, მშენებარე კორპუსის სიმაღლეში მომატების იმედს არ კარგავს“. ის ერთ-ერთი მათგანია, ვინც არჩილ ხაბაძის აპარატის უფროსისგან უარის წერილი მიიღო. კითხვაზე, გარკვეული ფართობი რომ შეგეთავაზებინათ, დარწმუნებული ხართ, რომ დადებით პასუხს მიიღებდით? – ის ამბობს, რომ ამაში დარწმუნებულია.

მთავრობის განმარტებით, კრიტერიუმი, რომლითაც აჭარის მთავრობა მერიასთან შუამდგომლობაზე უარის თქმისას ხელმძღვანელობს, ბათუმის საკრებულოს „ბათუმის ტერიტორიაზე დასახლებათა ტერიტორიების გამოყენებისა და განაშენიანების რეგულირების წესების შესახებ“ 2012 წლის 14 სექტემბრის დადგენილებაა. თუმცა, რიგ შემთხვევებში იგივე დადგენილება (თითქმის ანალოგიურ პროექტზე) არჩილ ხაბაძეს ხელს არ უშლის კ2-კოეფიციენტის გაზრდაზე რეკომენდაცია გასცეს. როგორც წესი, ხაბაძე ამ რეკომენდაციით ბათუმის მერს, გია ერმაკოვს მიმართავს. აქამდე ისე ხდებოდა, რომ მერიაში არსებული ზონალური საბჭო მთავრობის პირველი პირის რეკომენდაციას ძირითადად ითვალისწინებდა.

ბათუმის საკრებულოს დადგენილება კი, რომლითაც აჭარის მთავრობა ხელმძღვანელობს, ბათუმის ტერიტორიაზე დასახლებათა გამოყენებისა და განაშენიანების წესებს არეგულირებს. ამ წესებს შორისაა ქალაქის კონკრეტულ ფუნქციურ ზონაში მდებარე სამშენებლო მიწის ნაკვეთზე შენობის დასაშვები სიმაღლის განსაზღვრის წესიც. ეს დადგენილება კონკრეტულ ზონაში საცხოვრებელი სახლის მშენებლობისთვის კონკრეტულ კოეფიციენტს აწესებს.

ამას ემატება კიდევ ერთი დადგენილება, რომლის მიხედვითაც 2013 წელს, წინა მოწვევის საკრებულომ, ბათუმში, გრიბოედოვის ქუჩიდან გოგებაშვილის ქუჩამდე და ამ ქუჩების სამხრეთით, ჭავჭავაძის ქუჩამდე ტერიტორიაზე მშენებლობისთვის მოსაკრებელი დააწესა. ზონირების წესების მიხედვით, ამ ტერიტორიის უმეტესი ნაწილი საზოგადოებრივ-საქმიანი, მისი მცირე ნაწილი კი საცხოვრებელი ზონაა. რეგულაცია, რომელიც ბათუმის საკრებულომ მიიღო, ამ ზონაში დადგენილ ნორმებს გარეთ მშენებლობისთვის ორ გადასახადს ითვალისწინებს.

გადასახადი მშენებლობის სხვა შენობებთან მიმართებაში სიმჭიდროვესთან, ასევე მის სიმაღლესთან გარკვეულ კავშირშია, ამიტომაც მას ბათუმში პირობითად „ჰაერის გადასახადიც“ უწოდეს. რეგულაციის მიღების აუცილებლობა საკრებულოს მაშინდელმა თავმჯდომარემ ირაკლი ჩავლეიშვილმა დაუსაბუთა. რეგულაციის ავტორი კი მაშინდელი ბათუმის მთავარი არქიტექტორი გიორგი რამიშვილი იყო.
„ბათუმი დაყოფილია ზონებად და თითოეული ზონისთვის დადგენილია გარკვეული კოეფიციენტი, ანუ სამშენებლო ტერიტორიის ნაკვეთის მდებარეობიდან გამომდინარე შესაძლებელია აიგოს გარკვეული ფართობის შენობა. მსგავსი კოეფიციენტი დადგენილია ყველა ზონისთვის ლიმიტის ფარგლებში. ერთ ზონაში სხვა ციფრია, მეორე ზონაში – სხვა. დავაწესეთ რეგულაცია, რომელსაც აქვს ორი მიზანი: პირველი ის, რომ არსებობს საზოგადოებრივი დაკვეთა – კონკრეტულ ტერიტორიაზე არ აშენდეს მრავალსართულიანი შენობები. ვფიქრობთ, რეგულაცია ხელს შეუწყობს ამ ტენდენციას, ანუ რეალურად ეს არის პირველი ნაბიჯი უძრავი ქონების სტაბილური ბაზის ჩამოყალიბებისაკენ. არანაკლებ მნიშვნელოვანია ის, რომ ამ ღონისძიებით ქალაქის დანარჩენ ნაწილში მშენებლობის გააქტიურების სტიმულირება მოხერხდება, სადაც რეგულაცია მსგავს შეზღუდვებს არ ითვალისწინებს“, – განმარტავდა მაშინ ბათუმის მთავარი არქიტექტორი გიორგი რამიშვილი.

ამ რეგულაციით საზოგადოებრივ-საქმიან ზონაში (გრიბოედოვის ქუჩიდან გოგებაშვილის ქუჩამდე და სამხრეთით ჭავჭავაძის ქუჩამდე) ორი კატეგორიის გადასახადი ამოქმედდა, რაც მშენებლობის მდებარეობის მიხედვით საზოგადოებრივ-საქმიან ზონაში კვადრატულ მეტრზე 315 ლარის, საცხოვრებელ ზონაში კი – 143 ლარის გადახდას ითვალისწინებს.

რეგულაციას თავიდანვე გამოუჩნდნენ მოწინააღმდეგეები, არა მხოლოდ დეველოპერები, აჭარის მთავრობის წევრებიც კი პირად საუბრებში ქალაქის მთავარი არქიტექტორის მიმართ საყვედურებს არ ერიდებოდნენ და მას მოიხსენებდნენ, როგორც არქიტექტორს, რომელიც „სიმაღლეებზე ჭედავს“. გიორგი რამიშვილი, იმის საილუსტრაციოდ, რომ რეგულაციამ ერთ-ერთი მთავარი მიზანი – „მშენებლობები გარეუბნებში გადაინაცვლებს“, გაამართლა, პერიოდულად ბრიფინგს მართავდა და ახალი სამშენებლო ნებართვების სტატისტიკას აცნობდა საზოგადოებას.

თვითმმართველობის არჩევნების დასრულების შემდეგ ბათუმში ქალაქმშენებლობის პოლიტიკა ისევ შეიცვალა. ბათუმის ცენტრში მაღლივ მშენებლობებზე ნებართვები მომრავლდა, ხოლო ქალაქის მთავარი არქიტექტორის შტატი მერიაში ისევ კითხვის ნიშნის ქვეშ დადგა. ირაკლი ჩავლეიშვილმა მოადგილის თანამდებობაზე გადაინაცვლა, გიორგი რამიშვილს კი ვერც „პატიოსნების საზომით გამორჩეულობამ“ და ვერც „პროფესიონალიზმმა“ უშველა. ის ბათუმის ახალარჩეულმა მერმა არქიტექტურას ჩამოაშორა და მრჩევლის თანამდებობაზე გადაიყვანა.

რა რჩევებს აძლევს ქალაქის ყოფილი არქიტექტორი მერს? – არც ამ და არც სხვა კითხვებს გიორგი რამიშვილი არ პასუხობს. ქალაქის ყოფილი არქიტექტორი „დუმილის უფლებას“ იყენებს. დაახლოებით ერთი თვეა მან აჭარის კულტურული მემკვიდრეობის სააგენტოსთან არსებული ზონალური საბჭოც ყოველგვარი ახსნა-განმარტების გარეშე დატოვა.

„ბათუმელების“ კითხვებს ქალაქის არქიტექტურაზე არც ბათუმის მოსახლეობის რჩეულმა, მერმა გიორგი ერმაკოვმა უპასუხა. „მის პოზიციას ქალაქის არქიტექტურაზე ირაკლი ახალაძე გაახმოვანებს, შეგიძლიათ მას მიმართოთ“, – უთხრეს „ბათუმელებს“ მერიის პრესსამსახურში.

ირაკლი ახალაძე ბათუმის არქიტექტურის სამსახურის ხელმძღვანელია. ის სამსახურის უფროსად გიორგი ერმაკოვმა დანიშნა, მისი თანამდებობა კონკურსის გავლას არ ითვალისწინებდა. მისი მოადგილე კი ბათუმის მთავარი არქიტექტორის ფუნქციასაც ითავსებს. ეს იმას ნიშნავს, რომ ქალაქის მთავარი არქიტექტორი რეალურად სამსახურის უფროსის მოადგილეა და დამოუკიდებლად გადაწყვეტილებას ვერ მიიღებს, ის სამსახურის უფროსს ემორჩილება.

ირაკლი ახალაძის განმარტებით კი, კ2-კოეფიციენტის გაზრდა არ ნიშნავს იმ რეგულაციებისა და ნორმების უგულებელყოფას, რომლებიც კონკრეტულ მიწის ნაკვეთზე არსებობს: „რაც ახალი მერი აირჩია ქალაქმა და ჩვენ დავინიშნეთ, მას შემდეგ მრავალბინიანი სახლების პროექტირებისას განსაკუთრებულ ყურადღებას ვაქცევთ ავტოფარეხების, ასევე შშმ პირებისათვის ადაპტირებული გარემოს შექმნას. იდეალური არაფერია, პროექტები კონკრეტული ქუჩის სიგანის შესაბამისობაშია, ურბანული ქსოვილიდან რომ არ ამოვარდეს. იმ შემთხვევაშიც კი, როდესაც ქალაქმშენებლობის პირობები შუამდგომლობის საფუძველზე მტკიცდება, ყოველთვის არის დაცული ნორმა.
შუამდგომლობები არ არის მხოლოდ ცენტრალურ ნაწილში გაცემული, საკმაოდ ბევრია ქალაქის ტერიტორიაზე გაცემული შუამდგომლობა. არის სამთავრობო პროგრამა არასტანდარტული საცხოვრისის ლიკვიდაციის თაობაზე, რომელიც ქალაქის ტერიტორიაზე ე.წ. ბარაკული, სანიტარულად გამოუსადეგარი და ვიზუალურად არადამაკმაყოფილებელ მდგომარეობაში მყოფი ობიექტების ლიკვიდაციას და მის ნაცვლად ახლის მშენებლობას ითვალისწინებს. სანაცვლოდ აჭარის მთავრობა დეველოპერებს მერიასთან K2-კოეფიციენტის გაზრდაზე შუამდგომლობს. შემდეგ ეს დოკუმენტაცია იგზავნება სამთავრობო კომისიაში, რომლის ხელმძღვანელიც აჭარის ფინანსთა და ეკონომიკის მინისტრია“.

აჭარის მთავრობიდან გამოთხოვილი ინფორმაციის საფუძველზე შეიძლება ითქვას, რომ არჩილ ხაბაძემ 42 შემთხვევაში შუამდგომლობა ქალაქის ცენტრში, ფასიან ზონაში სიმაღლის გაზრდაზე გაუწია ინვესტორს. 52 შემთხვევაში კი – არაფასიან ზონაში, თუმცა მათ შორის უმეტესობა ქალაქის ცენტრალურ ნაწილში აშენდება. მათ შორის 12 პროექტი ბათუმში, ფარნავაზ მეფის ქუჩაზე უნდა განხორციელდეს, სადაც რამდენიმე მაღლივი კორპუსი უკვე აშენდა.

არქიტექტორ რეზო გოგიტიძის განმარტებით, განაშენიანების ეს პოლიტიკა ფარნავაზ მეფის ქუჩაზე და სხვაგანაც, განსაკუთრებით ბათუმის ცენტრალურ ნაწილში, სადაც მაღლივი შენობების რიცხვმა იმატა, ხოლო რეკრეაციული ზონები თანდათან ქრება, ადამიანებს ცხოვრება გაუჭირდებათ. იქნება ჰაერისა და მზის სხივის ნაკლებობა. ვიწრო ქუჩებში გავლისა და მანქანის გაჩერების პრობლემა: „საბოლოოდ კი მოხდება ის, რომ ადამიანები გამოვლენ გარეთ, როგორც ნიუ იორკში. იმუშავებენ ქალაქში, მაგრამ ვერ იცხოვრებენ. განსაკუთრებით საშიში კი რეკრეაციული ზონების ათვისების ტენდენციაა, რომლის დასაწყისსაც, სამწუხაროდ, ვხედავ“.

„ბათუმელები“ არჩილ ხაბაძის რეკომენდაციამოპოვებული დეველოპერების მიერ სამშენებლოდ გამზადებულ რამდენიმე მისამართზე გავიდა. მაგალითად, ფარნავაზ მეფის ქუჩაზე თითოეული პროექტის სანაცვლოდ კომპანიას დაახლოებით 20 საცხოვრებლის ათვისება მოუწევს. ერთ-ერთი მათგანია „მარდი ჰოლდინგი“.

„კომპანია მარდი ჰოლდინგი შვილობილი კომპანიების, – „მარდი ჰაუსისა“ და „მარდი თაუერის“ მეშვეობით მონაწილეობს არასტანდარტული საცხოვრისების ათვისების სამთავრობო პროგრამაში. ჩვენ შემთხვევაში ერთი პროექტი ხორციელდება ფარნავაზ მეფის ქუჩაზე. ფორმალური მხარე, სამშენელო ნებართვის მოპოვების ჩათვლით, უკვე დავასრულეთ და ამჟამად სამშენებლო სამუშაოების დასაწყებად ვემზადებით. რაც შეეხება მიწი ნაკვეთის განაშენიანების ინტენსივობის კოეფიციენტის (ე.წ. K2) მომატებას გადახდის გარეშე, ეს ამ სამთავრობო პროგრამის შემადგენელი ნაწილი და ის სტიმულატორია, რითაც ხდება სამშენებლო ბიზნესის დაინტერესება. პროექტში მონაწილე კომპანიის ვალდებულება ბარაკულ ტერიტორიაზე მცხოვრები მესაკუთრეების დაკმაყოფილებაა. საბინაო ფონდში შენატანის ვალდებულებას ეს პროგრამა არ ითვალისწინებს“, – ამბობს „მარდი ჰოლდინგის“ აღმასრულებელი დირექტორი ირაკლი ჯიჯავაძე.

ბათუმის ცენტრში, თუნდაც ფარნავაზ მეფის ქუჩაზე, ერთი კვადრატული ბინის ფასი 700-1000 დოლარია. 20-მდე არასტანდარტული საცხოვრისის ათვისების სანაცვლოდ კომპანიას ხშირად 15 ან მეტსართულიანი სახლის მშენებლობის ნებართვა ეძლევა. ქალაქის ცენტრში მოსახლეობასთან მოლაპარაკების სანაცვლოდ ახალი მშენებლობის დაწყების ტენდენცია, ცხადია, სამთავრობო პროგრამის დაწყებამდეც არსებობდა. რატომ ჩადგა მთავრობა ინვესტორსა და მოქალაქეებს შორის, მით უმეტეს იმ ფონზე, როცა, გასულ წელს, ქალაქის ცენტრში სიმაღლის გაზრდის გადასახადით ბიუჯეტში მილიონზე მეტი ლარი შევიდა? – კითხვაზე არასტანდარტული საცხოვრისის ათვისების პროგრამის კომისიის თავმჯდომარემ, აჭარის ფინანსთა და ეკონომიკის მინისტრის მოადგილემ, იონა წითელაძემ, უპასუხა, რომ მთავრობა მოლაპარაკებებში არ ერევა.

„სახელწიფოს ვალდებულება რა არი? – პირობა შეუქმნას როგორც დეველოპერს, ასევე მოსახლეობას. ბევრ კომპანიას შეექმნა ფინანსური პრობლემები, რის გამოც მოსახლეობაც დაზარალდა. ამ პროგრამის შემთხვევაში მთავრობა გარანტად უდგება როგორც მოსახლეობას, ასევე ბანკს, რომელიც დეველოპერს ეხმარება. რაც შეეხება K2-ის გაზრდას, ცხადია, რაც მეტია სიმაღლე, მით მეტია შემოსავალი. მეტი მშენებლობა ბიუჯეტში მეტ მოგების გადასახადს ნიშნავს“, – განმარტა კომისიის თავმჯდომარემ. მისივე თქმით, პროგრამა მთავრობის საბინაო ფონდში შენატანს არ ითვალისწინებს.

სამთავრობო პროგრამა ბიზნესის მხარდასაჭერად კიდევ უფრო შორს მიდის: არასტანდარტული საცხოვრისის ათვისების სანაცვლოდ, დეველოპერს მომავალში ბინების ვერ გაყიდვის შემთხვევაში, თვითღირებულების ფასად, ბიუჯეტის სახსრებით მათ გამოსყიდვას ჰპირდება. აი, რა წერია მთავრობის დადგენილებაში: „საფინანსო ორგანიზაციების მოვალეების მიერ მათზე ამ პროგრამის მიზნობრიობით გაცემული საკრედიტო ვალდებულებების შეუსრულებლობის ან/და აჭარის მთავრობის მიერ საფინანსო ორგანიზაციებთან დადებული ხელშეკრულებით გათვალისწინებულ შემთხვევებში, საფინანსო ორგანიზაციებისგან პირდაპირი მოლაპარაკების გზით შეიძენს მათ მოთხოვნებსა და მათი უზრუნველყოფის მიზნით გამოყენებულ უძრავ ნივთს ან მასთან დაკავშირებულ არამატერიალურ ქონებრივ სიკეთეს“.

„ქ. ბათუმში არასათანადო-არასტანდარტული საცხოვრისის ლიკვიდაციის სახელმწიფო მიზნობრივი პროგრამის დამტკიცების შესახებ“ დადგენილებას პრემიერ-მინისტრმა ირაკლი ღარიბაშვილმა 2014 წლის ივნისში მოაწერა ხელი.

  ვიცე-მერის ბაგრატ მანველიძის  განცხადებას „ბათუმელები“ უცვლელად გთავაზობთ: „როგორც ვხედავთ, სეზონთან დაკავშირებით ქალაქში არაერთი უმსგავსო ჯიხური მომრავლდა, რაც აზიანებს ჩვენი ქალაქის იერსახეს და არღვევს კანონს. ყველა უკანონო ვაჭრობას და უსახური ობიექტების ქალაქის ტერიტორიაზე ჩადგმას მოყვება მკაცრი რეაგირება. სოციალური ფონის გათვალისწინებით ადამიანებს მიეცათ გარკვეული ვადა, რომ ეს ობიექტები მოექცეს სამართლებრივ ჩარჩოებში და ასევე არ ამახინჯებდეს ტერიტორიის იერსახეს. მოვუწოდებ ყველას, კერძო პირებსაც, რომელთა ტერიტორიაზე შეამჩნევენ უკანონო ობიექტებს, მიმართონ ზედამხედველობის სამსახურს. ეს უნდა იყოს გაფრთხილება ყველასთვის, ვინც მსგავს უკანონობას განახორციელებს. მერიის ზედამხედველობის სამსახური კანონის სრული დაცვით იმოქმედებს და გაატარებს კანონით გათვალისწინებულ ღონისძიებებს” .

მუხრან ვახტანგაძე: თუ ვინმეს ქვეყნისა და ერის წინაშე დანაშაული მიუძღვის, ყველამ უნდა აგოს პასუხი კანონის წინაშე. ჩემი ქვეყნის წინაშე კეთილი და კარგი საქმის მეტი არაფერი მიკეთებია. რაც შეეხება მურმან დუმბაძისა და მედეა ვასაძის განცხადებებს, ისინი საზღვრებს სცდებიან, ჩემს ღირსებას და თავმოყვარეობას უხეშად ეხებიან და მე ვფიქრობ, რომ ამ ადამიანებმა პასუხი უნდა აგონ.

აპირებთ სასამართლოს მიმართოთ?

დიახ, რეპუტაციის შელახვის გამო, ღირსების შელახვისა და ტალახის სროლის გამო ვაპირებ სასამართლოს მივმართო.

მურმან დუმბაძე გუშინ პარლამენტში საუბრობდა 2003 წლის 23 ნოემბერზე. იმ პერიოდში სად იყავით, შეგიძლიათ გაიხსენოთ?

2003 წლის ნოემბრის ბოლო, მახსოვს ძალიან კარგად, 24, 25, 26 რიცხვებში ვიყავი ყაზახეთში, სადაც გავხდი მსოფლიო თასის მფლობელი. რომ ჩამოვედი, მახსოვს, რომ ამ თემაზე [დარბევაზე] იყო საუბარი, აქ დამახვედრეს ამბავი და მაგ თემასთან დაკავშირებით ბოდიშიც კი მომიხადეს, რომ შეცდომაში ვიყავით შეყვანილიო.

რა ამბავი დაგახვედრეს, ბოდიში ვინ მოგიხადათ და სად?

2003 წლის ნოემბერში თურმე გაულახავთ კობა ხაბაზი, ბერძენიშვილი, დავითაშვილი, ვიღაცაში ავერიე თურმე და მაშინ „ჩვენი აჭარას“ წევრებმა მოიწვიეს ტელევიზიები და საჯაროდ მომიხადეს ბოდიში, რომ შეცდომაში იყვნენ შეყვანილები.

რაც შეეხება კაფე „ხარება და გოგიას“ – არის ის თქვენი საკუთრება? იქ მომხდარ ხელჩართულ ჩხუბშიც პოლიტიკოსები თქვენ გადანაშაულებენ…

2002-დან 2005 წლამდე მე საერთოდ ბათუმში არ ჩამოვდიოდი, თუ რატომ ვერ ჩამოვდიოდი, ამაზე არ დავკონკრეტდები. მე პრობლემები მქონდა მაშინდელ ხელმძღვანელობასთან. რაც შეეხება კაფეს, არასოდეს მქონია ბიზნესი.

რა ურთიერთობა გაქვთ [გქონდათ] მედეა ვასაძესთან ან მურმან დუმბაძესთან აქამდე?

ჩემი კანდიდატურა ამ  თანამდებობაზე, რაზეც დღეს ვარ, მურმან დუმბაძემ 2012 წლის ბოლოს დააყენა მთავრობაში – მუხრან ვახტანგაძეს ეკუთვნის ეს ადგილი, ეს ადამიანი უნდა  იყოს დეპარტამენტის უფროსიო, აი იმის მერე რა შეიცვალა, არ ვიცი.

გუშინ, 1 ივლისს, აჭარის განათლების, კულტურისა და სპორტის მინისტრმა გიორგი თავამაიშვილმა მუხრან ვახტანგაძე სამინისტროს თანამშრომლებს წარუდგინა. ვახტანგაძე აჭარის მთავრობის თავმჯდომარის 23 ივნისის #51 ბრძანებით აჭარის სპორტისა და ახალგაზრდობის საქმეთა დეპარტამენტის ხელმძღვანელად  დაინიშნა. 

როგორც პატიმარი წერს, ის იმყოფება ე.წ. უსაფრთხო საკანში უკვე რვა დღეა: „სადაც არ იღება ფანჯარა, არის უჰაერობა, არაა წყალი, რომ გარეცხო თეფში და ჭიქა, არის საშინელი ანტისანიტარია, მერვე დღეა საპნით ხელი არ დამიბანია, იძულებული ვარ, მივმართო მშრალ შიმშილობას“.

ბრალდებულის ადვოკატი, მერი ცინარიძე „ბათუმელებთან“ ამბობს, რომ მან პატიმარი დღეს მოინახულა: „როგორც მან მითხრა, არის გაუსაძლის პირობებში, არ გამოუცლია ერთი კვირაა ტანსაცმელი, ითხოვს საკანში გადაყვანას, მე დავწერე შუამდგომლობა ციხის ადმინისტრაციის სახელზე და ვითხოვე პატიმრის სტანდარტულ საკანში გადაყვანა, რადგან ჩემი დაცვის ქვეშ მყოფი არ აპირებს მიიყენოს დაზიანებები“.

ადვოკატის ინფორმაციით, ბრალდებულს ქურდობის გამო ასამართლებენ. სასამართლოს მისთვის ჯერ განაჩენი არ გამოუტანია. ადვოკატი ამბობს, რომ პატიმარი საპროცესო შეთანხმების გაფორმებას ითხოვდა და სწორედ ამ მოტივით სურდა პროკურორთან შეხვედრა: „ საპროცესო შეთანხმებისა და პროკურორთან შეხვედრის მოთხოვნით მან მიიყენა თვითდაზიანებები, როცა ის სასამართლო პროცესზე ნახა მოსამართლე დავით მამისეიშვილმა, გადადო პროცესი“.

პროკურორმა პატიმარი ციხეში მოინახულა.

სასჯელაღსრულებისა და პრობაციის სამინისტროს ცნობით, ბრალდებული შიმშილობს და ციხის ადმინისტრაციაც და სოციალური სამსახურიც მუშაობს მასთან,  რომ შეწყვიტოს შიმშილობა. უწყების ცნობით,  შიმშილობის შეწყვეტის შემთხვევაში პატიმარს გადაიყვანენ ჩვეულებრივ საკანში. 

გამოძიების ვერსიით დაკავებულმა 2013 წლის 4 აგვისტოს უზბეკეთის რესპუბლიკიდან ბათუმში საცხოვრებლად და სამუშაოდ მოტყუებით ჩამოიყვანა 1984 წელს დაბადებული უკადდამ ტ. და გონიოს დასახლებაში მდებარე ნაქირავებ ბინაში მოათავსა. შემდეგ უკანონოდ მიითვისა მისი პირადობის დამადასტურებელი მოწმობა, შეუზღუდა თავისუფლად გადაადგილების უფლება, ფიზიკური ანგარიშსწორების მუქარითა და შანტაჟით, იძულებით ჩააბა პროსტიტუციაში.

დილრაბო ა. უკადდამ ტ-ს მიერ პროსტიტუციის შედეგად გამომუშავებულ თანხებს 2013 წლის 7 ნოემბრამდე ითვისებდა, რაც დაზარალებულის განცხადებით, ათი ათას დოლარამდე თანხას შეადგენდა. გამოძიებით დადგინდა, რომ ამ თანხის მიღების შემდეგ ბრალდებულსა და დაზარალებულს ერთმანეთთან კავშირი არ ჰქონდათ, ამავე დროს დაზარალებული ბათუმში ცხოვრებას განაგრძობდა.

ტრეფიკინგის სავარაუდო ფაქტის შესახებ სამართალდამცავებისთვის 2015 წლის დასაწყისში მიღებული ოპერატიული ინფორმაციის საფუძველზე გახდა ცნობილი და ასევე დადგინდა, რომ ამა წლის თებერვალში დილრაბო ა-მ. უკადდამ ტ-ს სიტყვიერი მუქარის მეშვეობით კვლავ მოსთხოვა გარკვეული ოდენობის თანხა, ვითომდა ძველი ვალის დაბრუნების მოტივით. ჩატარებული ოპერატიულ-საგამოძიებო მოქმედებებისა და საქმეზე მოპოვებული უტყუარი მტკიცებულებების შედეგად სამართალდამცავებმა დილრაბო ა-ს ბრალეულობა გამოავლინეს, ტრეფიკინგის ფაქტზე ბრალი წარუდგინეს და დააკავეს.

გამოძიება დაზარალებულის საზღვარგარეთ გაყვანით ტრეფიკინგის ფაქტზე მიმდინარეობს (საქართველოს სსკ-ის 143-ე პრიმა მუხლის 1-ლი ნაწილით და მე-3 ნაწილის „გ“ ქვეპუნქტით).

ცხმორისის ცენტრში, წვეულებათა დარბაზში დღეს, პირველ ივლისს, გამართულ საიუბილეო საღამოზე სერგო ხალვაშს რუსეთის პრეზიდენტის, ვლადიმერ პუტინის მისალოცი ბარათი გადასცეს, საქართველოში რუსეთის წარმომადგენელმა, შვეიცარიის კონფედერაციის საელჩოს რუსეთის ფედერაციის ინტერესთა სექციის მრჩეველმა, ალან ხეთაგუროვმა კი ქედელ ვეტერანს საჩუქრად 1000 დოლარი გადასცა – ამის შესახებ „ბათუმელებს“ სერგო ხალვაშის შვილმა, ნოდარ ხალვაშმა უთხრა. 

იუბილესთან დაკავშირებით ქედის მუნიციპალიტეტის გამგეობამ სერგო ხალვაშს 500 ლარი, აჭარის ჯანდაცვის სამინისტრომ კი 1000 ლარი გადასცა. სერგო ხალვაშთან ერთად მეორე მსოფლიო ომში გეგელიძეებიდან 13 ახალგაზრდა იბრძოდა, მათგან მხოლოდ ოთხი დაბრუნდა ცოცხალი.  

ამჟამად სერგო ხალვაში მეორე მსოფლიო ომის მონაწილე ერთადერთი ვეტერანია ქედის მუნიციპალიტეტში. იგი ამბობს, რომ სტალინის დაცვაში მუშაობდა, ფაშიზმზე გამარჯვებას კი, როგორც თვითონ ამბობს, ერაყში შეხვდა. ის სამშობლოში 1946 წელს დაბრუნდა.

 სერგო ხალვაშს 8 შვილი, 42 შვილთაშვილი და ორი შვილთაშვილის შვილთაშვილი ჰყავს.  

გასულ წელს ჰაერში მავნე ნივთიერებების გაფრქვევის ნორმების დაღვევის გამო გაფრთხილება სამ საწარმოს მიეცა, 2015 წლის მონაცემები კი ჯერ ცნობილი არ არის: „ერთადერთი, რაც ჩვენ შეგვიძლია, არის ის, რომ 80-მდე საწარმოს ვუგზავნით გაფრთხილების წერილებს და ვეუბნებით, რომ გამონაბოლქვის დამჭერი დანადგარები და გამწმენდი ნაგებობები მოაწესრიგონ“, – ამბობს ნუგზარ პაპუნიძე.

გარემოს ზედამხედველობის სამსახურის 2015 წლის ოფიციალური მონაცემებით, ატმოსფერულ ჰაერში მავნე ნივთიერებების გაფრქვევის აღრიცხვის მონაცემების დადგენილ ვადებში წარმოუდგენლობის გამო, სამ თვეში (მარტი, აპრილი მაისი), ადმინისტრაციული დარღვევის 24 შემთხვევა დაფიქსირდა, რაც 150-ლარიან ჯარიმას ითვალისწინებს. ხოლო ივნისში, ატმოსფერულ ჰაერზე მავნე ფიზიკური ზემოქმედების მხოლოდ ერთი ფაქტია რეგისტრირებული.

აჭარის გარემოს დაცვის სამმართველოში აცხადებენ, რომ ბათუმში ჰაერის დაბინძურების მაჩვენებელი დამაკმაყოფილებელია.
ნუგზარ პაპუნიძე ამბობს, რომ გასულ წელს, მიზნობრივი პროგრამის ფარგლებში, დასახლებულ პუნქტებში ჰაერის დაბინძურების მაჩვენებელი შემოწმდა, თუმცა, მისივე განცხადებით, არსებითი დარღვევები არ დაფიქსირებულა.

„წელსაც დაგეგმილია 18 ნიმუშის აღება დასახლებული პუნქტებიდან. წინასწარ შერჩეული ადგილები არ გვაქვს. თუ შემოგვდის საჩივარი მოსახლეობისგან, ან სატელეფონო შეტყობინება, იმ კონკრეტულ მისამართებზე გავდივართ“.

ლაბორატორიული ანალიზების მიხედვით, ჰაერში აზოტის ოქსიდების, დიოქსიდების და ნახშირჟანგის კონცენტრაცია დგინდება. დადგენილი ნორმის მიხედვით, ჰაერში აზოტის შემცველობა 0,5-ს არ უნდა აღემატებოდეს, ჭვარტლის, ანუ შავი ნახშირბადის შემცველობა კი – 0,15-ს. 

აღნიშნული ნორმები გასულ წელს სამმა საწარმომ დაარღვია. „აქედან ერთი, ზეთის ქარხანა მენეჯმენტში შექმნილი პრობლემების გამო გაჩერებულია. ხელვაჩაურში იყო მტვრის გადამეტების შემთხვევა სამშენებლო მასალების საწარმოს მიერ, თუმცა ეს პრობლემაც გამოსწორებულია, რადგან საწარმო ბუნებრივ აირზე გადავიდა და, შესაბამისად, დაბინძურების მაჩვენებელი საგრძლობლად შემცირებულია. ჩვენ ვაძლევთ რეკომენდაციებს, რომ შეიძინონ მტვრის დამჭერები და შეამცირონ ჰაერის დაბინძურების მაჩვენებელი“, –  ამბობს ნუგზარ პაპუნიძე.

ქალაქში მწვანე საფარის სიმცირისა და ავტომანქანების რიცხვის ზრდის მიუხედავად, გარემოს დაცვის სამმართველოში აცხადებენ, რომ ჰაერის დაბინძურების მაჩვენებელი ნორმის ფარგლებშია.

„ზაფხულობით, ტურისტული სეზონის დროს, როცა ავტომანქანების რაოდენობა მატულობს ბათუმში, ჰაერის დაბინძურების მაჩვენებელიც იზრდება. ერთადერთი, რაც ამ შემთხვევაში ჩვენ შეგვიძლია გავაკეთოთ, ქუჩების მორწყვაა“, – ამბობს ნუგზარ პაპუნიძე.

გარემოს, მათ შორის ჰაერის დაბინძურების მაჩვენებელს ქალაქში, სოფლის მეურნეობის სამინისტროს დაქვემდებარებაში არსებული ლაბორატორია ამოწმებს.

თემურ აბაშიძე

„გუშინ, 30 ივნისს, გადავდიოდი საზღვარზე ოჯახთან ერთად, ხუთნი ვიყავით. ჩემს ერთ შვილს უმიზეზოდ არ მისცეს შესვლის უფლება. ვიკითხე, რატომ მოხდა ასე, შენ ამის ადვოკატი ხარო, შენ უნდა გაგცე პასუხიო? და შემაგინა. მე ვუთხარი ოჯახთან ერთად ვარ დ თუ რამე დააშავა, მითხრი, მამა ვარ-მეთქი და კიდევ შემაგინა. მეც შევაგინე და ეს იარაღით წამოვიდა. ჩემს ცოლს ერთხელ დაარტყეს დუბინკა, მეორედ რომ მოუქნიეს, ჩემი შვილი გადაეფარა და მას მოხვდა“, – ამბობს თემურ აბაშიძე.

მისი თქმით, ინციდენტის შედეგად თურქეთის საზღვარზე რამდენიმე საათის განმავლობაში აღარ უშვებდნენ ქართველებს და მეორე მხარეს საქართველოს საბაჟოს წარმომადგენელიც გადავიდა მოსალაპარაკებლად.

ამირან აბაშიძე

18 წლის ამირან აბაშიძეს ყელისა და ყურის არეში სისხლჩაქცევის კვალი აქვს. იგი ამბობს, რომ თურქი მებაჟის რეზინის ხელკეტი მოხვდა. ის ამბობს, რომ საბუთები წესრიგში ჰქონდა.

ინციდენტს შეესწრო თემურ აბაშიძის მეუღლე, ასმათ აბაშიძეც. იგი ამბობს, რომ თურქი მებაჟეები მას უწმაწური სიტყვებით მიმართავდნენ, მან მებაჟეს ჩანთა მოუქნია და საპასუხოდ რეზინის ხელკეტი ჩაარტყეს. „ისეთი სიტყვები მაკადრა, არ შეიძლებოდა მოსმენა.  დუბინკა ჩამარტყა, მეორედ რომ მოიქნია, ბავშვი გადამეფარა და მას მოხვდა“, – ამბობს ასმათ აბაშიძე.

აბაშიძეების ოჯახი, მათივე თქმით, სოციალურად დაუცველია დ ისინი თურქეთში დღიურ სამუშაოზე ხშირად გადადიან. მერაბ აბაშიძე ამბობს, რომ ეს არ არის პირველი შემთხვევა, როცა თურქეთის საბაჟოს თანამშრომლები უხეშად ექცევიან საქართველოს მოქალაქეებს და შეურაცხყოფას აყენებენ მათ.

ასმათ აბაშიძე

აბაშიძეების ოჯახმა რეაგირება თურქეთის საკონსულოს სთხოვა ბათუმში. „საკონსულოსგან ერთ რამეს ვითხოვთ, წესიერი გასვლა იყოს.  მე შეიძლება არ გადავიდე, მაგრამ სხვა გადადის და სერიოზულ შეურაცხყოფას აყენებენ. უწმაწურ სიტყვებს იყენებენ, არ შეიძლება ასე, კანონი ყველა ქვეყნის მოქალაქისთვის კანონი უნდა იყოს“, – ამბობს თემურ აბაშიძე.

თურქეთის საკონსულოში „ბათუმელებს“ უთხრეს, რომ თემურ აბაშიძის ოჯახს სთხოვეს წერილობით მიმართვა და ამის შემდეგ საკონსულო საქმის შესწავლას დაიწყებს. კითხვაზე, მიუმართავთ თუ არა მსგავსი ტიპის საჩივრებით საქართველოს მოქალაქეებს აქამდე, თურქეთის საკონსულოს წარმომადგენელმა განაცხადა, რომ სიტყვიერი დაპირისპირების შემთხვევებზე მიუმართავთ, თუმცა ეს პირველი შემთხვევაა, როცა საქმე ფიზკურ დაპირისპირებას ეხება.

თურქეთის საკონსულო ბათუმში