ნეტგაზეთი • RU

მოქალაქე: თურქეთის საბაჟოზე ტელეფონი წამართვეს და თავში ჩამარტყეს

 

დღეს, 5 ივლისს, მოქალაქე თენგიზ ხალვაში გონიოს პოლიციამ იმასთან დაკავშირებით გამოკითხა, რომ ის საქართველო-თურქეთის საზღვრის კვეთის დროს, სარფის გამშვებ პუნქტზე, თურქეთის ტერიტორიაზე მებაჟემ ფიზიკურად შეურაცხყო.

 

სარფის საბაჟო გამშვები პუნქტი
სარფის საბაჟო გამშვები პუნქტი

თენგიზ ხალვაში აცხადებს, რომ გუშინ ის თურქეთში ოჯახთან ერთად გადადიოდა. „როდესაც მებაჟეს პასპორტი მივაწოდე ამ დროს ტელეფონმა დამირეკა. მე ვლაპარაკობდი ტელეფონზე და ის ამოწმებდა მონაცემებს. რადგან ტელეფონზე ვლაპარაკობდი ამაზე გაბრაზდა, გამომტაცა ჩემივე ტელეფონი და მომაყენა შეურაცხყოფა – ჩემი მობილური ჩამარტყა თავში. მე მივმართე თურქეთის სამართალდამცავებს, მაგრამ არ ვიცი რას გააკეთებენ. ასევე სარფში, ჩვენს გამსვლელ პუნქტზე განვაცხადე ამის შესახებ, მათ გამოიძახეს გონიოს პოლიციის განყოფილება, რომლებმაც წამიყვანეს პოლიციაში“, – წერს თენგიზ ხალვაში პოლიციაში შედგენილ გამოკითხვის ოქმში.

 

მოქალაქის მიერ გონიოს პოლიციაში გამოკითხვის ფაქტს შს სამინისტროშიც ადასტურებენ.

 

ამ კვირაში ეს მეორე შემთხვეაა, როდესაც საქართველოს მოქალაქეები თურქი მებაჟეების მხრიდან ფიზიკურ შეურაცხყოფაზე საჯაროდ აცხადებენ. 30 ივნისს ამის შესახებ თემურ აბაშიძემ განაცხადა.

 

პირველი ინციდენტის შემდეგ, ბათუმში, თურქეთის საკონსულოში განმარტეს, რომ თემურ აბაშიძის საქმის შესწავლას დაიწყებს. საქართველოს საგარეო საქმეთა სამინისტროში კი „ბათუმელებს“ განუცხადეს, რომ ეს პოლიციის პრეროგატივაა. იქედან გამომდინარე, რომ დღეს არასამუშავო დღეა, მეორე ინციდენტის შესაფასებლად ვერც ერთ ამ უწყებას ვერ დავუკავშირდით.

ნეტგაზეთის მასალების სხვა გამოცემებში გადაბეჭდვის წესი
netgazeti.ge