Batumelebi

სტუდენტებს, რომლებმაც მატარებლით მგზავრობის დროს სპეციალური შეღავათით ვერ ისარგებლეს და მატარებლის ბილეთში სრული ფასი გადაიხადეს, გადახდილი თანხის ნახევარს უკან დაუბრუნებენ.

„საქართველოს რკინიგზის“ საზოგადოებასთან ურთიერთობის სამსახურში განმარტავენ, რომ სტუდენტებმა წერილობით „საქართველოს რკინიგზას“ უნდა მიმართონ ბილეთების შეძენის სალაროებში და პირადობის მოწმობის, ასევე შეძენილი ბილეთის ასლი უნდა დატოვონ. მათ შეძენილი ბილეთის 50 პროცენტი მითითებულ საბანკო ანგარიშზე ჩაერიცხებათ.

„სტუდენტებისთვის სპეციალური შეღავათი არც გაუქმებულა, არასწორი ინფორმაცია გავრცელდა მედიით,“ – ამბობს დაჩი ცაგურია, „საქართველოს რკინიგზის“ საზოგადოებასთან ურთიერთობის სამსახურის უფროსი. მისი თქმით, 19 თებერვალს ტექნიკური ხარვეზი დაფიქსირდა პროგრამაში, რის გამოც სტუდენტებმა სპეციალური შეღავათით, რაც 50-პროცენტიან ფასდაკლებას გულისხმობს თითოეულ ბილეთზე, ვერ ისარგებლეს.

„საქართველოს რკინიგზის“ განმარტებით, ამ დროისთვის ხარვეზი აღმოფხვრილია და სტუდენტებს ისევ შეუძლიათ ისარგებლონ ე.წ. სტუდენტური ფასდაკლებით.

„ბათუმელების“ ინფორმაციით, ხელვაჩაურის გზატკეცილზე, ერთ-ერთ ვულკანიზაციაში, სატვირთო მანქანის ბორბლის გახეთქვის შედეგად კაცი დაზიანდა. თვითმხილველების თქმით, დარტყმის ძალამ მამაკაცი რამდენიმე მეტრის მანძილზე გადააგდო და მას, სავარაუდოდ, სხვადასხვა სახის მოტეხილობა აქვს, ასევე აღენიშნება ღია ჭრილობები.

ადგილზე უკვე იმყოფებიან სასწრაფო დახმარების ბრიგადა და საპატრულო პოლიცია.

მარიხუანას დეკრიმინალიზაცია ბევრ დეტალს გულისხმობს, ზუსტად იცი რა დოზის ტარება როგორ ისჯება? დაშვებულია თუ არა შენახვა-კულტივაცია? რა პრაქტიკა არსებობს ამ მხრივ მსოფლიოში? გაეცანი ტესტს და გაიგე რა იცი მარიხუანაზე.

ამ წუთებში ბათუმში, აჭარის მთავრობის სახლთან, „ერთიანი ნაციონალური მოძრაობის“ აქცია მიმდინარეობს.  აქციის მონაწილეები საქართველოს ყოფილი პრემიერ-მინისტრის, ბიძინა ივანიშვილის მიერ მრავალწლოვანი ხეების ამოთხრას აპროტესტებენ. აქციაზე იმყოფება საქართველოს პარლამენტის ყოფილი ვიცე-სპიკერი,  მურმან დუმბაძეც. ის ამბობს, რომ წინააღმდეგია ხეების გლეჯვის და სწორედ ამიტომ მივიდა აქციაზე პოზიციის გამოსახატად.

აქციის მონაწილეები აჭარის მთავრობის თავმჯდომარესთან შეხვედრას ითხოვენ.

„თუ არ გამოვა ათ წუთში, უმაღლესი საბჭოს წევრები შევალთ და მოვითხოვთ შეხვედრას,” –  განაცხადა ელგუჯა ბაგრატიონმა, აჭარის უმაღლესი საბჭოს დეპუტატმა „ერთიანი ნაციონალური მოძრაობიდან“.

მურმან დუმბაძე აქციაზე ფოტო: ცაგო კახაბერიძე 27.02.2018

ბათუმში, ფიროსმანის ქუჩაზე, ბათუმის სასპორტო სკოლის წინ, ახლახან ლითონის კონსტრუქცია ააგეს, სადაც ავტომანქანებს აჩერებენ. აქ თავის ავტომანქანას აჩერებს საქართველოს პარლამენტის წევრი, მუხრან ვახტანგაძე. ავტოფარეხი ბოქლომით იკეტება.

„ეს ავტოფარეხი კომპანია „ორბს“ ვთხოვეთ და გაგვიკეთა. ერთი მანქანა ჩვენია და ერთიც, როცა აქ არის მუხრანი [ვახტანგაძე], ადგილი არის და აჩერებს, კი,“ – გვითხრა სატელეფონო საუბარში „ბათუმის სასპორტო სკოლის“ დირექტორმა, ირმა ნიჟარაძემ. მუხრან ვახტანგაძე ამ სასპორტო სკოლის დირექტორი იყო 2015 წელს. 2017 წელს შევსებულ ქონებრივ დეკლარაციაში მუხრან ვახტანგაძეს უწერია, რომ ამავე სკოლაში  ფიზმომზადების მწვრთნელად მუშაობს.

კომპანია „ორბი“ სასპორტო სკოლის უკან სასტუმრო კომპლექსს აშენებს, რისთვისაც აჭარის მთავრობამ კომპანიას სასპორტო სკოლის ფლიგელები და გარკვეული ტერიტორია გადასცა.

ბათუმში, ფიროსმანის ქუჩაზე, ტერიტორია, სადაც სასპორტო სკოლა დგას და რომლის წინ ავტოფარეხია მოწყობილი, აჭარის ავტონომიური რესპუბლიკის საკუთრებაა და მას აიპ „ბათუმის სასპორტო სკოლა“ სარგებლობს.

პარლამენტარ მუხრან ვახტანგაძის  2017 წლის სექტემბრის თვეში შევსებული ქონებრივი დეკლარაციის მიხედვით მუხრან ვახტანგაძეს მსუბუქი ავტომანქანა „ტოიოტა პრადო“ 2016 წელს, განვადებით – 36 ათას აშშ დოლარად შეუძენია. ამავე დეკლარაციით, პარლამენტარს საკუთრებაში აქვს საცხოვრებელი სახლი და მიწის ნაკვეთი ხელვაჩაურის მუნიციპალიტეტის სოფელ ახალსოფელში, ხოლო ბინა თბილისში.

მუხრან ვახტანგაძის მეუღლეს 2017 წელს საჩუქრად მიუღია ბინა ბათუმში, გორგილაძის ქუჩაზე.

2017 წელს მუხრან ვახტანგაძის ქონებრივ დეკლარაციაში კიდევ ერთი შენაძენი ჩანს – მისი 20 წლის შვილს ავტომანქანა BMW შეუძენია 8 500 დოლარად.

ყოფილი ოლიმპიური პრიზიორი მუხრან ვახტანგაძე საქართველოს ბოლო მოწვევის პარლამენტის წევრია. ის დეპუტატის უფლებამoსილების განხორციელებას 2016 წლის ნოემბრიდან შეუდგა.

კონკურსს სამოქალაქო განათლების პედაგოგთა ფორუმი აცხადებს. გამარჯვებულის დაჯილდოება გაიმართება ეროვნულ კონფერენციაზე  2018 წლის 9 ივნისს.
ღონისძიება იმართება პროგრამა „მომავლის თაობის” ფარგლებში, რომელსაც ახორციელებს ორგანიზაცია PH International აშშ-ის საერთაშორისო განვითარების სააგენტოს (USAID) დაფინანსებით.

ჯილდოს სახით გამარჯვებულ პედაგოგს ფორუმი გადასცემს მადლობის სიგელსა და ფორუმის ლოგოს გამოსახულებით სპეციალურად დამზადებულ სახელობით პრიზს წარწერით – „სამოქალაქო განათლების წლის საუკეთესო პედაგოგი – 2017“.

2017 წლის საუკეთესო პედაგოგები გამოვლინდებიან საქართველოს 11 რეგიონში: კახეთში, თბილისში, ქვემო ქართლში, შიდა ქართლში, სამცხე-ჯავახეთში, იმერეთში, სამეგრელო-ზემო სვანეთში, გურიაში, აჭარაში, რაჭა-ლეჩხუმსა და მცხეთა-მთიანეთში.

დაინტერესებულმა პედაგოგებმა უნდა შეავსონ განაცხადის ფორმა. განაცხადის წარდგენა შესაძლებელია 2018 წლის 1-ელი აპრილის ჩათვლით. განაცხადის ფორმა მიწოდებული უნდა იყოს ელექტრონული სახით შემდეგი ელფოსტის მისამართზე – info@ctf.org.ge

განაცხადის ფორმა შევსებული უნდა იყოს თანმიმდევრულად, ყველა მოთხოვნის გათვალისწინებით. აქვე მითითებული უნდა იყოს სულ მცირე ორი რეკომენდატორი პირი.

დაჯილდოებისას ფასდება მხოლოდ  2017 კალენდარული წლის მანძილზე გაწეული საქმიანობა, კერძოდ:

• პროფესიული განვითარების მიმართულებით გაწეული საქმიანობა;
  • პედაგოგის მიერ დამხმარე სახელმძღვანელოების: „როგორ გავხდე აქტიური მოქალაქე“, „თანამშრომლობა საზოგადოებრივი სარგებლისათვის“, თანამშრომლობა ადგილობრივ ხელისუფლებასთან და მედიასთან“ და „მონაწილეობა სკოლის თვითმმართველობაში“ გამოყენება საგაკვეთილო პროცესში, სკოლაში სამოქალაქო განათლების სწავლების ხარისხის ამაღლების მიზნით;
  • მოსწავლეების მიერ სამოქალაქო განათლების გაკვეთილზე მიღებული ცოდნის პრაქტიკაში გამოყენების ხელშეწყობა პედაგოგის მიერ (პროექტული სწავლება).

ბათუმის მერიის ოფიციალური ინფორმაციით, ბათუმში, ბაქოს ქუჩაზე დაგეგმილი ესტაკადის მშენებლობის გამო პირველი მარტიდან მუნიციპალური ავტობუსების გადაადგილების მარშრუტები შეიცვლება.

? #2 მუნიციპალური ავტობუსი მოძრაობდა ადლიის, სვიშევსკის, ინასარიძის, ფიროსმანის, ჭავჭავაძისა და ბაქოს ქუჩებზე, თამარ მეფის გამზირსა და თამარის დასახლებაში.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#2 მუნიციპალური ავტობუსი – თბ. მოედანი, ჭავჭავაძის, ფიროსმანის , ინასარიძის, ხიმშიაშვილის, კაჩინსკების, ადლიის, კაჩინსკების, ხიმშიაშვილის, გორგილაძისა და ბარათშვილის ქუჩებსა და თბ. მოედნამდე.

#2 ა მუნიციპალური ავტობუსი – თბ. მოედანი, ბარათაშვილის, გორგილაძის, ხიმშიაშვილის, კაჩინსკების, ადლიის, კაჩინსკების, ხიმშიაშვილის, ინასარიძის, ფიროსმანისა და ჭავჭავაძის ქუჩებზე თბ. მოედნამდე.

? #3 მუნიციპალური ავტობუსი მოძრაობდა ადლიის, კაჩინსკების, ხიმშიაშვილის, გორგილაძის, ბარათაშვილის, წერეთლის, მაიაკოვსკისა და ნონეშვილის ქუჩებზე, თამარ მეფის გამზირსა და თამარის დასახლებაში.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#3 მუნიციპალური ავტობუსი – თბ. მოედანი, ბაქოს, შავშეთის, მაიაკოვსკისა და ნონეშვილის ქუჩები, თამარ მეფის გზატკეცილი და თამარის დასახლება. უკუმიმართულება იგივე.

? #8 მუნიციპალური ავტობუსი მოძრაობდა აღმაშენებლის, ტაბიძის, ლეონიძის, ორბელიანის, ჯავახიშვილის, ჭავჭავაძის, მაიკოვსკისა და გოგოლის ქუჩებზე, თამარ მეფის გზატკეცილსა და მახინჯაურში.

უკუმიმართულება – მახინჯაური, თამარ მეფის გზატკეცილი, გოგოლის, მაიაკოავსკის, შავშეთის, ბაქოს, ჭავჭავაძის, ჯავახიშვილის, ორბელიანის, ლეონიძისა და აღმაშენებლის ქუჩები.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#8 მუნიციპალური ავტობუსი – ჯავახიშვილის, პუშკინის, შარტავას, აბუსერიძის, ჭავჭავაძის, მაიაკოვსკისა და გოგოლის ქუჩები, თამარ მეფის გზატკეცილი და მახინჯაური.
უკუმიმართულება – მახინჯაური, თამარ მეფის გზატკეცილი, ნონეშვილის, მაიაკოვსკის, შავშეთის, ბაქოს, ჭავჭვაძის, აბუსერიძის, შარტავას, პუშკინის, ჯავახიშვილის, ბაგრატიონის, ლერმონტოვის, ორბელიანისა და ჯავახიშვილის ქუჩებზე.

? #10 მუნიციპალური ავტობუსი მოძრაობდა აეროპორტიდან, კაჩინსკების, ხიმშიაშვილის, რუსთველის, გოგებაშვილისა და ბაქოს ქუჩებზე, თამარ მეფის გზატკეცილსა და მახინჯაურში. უკიმიმართულება იგივე.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#10 მუნიციპალური ავტობუსი – აეროპორტიდან, კაჩინსკების, ხიმშიაშვილის, რუსთველის, გოგებაშვილისა და ბაქოს ქუჩებზე, თამარ მეფის გზატკეცილზე ბათუმი ცენტრალის(რკინიგზის სადგური) მიმართულებით. უკიმიმართულება იგივე.

? #12 მუნიციპალური ავტობუსი მოძრაობდა გოგოლის (მეტროს ავტოასადგური), მაიაკოვსკის, წერეთლის, ჭავჭავაძის, აბუსერიძისა და ხალვაშის (ხელვაჩაური) ქუჩებზე. უკუმიმართლება იგივე.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#12 მუნიციპალური ავტობუსი – თბ. მოედანი, ჭავჭავაძის, აბუსერიძისა და ხალვაშის (ხელვაჩაური) ქუჩები. უკუმიმართულება იგივე

? #16 მუნიციპალური ავტობუსი მოძრაობდა გოგოლის (მეტროს ავტოასადგური), მაიაკოვსკის, წერეთლის, ჭავჭავაძისა და აბუსერიძის ქუჩებზე, აეროპორტის გზატკეცილზე, აფსაროსისა და ანდრია პირველწოდებულის ქუჩებსა და სარფში. უკუმიმართულება იგივე.

მუნიციპალური ავტობუსი ახალი მარშრუტით იმოძრავებს შემდეგი მიმართულებით:

#16 მუნიციპალური ავტობუსი – თბ.მოედანი, ჭავჭავაძისა და აბუსერიძის ქუჩები, აეროპოპრტის გზატკეცილი, აფსაროსისა და ანდრია პირველწოდებულის ქუჩები სარფის მიმართულებით.

კომპანია „ბათუმის წყალი” ქალაქის სამი სხვადასხვა უბნისთვის მიწოდებული და გახარჯული წყლის საერთო რაოდენობების შედარების მიზნით, ნულოვანი ტესტირების ჩატარებას გეგმავს.

ტესტირების სამუშაოების ჩატარების ფარგლებში, წყალმომარაგების მიწოდება დღეს, 00:00-დან 05:00 სთ-მდე, შეუწყდება: ლადო ასათიანის, სულხან-საბა ორბელიანისა და გრიგოლ ფერაძის ქუჩებს.

სელიმ ხიმშიაშვილისა და ლუკა ასათიანის ქუჩებს, ჭავჭავაძის, პუშკინის, გ. ბრწყინვალის, ჩაიკოვსკის, მამია კომახიძის, ოსტროვსკისა და ბაგრატიონის ქუჩების მონაკვეთში.

ასევე, სელიმ ხიმშიაშვილის ქუჩას – ჭავჭავაძიდან სულხან-საბა ორბელიანის ქუჩამდე. 26 მაისის ქუჩას – ჭავჭავაძიდან ბაგრატიონის ქუჩამდე.

ლუკა ასათიანის ქუჩას – ჭავჭავაძიდან მამია ვარშანიძის ქუჩამდე, ლერმონტოვის ქუჩას – ბაგრატიონიდან სულხან-საბა ორბელიანის ქუჩამდე.

გენ. აბაშიძის ქუჩას – ვარშანიძიდან სულხან-საბა ორბელიანის ქუჩამდე, ჰ. აბაშიძის, მელიქიშვილისა და ვაჟა-ფშაველას ქუჩებს – ჭავჭავაძიდან ლადო ასათიანის ქუჩამდე.

ზემოაღნიშნულ ქუჩებზე ნულოვანი ტესტის ჩატარების შემდეგ, „ბათუმის წყალს“ ექნება ზუსტი მონაცემები მოსახლეობის მიერ გამოყენებული და სხვადსხვა დაზიანებისა თუ მცირე გაჟონვის შედეგად დაკარგული წყლის საერთო რაოდენობის შესახებ.

აჭარის ჯანდაცვის სამინისტრო 2008 წელს რუსული აგრესიის შედეგად და 2012 წელს ავღანეთში დაღუპული მეომრების დედებსა და მეუღლეებს,  დედის დღესთან დაკავშირებით, 1000-1000 ლარს გადასცემს.

სამინისტროს ინფორმაციით, „თანხა გადაეცემა 14 დედას და 7 მეუღლეს“. აგვისტოს ომის 10 წლისთავთან დაკავშირებით კი, ჯანდაცვის სამინისტრო დაღუპული ჯარისკაცების ოჯახებს დამატებით 3 000-3 000 ლარსაც გადასცემს.

საფრანგეთის ეროვნული მემცენარეობის ბიბლიოთეკის დირექტორი, დანიელ ლეჟენი,  ფრანგულ გამოცემა Le Figaro-ს დიდი, თეთრყვავილიანი მაგნოლიას ისტორიას უამბობს, რომელიც ევროპაში ჩრდილოეთ ამერიკიდან გავრცელდა XVIII საუკუნეში.

1703 წელს, იმ პერიოდში განთქმულმა ბოტანიკოსმა, მამა ჟაკ პლუმიერმა, ლუიზიანაში ექსპედიციის დროს აღწერა პრიალა, გამძლეფოთლებიანი ხე დიდი, თეთრი და სურნელოვანი ყვავილებით.

ჟაკ პლუმიერმა მოყვავილე ხეს „მაგნოლია“  ცნობილი ბოტანიკოსის, პიერ მაგნოლის (1638-1715) პატივსაცემად უწოდა, რომელიც მონპელიეს ბაღის განაშენიანებას ხელმძღვანელობდა.

   პიერ მაგნოლი

დიდყვავილებიანი მაგნოლიას (Magnolia grandiflora) პირველი, ცოცხალი ეგზემპლარის საფრანგეთში ჩაღწევამდე დიდი დრო გავიდა მამა ჟაკ პლუმიერის აღწერის შემდეგ.

ნანტის მერმა, რენე დერკისტადმა, 1711 წელს ჩაატანინა მაგნოლიას თესლი და ახალ გარემოში გაახარა, მელარდიერის შატოს ორანჟერეაში, ტორფიან ნიადაგში. დიდი ძალისხმევის მიუხედავად, პირველ ჯერზე მაგნოლიამ ჭკნობა დაიწყო. ქალაქ ნანტის მერის ცოლმა ეგზოტიკური მცენარე სხვა ადგილას გადარგო, სადაც კარგად იხარა.

დანიელ ლეჟენი Le Figaro-სთან საუბრისას აღნიშნავს, რომ დერკისტადის ცოლის ძალისხმევა რომ არა, დასაფიქრებელია მაგნოლია გავრცელდებოდა თუ არა საფრანგეთსა და საერთოდ, ევროპაში.

თუმცა საფრანგეთის ეროვნული მემცენარეობის ბიბლიოთეკის დირექტორი თავადვე პასუხობს შეკითხვას და ამბობს, რომ მაგნოლია მაინც გავრცელდებოდა ევროპაში, რადგან ზუსტად ამავე პერიოდში, მე-18 საუკუნის პირველ ნახევარში, კანადის გენერალ-გუბერნატორმა, როლან მიშელ ბარინმა, Magnolia grandiflora-ს თითქმის იგივე, ოღონდ მეტად ყინვაგამძლე ჯიშის ნერგი ჩაიტანა საფრანგეთში.

არსებობს მაგნოლიას 80-მდე სახეობა, ნაწილი ჩრდილოეთ ამერიკაში იზრდება, ზოგიც სამხრეთ-აღმოსავლეთ აზიაში, მრავლდება როგორც თესლით, ასევე კალმით. საქართველოში უმეტესწილად გავრცელებულია Magnolia grandiflora  – დიდყვავილიანი მაგნოლია. მოყვავილე ხეს ვხვდებით შავი ზღვის სანაპირო ზოლში, თბილისში, ქუთაისსა და წინანდალში.

ბათუმში მაგნოლიები ძირითადად მე-19 საუკუნის დასასრულსა და მე-20 საუკუნის დასაწყისში დაურგავთ. ბულვარის ტერიტორიაზე მაგნოლიას 518 ხეა აღრიცხული.დიდყვავილიანი მაგნოლიას გარდა ბათუმში „Liliflora Magnolia-შროშანას ფოთოლა მაგნოლიასაც ვხვდებით.

წყარო: Le Figaro

ამავე თემაზე: მაგნოლიების ისტორია ბათუმში

ბათუმის ბოტანიკური ბაღი უცხო ქვეყნის მოქალაქეებისთვის ბილეთის საფასურს 7 ლარით აძვირებს. 2018 წელს უცხოელი ტურისტები ბოტანიკურ ბაღში 8 ლარის ნაცვლად 15 ლარად შევლენ. ბაღის ადმინისტრაციაში აცხადებენ, რომ უცხოელებისთვის განსხვავებული ფასის შესახებ გადაწყვეტილება საერთაშორისო პრაქტიკის გათვალისწინებით მიიღეს.  ადგილობრივი მოსახლეობისთვის ფასი შენარჩუნდა და მათ ბაღში შესვლა 8 ლარად შეეძლებათ.

როგორც ბოტანიკური ბაღის ადმინისტრაციაში აცხადებენ, დიფერენცირებული ფასები უცხოელებისთვის და ადგილობრივი მოსახლეობისთვის მსოფლიოში მიღებული პრაქტიკაა.

„ჩვენ არ ვფიქრობთ, რომ ფასთა დიფერენცირებით ტურისტებს ხელს შევუშლით, პირიქით, მე პირადად ვარ უცხოეთის სხვადასხვა ქვეყნის ბოტანიკურ ბაღში ნამყოფი და იქაც არსებობს განსხვავებული ფასები. მინიმალური ფასი კი 7-8 ევროა,“ – ამბობს ბოტანიკური ბაღის დირექტორი, ირაკლი არჩაია.

პრეზენტაციის დროს მათ ასევე მოიყვანეს სხვადასხვა ქვეყნის მაგალითები და აღნიშნეს, რომ საბერძნეთში აკროპოლისის დათვალიერება ზრდასრულებისთვის 20 ევრო ღირს, ხოლო ადგილობრივი მოსახლეობა 50-პროცენტიანი ფასდაკლებით სარგებლობს.

„ინგლისში რეგიონების მიხედვით არსებობს ფასების დიფერენცირება, ესპანეთში 23 ევრო ღირს უცხოელებისთვის, ადგილობრივებისთვის კი – 15 ევრო.

ჩვენ დიფერენცირებული ფასები ადგილობრივ დონეზეც გვაქვს, ოკაცეს კანიონზე, სათაფლიას, პრომეთეს მღვიმეში, მარტვილის კანიონზეც განსხვავებული ფასებია უცხოელებისთვის,“ – ამბობენ ბოტანიკური ბაღის წარმომადგენლები.

ბაღის დირექტორის თქმით, ქვეყანაში ბოტანიკური ბაღის არსებობა ფუფუნებაა და ის დიდ ხარჯს მოითხოვს.

„ჩვენ ძალიან ბევრი პროექტი განვახორციელეთ და კიდევ ბევრი სიახლე გვაქვს დაგეგმილი. ვეთანხმები იმ პრეტენზიებს, რომ ჩვენი სერვისები შესაძლებელია არ პასუხობდეს არსებულ ფასებს, მაგრამ გარწმუნებთ, რომ ვიზუალიზაციისა და მომსახურების ნაწილში ხარისხი გაუმჯობესდება,“ – ამბობს არჩაია.

მისი თქმით, მიმდინარე წელს ბევრი მნიშვნელოვანი სიახლეა დაგეგმილი: „13 ჰექტარი ტერიტორიის განაშენიანებას ვგეგმავთ, სადაც იქნება საპიკნიკე, საკემპინგე ადგილები, საბავშვო კუთხე, იქნება ბულვარი, სადაც ადამიანებს ოჯახებით შეეძლებათ დროის გატარება და ამისთვის შესაბამისი ინფრასტრუქტურა მოეწყობა.

ამიტომ, ეს პროცესი არის მუდმივად განახლებადი და მას ბევრი ფინანსური რესურსი სჭირდება.“

არჩაიას თქმით, ბოლო წლებია ინფრასტრუქტურული პროექტებისა და ადმინისტრაციული ხარჯები ბოტანიკური ბაღის შემოსავლებიდან იფარება:

„ფასთა პოლიტიკა იმიტომ გადაიხედა, რომ ჩვენი მთავარი ამოცანა არის ბოტანიკური ბაღი იდგეს თავის სიმაღლეზე და იზრუნოს იმაზე, რაც მისი მთავარი დანიშნულებაა, – ეს არის კოლექციებზე ზრუნვა, მუდმივი განახლება და კონსერვაცია, ასევე სამეცნიერო მუშაობა“.

ბაღის ადმინისტრაციის ინფორმაციით, ბოტანიკურმა ბაღმა გასულ წელს 300 ათასამდე ვიზიტორი მიიღო, რაც წინა წლებთან შედარებით 40 პროცენტით მეტია. მათივე ინფორმაციით, ბოტანიკური ბაღის ბიუჯეტში მიმდინარე წელს 4 მილიონ 647 ათასი ლარია გათვალისწინებული.

„ბათუმის ბოტანიკური ბაღი“ ბათუმის მერიის ა(ა)იპ -ია, რომლისთვისაც ქალაქის 2018 წლის ბიუჯეტში 1,17 მილიონი ლარია გათვალისწინებული.

ბათუმში, ფრიდონ ხალვაშისა და აკაკი შანიძის ქუჩების კვეთაში, ერთმანეთს სამი ავტომობილი შეეჯახა, დაშავდა ერთი ადამიანი. სასწარაფო დახმარების  ბრიგადამ ის კლინიკა მედინაში გადაიყვანა. სასწრაფოს ინფორმაციით, დაშავებულს აღენიშნებოდა დაჟეჟილობა გულმკერდის არეში.

შინაგან საქმეთა სამინისტროს ინფორმაციით, ფაქტზე დაწყებულია გამოძიება სისხლის სამართლის კოდექსის 276-ე მუხლის პირველი ნაწილით, რაც გულისხმობს ტრანსპორტის უსაფრთხო მოძრაობის წესის დარღვევას, რამაც გამოიწვია ჯანმრთელობის ნაკლებად მძიმე ან მძიმე დაზიანება – ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით ვადით ორ წლამდე.

დღეს დილით, ბათუმის შემოერთებულ ტერიტორიაზე, განთიადის დასახლებაში, 28 წლის ქალს მატარებელი დაეჯახა. ბათუმის სასწრაფო დახმარების ბრიგადამ ის საავადმყოფოში გადაიყვანა. სასწრაფოს ექიმის ინფორმაციით, ქალი კონტაქტური იყო.

შინაგან საქმეთა სამინისტროს ინფორმაციით ფატზე დაწყებულია გამოძიება სისხლის სამართლის 275-ე მუხლის პირველი ნაწილით, რაც გულისხმობს რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც ჯანმრთელობის ნაკლებად მძიმე ან მძიმე დაზიანება გამოიწვია, ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით ორიდან ხუთ წლამდე.

დღეს, 26 თებერვალს, „ნაციონალური მოძრაობის“ წარმომადგენელმა, რეზო ხარაზმა, ბათუმში ასლან აბაშიძის ცოლისძმის და მისივე ხელისუფლების უშიშროების მინისტრის, სოსო გოგიტიძის ყოფილ ქონებასთან დაკავშირებით ბრიფინგი გამართა.

ქონება, რომელიც უშიშროების ყოფილ მინისტრს სახელმწიფომ ასლან აბაშიძის ხელისუფლებიდან წასვლის შემდეგ ჩამოართვა, 2016 წლის 29 დეკემბერს, სოსო გოგიტიძის დისშვილს, ენვერ ცეცხლაძეს სასამართლო განჩინებით სახელმწიფომ დაუბრუნა.

ამის შესახებ „ბათუმელები“, 23 თებერვალს წერდა. 

„ამ ყველაფრიდან ჩანს, რომ ქვეყანაში სერიოზული პრობლემები და აბსურდის თეატრია რეალურად, რადგან ვიცით, რა ფორმით ითვისებდნენ ასლან აბაშიძის დროს მაღალჩინოსნები ქონებას.

მთავარი აქ არის ის, თუ რატომ მაინც და მაინც სპეცსამსახურის შენობა შეირჩა. ეს არის პირდაპირ რევანშისტული ძალა, რადგან ის პიროვნებები, რომლებიც რეალურად დგანან ენვერ ცეცხლაძის უკან, აძლიერებენ რუსულ გავლენებს, რუსულ ძალას ქვეყანაში და რომლებიც აჭარაში რეალურად მოქმედებდნენ  თავის დროზე,“ – ამბობს რეზო ხარაზი.

რეზო ხარაზის თქმით, აჭარის მთავრობს თავმჯდომარე ამ და სხვა გარემოებებით, აჭარაში რუსულ გავლენებს აძლიერებს. „უკვე მკაფიოდ ჩანს ეს ტენდენცია, რადგან ზურაბ პატარაძემ ადვილად მოახდინა ასლან აბაშიძისდროინდელი ჩინოვნიკების ინტეგრირება სახელმწიფო სამსახურში… ამის მაგალითია თუნდაც აჭარის განათლების მინისტრის მოადგილედ ბადრი ნაკაშიძის დანიშვნა.“