ბათუმის მერია ისტორიული სახლების გამოსყიდვაზე

ძველ ბათუმში, ზვიად გამსახურდიას #11-ში მდებარე ორსართულიანი სახლი აჭარის მთავრობის თავმჯდომარემ, ზურაბ პატარაძემ, პირველ წარმატებულ მაგალითად დაასახელა, როცა ბათუმის მერიამ მოახერხა მესაკუთრეებთან შეთანხმება მათ საკუთრებაში არსებული ბინების ალტენატიულ ბინებში გაცვლასთან დაკავშირებით.

სახლი კულტურული მემკვიდრეობის ძეგლი არ არის, თუმცა ძეგლის დაცვის ზონაში მდებარეობს. ამ სახლს დაახლოებით ხუთი წლის წინ ხანძარი გაუჩნდა და სახლის შიდა ნაწილი დაიწვა, რის შემდეგაც მესაკუთრებმა მისი აღდგენა ვერ შეძლეს.

ბათუმის მერის ინფორმაციით, სახლის ცხრავე მესაკუთრესთან მიღწეულია შეთანხმება და მათ მერია ბათუმის საბინაო ფონდიდან ალტერნატიულ ფართობებს მას შემდეგ გადასცემს, რაც საკითხზე საკრებულო იმსჯელებს და დაამტკიცებს. ამის შემდეგ კი მერია შეიმუშავებს ისტორიული სახლის რეაბილიტაციის პროექტს, რომელსაც ინვესტორს შესთავაზებს.

ძველ ბათუმში ისტორიული სახლების მესაკუთრეებისთვის ალტენატიული ფართობების შეთავაზებითა და ამ სახლების შემდეგ კომერციულ ობიექტებად ქცევის პროექტი ბათუმის მერს, ლაშა კომახიძეს ეკუთვნის. ბევრი ამ იდეას ეჭვის თვალითაც უყურებს, თუმცა აჭარის მთავრობის თავმჯდომარე ამტკიცებს, რომ კერძო სექტორიდან ინტერესი არის. მერიაში ჯერჯერობით არ აკონკრეტებენ, რომელმა კომპანიებმა გამოთქვეს პროექტში ჩართვის სურვილი.

იდეის შესახებ, რომ ბათუმის მუნიციპალიტეტი იწყებს ისტორიულ ბათუმში კულტურული მემკვიდრეობის ძეგლების, ასევე, მათ მიმდებარე ფონური ნაგებობების [საწყის ეტაპზე ძეგლის ფიზიკური დაცვის არეალში] ეტაპობრივად გამოსყიდვას, მცხოვრებლებისთვის ალტერნატიული ფართობის შეთავაზების გზით ლაშა კომახიძემ პირველ თებერვალს სასტუმრო „რადისონში“ გამართულ შეხვედრაზე გაახმოვანა. მერის ინფორმაციით, შენობების გამოსყიდვის შემდეგ ეტაპზე შეიმუშავებენ ამ შენობების რეაბილიტაციის პროექტებს, კულტურული მემკვიდრეობის დაცვის სააგენტოს ჩართულობით და ინვესტორებს პირობიან საინვესტიციო წინადადებებს შესთავაზებენ.

ბათუმი, ზვიად გამსახურდიას N11 / 21.02.2018 / ფოტო: ცაგო კახაბერიძე