„ოცნების ქალაქში“ მცხოვრები როინ გუნდაძის თქმით, ბათუმი-ახალციხის მაგისტრალი ნახევარი საათის წინ გადაკეტეს და მხოლოდ სასწრაფო დახმარების მანქანებს ატარებენ: „ჩვენ ვითხოვთ ელექტროენერგიის მოწოდების აღდგენას. შუქი ორი დღის წინ გაგვითიშეს, მთლიანობაში 5 ათასი ლარის დავალიანება გვქონდა, მაგრამ დავალიანების დაფარვის მიუხედავად შუქს მაინც არ გვირთავენ. გვეუბნებიან, რომ თითოეულ ქოხში მცხოვრებმა თანხა – 10-10 ლარი უნდა შევიტანოთ დეპოზიტზე და ისე ჩაგვირთავენ შუქს“.
როინ გუნდაძე ამბობს, რომ მათთან შესახვედრად უკვე მივიდნენ „ენერგო-პრო ჯორჯიას“ წარმომადგენლები.
ეგრეთ წოდებული ოცნების ქალაქი, როგორც მას ხელისუფლება უწოდებს, უკანონოდ შეჭრილების დასახლებაა. თავად აქ მცხოვრები ადამიანები საკუთარ თავს უწოდებენ ეკომიგრანტებს, უსახლკაროებსა ან სოციალურად დაუცველებს. ორ წელზე მეტია აჭარის ხელისუფლებამ ვერ მოახერხა ზუსტი კვლევის დადება, თუ „ვინ არის ეკომიგრანტი და ვინ ამ ჯგუფს მიტმასნილი“.
