ოფიციალური ინფორმაციით, განათლების სამინისტრომ ახალი სასწავლო წლისთვის 2 მილიონ 700 ათასი სასკოლო სახელმძღვანელო შეისყიდა, რომლის საერთო ღირებულება 7 მილიონ 800 ათასი ლარია. პირველკლასელებისთვის და მათი დამრიგებლებისთვის კი 55 ათას 700 ცალი ახალი ნოუთბუქი შეისყიდა. პროექტის ღირებულება 20 მილიონ 720 ათასი ლარია.
საგანმანათლებლო და სამეცნიერო ინფრასტრუქტურის განვითარების სააგენტოს დირექტორის პირველი მოადგილე გიორგი შალუტაშვილის ინფორმაციით, მოსწავლეები ახალი სასწავლო წლისთვის ძველ სახელმძღვანელოებთან ერთად, ახალ სახელმძღვანელოებსაც მიიღებენ.
„მინისტრის ბრძანებით არის განსაზღვრული რა შემთხვევაში ითვლება სახელმძღვანელო ვარგისიანად. სკოლები ამ ბრძანების შესაბამისად ადგენენ წიგნის ვარგისიანობას და ის სახელმძღვანელო, რომელიც აკმაყოფილებს ყველა მოთხოვნას, მეორე წელსაც რჩება გამოყენებაში.
აქედან გამომდინარე, სახელმძღვანელოების ნაწილი მოსწავლეს შეხვდება ახალი, ნაწილი კი მეორადი. არ უნდა მოხდეს ისე, რომ ბავშვების რაღაც ნაწილს სულ ახალი წიგნები შეხვდეს, ნაწილს კი ყველა მეორადი“.
გიორგი შალუტაშვილის ინფორმაციით, ახალი სახელმძღვანელოები და პირველკლასელების კომპიუტერები სკოლებში უკვე დარიგებულია.
„ჩვენ გვყავდა კონტრაქტორი კომპანია, რომელმაც ოფიციალურად გვაცნობა რომ ხელშეკრულებით ნაკისრი ვალდებულებები შეასრულა. ახლა ჩვენი სამსახური შერჩევით ახდენს მონიტორინგს და ამოწმებს ამ ინფორმაციის სიზუსტეს. თუ აღმოჩნდება, რომ რომელიმე სკოლას არ მიუღია წიგნები, ბუნებრივია, კომპანიას მოვთხოვთ რომ ჯეროვნად შეასრულოს ვალდებულება. რაც შეეხება პირველკლასელთა კომპიუტერებს, ის სრულად არის დარიგებული“ – გვეუბნება გიორგი შალუტაშვილი.
განათლების სამინისტროს ინფორმაციით, სკოლებში სასწავლო პროცესი 15 სექტემბერს განახლდება.
