ბათუმში, რუსეთ-საქართველოს ომში დაღუპულ გმირთა მემორიალი მიმდინარე წლის 8 აგვისტოს გაიხსნება. მემორიალი ფაქტობრივად უკვე მოწყობილია და მიმდებარე სკვერის მოწესრიგებაც თითქმის დასრულებული. მერიის ინფორმაციით, 8 აგვისტოს „ასევე დაგეგმილია სხვადასხვა ღონისძიებების ჩატარება, სადაც მოწვეული იქნებიან დაღუპულ გმირთა ოჯახის წევრები“.
მემორიალი ჯავახიშვილის ქუჩაზე, აგვისტოს ომში დაღუპულთა სკვერში მდებარეობს. მის მოწყობაში, ესკიზის ჩათვლით, ბათუმის მერიამ ქალაქის ბიუჯეტიდან 104 764 ლარი დახარჯა. აქედან, 98 409 ლარი ტენდერის გარეშე, გამარტივებული შესყიდვით.
გამარტივებული შესყიდვის საფუძველზე ხელშეკრულება, მემორიალის მოწყობაზე, მერიამ ინდმეწარმე თეიმურაზ მახარაძესთან, მიმდინარე წლის 21 ივნისს გააფორმა.
მერიამ შესაბამისი ნებართვა აჭარის მთავრობის თავმჯდომარისგანაც მიიღო და სახელმწიფო შესყიდვების სააგენტოსგანაც, თუმცა, მემორიალის ესკიზისა და საპროექტო-სახარჯთაღრიცხვო დოკუმენტაციის შედგენაზე მერიამ ტენდერი ისეთ დროს გამოაცხადა და მიწოდების ისეთი ვადები მიუთითა – 8 აგვისტომდე მემორიალის მოწყობა ტენდერის ჩატარებით ვეღარ ესწრებოდა.
„შესაბამისად, ტენდერის მეშვეობით ხელშეკრულების გაფორმების შემდგომ, მიმწოდებლის მიერ ვალდებულების შესრულებისათვის არ რჩება საკმარისი პერიოდი“ – ასე დაასაბუთა მერიამ გამარტივებული შესყიდვა.
რაც შეეხება მემორიალის ესკიზს, ის მერიამ ტენდერით შეისყიდა.
ჯავახიშვის ქუჩაზე უშუალოდ სკვერის კეთილმოწყობას ბათუმის ტურისტული ობიექტების მართვის სააგენტო ახორციელებს.
რუსეთ-საქართველოს ომში დაღუპულთა მემორიალი ბათუმში / 5.08.2017 / თედო ჯორბენაძის ფოტოები
სკვერი ჯავახიშვილის ქუჩაზე / 5.08.2017
