Batumelebi | „მის და მისტერ პლანეტა“ – რაში დახარჯავს ბათუმის მერია 61 ათას ლარს „მის და მისტერ პლანეტა“ – რაში დახარჯავს ბათუმის მერია 61 ათას ლარს – Batumelebi
RU | GE  

„მის და მისტერ პლანეტა“ – რაში დახარჯავს ბათუმის მერია 61 ათას ლარს

ბათუმის მერმა, გიორგი ერმაკოვმა  3 აგვისტოს, ხელი მოაწერა ბრძანებას, რომლითაც მერიის აპარატის შესყიდვების განყოფილებას კონკურსის – „Miss & Mister Planet“-ის ორგანიზებისთვის დაევალა:

  • გამარტივებულ შესყიდვაზე თანხმობის მიღების მიზნით სახელმწიფო შესყიდვების სააგენტოსათვის მიმართვა;
  • სააგენტოს თანხმობის შემთხვევაში კი, კონკურსის ორგანიზების გამარტივებული შესყიდვით განხორციელების ღონისძიებების გატარება.

ბათუმის მერიამ შესყიდვების სააგენტოს გუშინვე მიმართა. მერია სააგენტოსგან ითხოვს თანხმობას, რათა კონკურსის ორგანიზების მიზნით ხელშეკრულება ტენდერის გარეშე გააფორმოს შპს „მის პლანეტა-საქართველოსთან“.

პროექტის საერთო ღირებულება 60 967 ლარია. შესყიდვების სააგენტომ მერიას ხელშეკრულების გაფორმებაზე პასუხი 9 აგვისტომდე უნდა გასცეს.

კონკურსის ფარგლებში ბათუმში დაგეგმილი ღონისძიებები და ხარჯთაღრიცხვა [შპს „მის პლანეტა-საქართველოს“  წერილის მიხედვით]:

  • 12 სექტემბერი – „ნაციონალური სამოსის ტური“ – 5 750 ლარი;
  • 13 სექტემბერი – „FESHION SHOW“ და საცურაო კოსტიუმების ტური – 5 250 ლარი;
  • 14 სექტემბერი – ტალანტ შოუ – 4 500 ლარი;
  • 16 სექტემბერი – ფინალი – 45 467 ლარი.

შპს მის პლანეტა-საქართველოს წერილი

„მიმდინარე წლის 28 ივლისს, შპს „მის პლანეტა-საქართველომ“ ქ. ბათუმის მერიაში წარმოადგინა დოკუმენტაცია, რომლითაც დგინდება, რომ სავაჭრო მარკის – „Miss Planet“ და „Mister Planet“  მფლობელი ირინა პაპაზოვა შპს „მის პლანეტა-საქართველოს“ ანიჭებს უფლებამოსილებას, ორგანიზება გაუწიოს მსოფლიო სილამაზის კონკურსის „Miss & Mister Planet“-ის ქალაქ ბათუმში ჩატარებას.

აღნიშნულიდან გამომდინარე, კონკურსის – „Miss & Mister Planet“-ის ორგანიზების გაწევა შპს „მის პლანეტა-საქართველოს“ ექსკლუზიური უფლებაა და კონკურსის ფარგლებში დაგეგმილი ღონისძიებების ორგანიზება, ტენდერის გამოცხადების შემთხვევაში ვერ იქნება უზრუნველყოფილი სხვა მიმწოდებლის მიერ… მიზანშეწონილია კონკურსის ორგანიზების სახელმწიფო შესყიდვა განხორციელდეს გამარტივებული შესყიდვით, კერძოდ, გაფორმდეს შესაბამისი ხელშეკრულება შპს „მის პლანეტა-საქართველოსთან“ – აღნიშნულია ბათუმის მერიის განაცხადში.


ბათუმის საკრებულომ მოდის კვირეულის – „აჭარა ფეშენ ვიკის“ და „მის და მისტერ პლანეტას“ ჩატარებას, შესაბამისად, ქალაქის ბიუჯეტიდან, ჯამში 91 ათასი ლარის დახარჯვას, მხარი მიმდინარე წლის 5 ივლისს დაუჭირა.

ამ თემაზე:

ბათუმის საკრებულოს წევრები „აჭარა ფეშენ ვიკის“ გახსნაზე

რას ფიქრობენ ბათუმში „მის და მისტერ პლანეტას“ ბიუჯეტიდან დაფინანსებაზე

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com