პეტრას ციხის მუზეუმ-ნაკრძალში ციხის რეაბილიტაციის გრძელვადიანი გეგმით ინფრასტრუქტურული სამუშაოების დაწყება იგეგმება.
აჭარის ტურიზმისა და კურორტების დეპარტამენტის ინფორმაციით, ციხის მუზეუმ-ნაკრძალში მოეწყობა მისასვლელი გზები, ბილიკები და საექსპოზიციო ნაგებობები. ასევე გაკეთდება ბანერებისა და თვალსაჩინო მასალების განთავსების ადგილები. ციხის პოპულარიზაციის მიზნით ასევე განიხილება ყოველწლიური „არტ ფესტივალი პეტრას“ გამართვის იდეაც.
„აჭარის ტურიზმის დეპარტამენტი პეტრას ციხესიმაგრეს, როგორც რეგიონში ერთ-ერთ მთავარ ტურისტულ ღირსშესანიშნაობას, აქტიურ პოპულარიზაციას როგორც საიმიჯო კლიპებით, ასევე სხვადასხვა სარეკლამო აქტივობებით უწევს… ინფრასტრუქტურის მოწყობის შემდეგ ციხე ტურისტებისთვის უფრო მიმზიდველი გახდება,“ – აცხადებენ დეპარტამენტში.
დეპარტამენტის ინფორმაციით, ციხეზე დაგეგმილ პროექტებს აჭარის ტურიზმის დეპარტამენტის თავმჯდომარე სულხან ღლონტი და აჭარის კულტურული მემკვიდრეობის სააგენტოს ხელმძღვანელი ლაშა ასლანიშვილ ადგილზე გაეცნენ. პეტრას ციხეზე ისინი ედინბურგელ მკვლევარებს – ემანუელე ინტალიატასა და მართა კარლოტა რავიცაას შეხვდნენ. მკვლევარები, ქართველ არქეოლოგ დავით ნასყიდაშვილთან ერთად, პეტრას ციხეზე ბიზანტიური ეპოქის ნაშთებს იკვლევენ.
პეტრას ციხე უძველესი ციხე-ქალაქის ნანგრევებს წარმოადგენს და ის ქობულეთში, სოფელ ციხისძირში, მდებარეობს.
პეტრას ციხე / თედო ჯორბენაძის ფოტოები
ქობულეთის ხედი პეტრას ციხის გალავნიდან
