მსუბუქი ავტომანქანის მძღოლი ქობულეთში ბავშვს დაეჯახა. ბავშვი ამ დროისთვის ქობულეთის რეგიონულ სამედიცინო ცენტრშია გადაყვანილი და მისი მდგომარეობა სტაბილურია. შემთხვევა აღმაშენებლის გამზირზე, პარკის წინ მოხდა.
“მდგომარეობა სტაბილურია, ბავშვს აღენიშნება სხვადასხვა სახის დაჟეჟილობა. მას გონება არ დაუკარგავს,”- უთხრა ქობულეთის რეგიონული სამედიცინო ცენტრის დირექტორმა, რაულ პაქსაძემ “ბათუმელებს”.
საგანგებო სიტუაციების კოორდინაციის და გადაუდებელი დახმარების ცენტრის ქობულეთის რაიონული სამსახურის მენეჯერის, მანონი ბასილიძის თქმით, ბავშვს აღენიშნებოდა ღია ჭრილობა თავის არეში და სამედიცინო ბრიგადამ სხეულზე არსებული დაზიანება შეაფასა, როგორც საშუალო სიმძიმის მქონე.
დაშავებული 13 წლის ბიჭი ქობულეთში სტუმრად იმყოფებოდა.
შინაგან საქმეთა სამინისტროს ინფორმაციით, დაწყებულია გამოძიება 276-ე მუხლის შესაბამისად, რაც ავტოსატრანსპორტო საშუალების ექსპლუატაციის წესების დარღვევას გულისხმობს.
