ბათუმში, მთავრობის სახლთან, 12 მარტის აქციის დროს დაკავებულთა ოჯახის წევრებმა და ახლობლებმა აქცია გამართეს. ისინი მთავრობის თავმჯდომარესთან, ზურაბ პატარაძესთან შეხვედრას ითხოვენ.
„შეწყდეს შერჩევითი სამართალი. ესენი არიან შემთხვევით იმ აქციაზე მოხვედრილები და ვინც წვავდა, ქვებს ისროდა და ვინც მართლა იყო დამნაშავე – ვინ დადის ქუჩაში მასკებით? ეს იყო პროვოცირებული. სად არის მთავრობა? საერთოდ თუ ჰყავს აჭარას მთავრობა? რატომ არ გვაქცევენ ყურადღებას – აი, მოსული ვართ და არავინ არ გამოსულა,“ – თქვა „ბათუმელებთან“ ერთ-ერთი დაკავებულის დედამ, ნინო ვარდიძემ.
„მოვითხოვთ, პატარაძის გამოსვლას და ჩვენს კითხვებზე პასუხის გაცემას. ეს არის შერჩევითი სამართალი, ვითხოვთ საპროცესო გარიგებას. გაუკეთოს ყველას ექვსთვიანები, იმიტომ, რომ თუ იმ ორ დანარჩენებს გაუკეთეს ექვსთვიანები – ყველას ერთი დანაშაული და ერთი პრობლემა აქვს. ყველას ერთნაირად ედავებოდა პროკურატურა. რა შეიცვალა, რა იყო ამის მიზეზი? სრული საფუძველი გამაჩნია პროკურატურას გამოვუცხადო უნდობლობა, ამიტომ გამოვედით და ვაპროტესტებთ,“ – ამბობს რუსუდან დუმბაძე.
აპირებს თუ არა ზურაბ პატარაძე დაკავებულების ოჯახის წევრებთან შეხვედრას? – აჭარის მთავრობის პრესსამსახურში „ბათუმელებს“ უთხრეს, რომ ზურაბ პატარაძე ამჟამად ქობულეთში იმყოფება და აქციის მონაწილეებს ოთარ დიასამიძე შეხვდა, მთავრობის იურიდიული დეპარტამენტის წარმომადგენელი.
