„ნაციონალური მოძრაობის“ წევრის, ნოდარ დუმბაძის განცხადებით, ჯავახიშვილის ქუჩაზე, 82 ნომერში არსებულ საბავშვო ბაღის შენობაში, რომელიც მერიის საკუთრებაა, პროფესიული სასწავლო ცენტრი ფუნქციონირებს. სასწავლო ცენტრს შენობის საიჯარო ხელშეკრულების ვადა გაუვიდა, თუმცა ის მაინც არ ტოვებს შენობას. „ნაციონალური მოძრაობის“ წევრი ამბობს, რომ სასწავლო ცენტრის დირექტორი განათლების მინისტრის მოადგილის, ბადრი ნაკაშიძის ბიძას, რეზო ნაკაშიძეს ეკუთვნის.
„შპს „ახალგაზრდობის“ დირექტორი, რეზო ნაკაშიძე არის ბადრი ნაკაშიძის ბიძა და ჩვენ ვფიქრობთ, რომ სწორედ მას უწევენ ანგარიშს და ამიტომ არ ხდება აღსრულება. ამ უბანში ბავშვების რაოდენობა იზრდება, მშობლები ვერ ახერხებენ შვილების ბაღში მიყვანას იმის გამო, რომ ბაღის ნაწილი „ახალგაზრდობას“ აქვს დაკავებული,“-ამბობს ნოდარ დუმბაძე.
მერიასა და შპს „ახალგაზრდობას“ შორის სასამართლო დავა რამდენიმე წელია მიმდინარეობს. ბათუმის მერიის საფინანსო ეკონომიკური სამსახურის, ქონების მართვისა და განკარგვის განყოფილების უფროსის, რეზო ხახვას თქმით, მერიამ შპს „ახალგაზრდობასთან“ სასამართლო დავა მოიგო, თუმცა სასწავლო ცენტრი შენობის დატოვებას მაინც არ აპირებს.
„მე მგონი ნოემბრიდან არის სასამართლო გადაწყვეტილება აღსრულებაზე გადაცემული. როცა გამოათავისუფლებენ შენობას, შემდეგ მოხდება შენობის რეაბილიტაცია,“-აცხადებს ის.
შპს „ახალგაზრდობის“ დირექტორი, რეზო ნაკაშიძე „ბათუმელებთან“ საუბარში ამბობს, რომ ჯერ სასამართლო დავა დასრულებული არ არის, რადგან მათ სააპელაციო სასამართლოს გადაწყვეტილება გაასაჩივრეს.
რეზო ნაკაშიძის თქმით, მერიასთან საიჯარო ხელშეკრულება 2013 წელს გაფორმდა, თუმცა მერიამ დაარღვია ხელშეკრულების პირობები.
„ხელშეკრულება იყო ათწლიანი და ვადა გავიდა, მაგრამ შენობას იმიტომ არ ვტოვებთ, რომ მერიამ არაერთხელ შეგვიშალა ხელი ფუნქციონირებაში, ცხრაასჯერ გაგვიზარდა საიჯარო თანხა. ამჟამად ყოველწლიურად 8 ათას ლარს ვუხდით მერიას,“-ამბობს რეზო ნაკაშიძე.
რაც შეეხება მისი და მინისტრის მოადგილის ნათესაობას, რეზო ნაკაშიძე ამბობს, რომ ბადრი ნაკაშიძე ნამდვილად მისი ნათესავია, თუმცა ამ საქმესთან მას შეხება არ აქვს.
„არის ჩემი ნათესავი, ბიძად ვეკუთვნი, მაგრამ ბადრი ნაკაშიძემდე მე ვიყავი აჭარა-გურიის პროფესიული განათლების რეგიონალური სამმართველოს ხელმძღვანელი, ვიყავი აჭარის განათლების სამინისტროს კოლეგიის წევრი, ქალაქის საბჭოს დეპუტატი, ვარ მეცნიერებათა აკადემიის წევრი, ასე რომ, ეს ყველაფერი უბრალოდ არ მაქვს მოპოვებული,“-გვეუბნება ის.
რეზო ნაკაშიძე ამბობს, რომ ისინი ამ ხნის მანძილზე მერიის ზეწოლის ქვეშ მუშაობდნენ და ამ დავას საბოლოოდ სასამართლო გადაწყვეტს.
