2018-2021 წლების საშუალოვადიანი პრიორიტეტები ბათუმის მერიამ შეიმუშავა. მომავალ 4 წელიწადში ბათუმის მერია ერთ-ერთ პრიორიტეტად სპორტის განვითარებას ასახელებს, თუმცა ამისთვის ჯამში 408 390 ლარის დახარჯვას აპირებს.
მერიის პრიორიტეტების საპრეზენტაციო მასალაში წერია, რომ მომავალ 4 წელში უნდა მოეწყოს 2 სპორტული მოედანი მწვანე კონცხის ადმინისტრაციაში, ხოლო თითო-თითო აეროპორტისა და ბონის დასახლებებში.
„ეს არის პირველადი დოკუმენტი. შესაძლოა ეს ციფრები შეიცვალოს და უფრო მეტი სპორტული მოედანი მოეწყოს,“- უთხრა „ბათუმელებს“ ბათუმის მერიის კეთილმოწყობის სამსახურის უფროსმა, თენგიზ პეტრიძემ. ის 4 სპორტული მოედნის მოწყობას იმით ხსნის, რომ ახალი მოედნებისთვის საჭირო ადგილები ამ ეტაპზე შერჩეული არ არის.
