მთავარი,სიახლეები

მთავარი პროკურატურა 10 ახალ ავტომანქანას შეიძენს

11.06.2017 • 2362
მთავარი პროკურატურა 10 ახალ ავტომანქანას შეიძენს

საქართველოს მთავარი პროკურატურა ოპერატიული დანიშნულების 10 ახალ მსუბუქ ავტომანქანას [სედანი] შეიძენს. ახალი ავტომანქანების შესაძენად პროკურატურას ორი ტენდერი აქვს გამოცხადებული, სატენდერო თანხა კი 713 550 ლარია.

მანქანების შესყიდვას მთავარი პროკურატურა ამ ავტომანქანების დამატებით 5-წლიან საგარანტიო სერვისთან ერთად და ამასთან, ჩანაცვლების გზით გეგმავს. ჩასანაცვლებელი ავტომანქანების ღირებულება კი, სატენდერო დოკუმენტების მიხედვით, ჯამში 310 ათასი ლარია, რაც მიმწოდებლებთან ანგარიშსწორებისას ახალი მანქანების შესყიდვაზე გასაფორმებელ სახელშეკრულებო ღირებულებას გამოაკლდება.

C1c3

პროკურატურა 2 ტენდერით შეისყიდის 7 და 3 ავტომანქანას.

სატენდერო წინადადებების ფასი შედგება ორი კომპონენტისაგან: პირველ შემთხვევაში – 7 ერთეული ოპერატიული ავტომანქანის სავარაუდო ღირებულება არ უნდა აღემატებოდეს 425 300 ლარს, ხოლო ამ ავტომანქანების სერვისის ღირებულება [5 წელი ან 150 000 კილომეტრი] არ უნდა აღემატებოდეს 23 520 ლარს 1 წლის განმავლობაში;

3 ავტომანქანის შესყიდვის შემთხვევაში კი, ანალოგიურად – სავარაუდო ღირებულება არ უნდა აღემატებოდეს 131 500 ლარს, ხოლო სერვისის ღირებულება არ უნდა აღემატებოდეს 7 830 ლარს 1 წლის განმავლობაში.

ამასთან, თანმდევი საგარანტიო პირობების ფარგლებში გეგმიური ფასიანი მომსახურების ანგარიშსწორება მოხდება შესრულებული სამუშაოს მიხედვით, ყოველ ჯერზე გაწეული მომსახურების შემდეგ მიღება-ჩაბარების აქტის გაფორმებისა და შესაბამისი საგადასახადო დოკუმენტაციის წარმოდგენის საფუძველზე.

დაფინანსების წყაროა 2017-2022 წლების სახელმწიფო ბიუჯეტი.

ჩასანაცვლებელი ავტომანქანები / ფოტო სატენდერო დოკუმენტებიდან

ჩასანაცვლებელი ავტომანქანები / ფოტო სატენდერო დოკუმენტებიდან

 

 

გადაბეჭდვის წესი


ასევე: