Batumelebi | დაკითხვა ლაკაევის სასამართლო პროცესიდან დაკითხვა ლაკაევის სასამართლო პროცესიდან – Batumelebi
RU | GE  

დაკითხვა ლაკაევის სასამართლო პროცესიდან

 

ეს დაკითხვა გასულ კვირას გაიმართა ბათუმის საქალაქო სასამართლოში. მას ისმენდა მოსამართლე დავით მამისეიშვილი, მონაწილეობდნენ: ადვოკატი – გიორგი ხიმშიაშვილი, პოლიციელი – თამაზ თეთრუაშვილი, განსასჯელი – ფირუზ წულუკიძე. სასამართლო სხდომას არ დასწრებია კიდევ ერთი განსასჯელი, რუსეთის მოქალაქე იუსუფ ლაკაევი. მას რუსი სამართალდამცავები აფხაზეთში დიპლომატის მკვლელობისთვის ეძებენ. ლაკაევი, რომელიც საქართველოში უკანონოდ შემოიპარა, ბათუმში პოლიციელის დაჭრას აღიარებს.

 

 

 

თამაზ თეთრუაშვილი – მოწმე: იმ დღეს, როცა იუსუფ ლაკიევი, წულუკიძე და ბახუნტარიძე დააკავეს, სამსახურებრივ მოვალეობას „ბათუმი პლაზას“ მიმდებარე ტერიტორიაზე ვასრულებდი. იმ დღეს ქალაქში საქართველოს პრეზიდენტი იყო და მე გამამწესეს პლაზასთან.

 

 

როცა შემთხვევის ადგილზე მივედი [ბათუმის რესპუბლიკურ საავადმყოფოსთან], დავინახე პიროვნება მიწაზე ეგდო და დახმარებას ითხოვდა. მოგვიანებით გავიგე, რომ ის იყო ლაკიევი. მითხრეს, რომ დაჭრილი იყო იაგო დავითაძე, ჩემი თანამშრომელი. მისვლამდე მესმოდა სროლის ხმა, წულუკიძე გარბოდა. დავეწიე, მან ხელი დამარტყა, წამაქცია და აღმოვჩნდი მუხლებზე; მე ფეხებზე ვწვდი და დავიჭირე, დაკავების ოქმი შეავსო გამომძიებელმა რეზო ჯაშმა.

 

 

გიორგი ხიმშიაშვილი – ადვოკატი: რატომ სცადეთ ფირუზ წულუკიძის დაკავება?

 

თამაზ თეთრუაშვილი: ის ცდილობდა ტერიტორიის დატოვებას და ვიცოდი, რომ პოლიციის თანამშრომელი იყო დაჭრილი.

 

გიორგი ხიმშიაშვილი: რომელი ხელი დაგარტყათ?

 

თამაზ თეთრუაშვილი: არ მახსოვს… (პაუზის შემდეგ) – მარცხენა გაშლილი ხელი გამარტყა და მაისურიც გამერღვა.

 

გიორგი ხიმშიაშვილი: სახეში გარტყმის შესახებ შემთხვევის ადგილზე მყოფ გამომძიებელს რატომ არ აცნობეთ?

 

თამაზ თეთრუაშვილი: ვიცოდი, რომ ვიდეოგადაღება უნდა ყოფილიყო, ამიტომაც გავიქეცი სახლში და გამოვიცვალე ტანსაცმელი, გარღვეული მაიკა სახლში დავტოვე… როცა ტერიტორია დავტოვე, უფროსს ვუთხარი.

 

გიორგი ხიმშიაშვილი: თქვენი უფროსის სახელი და გვარი?

 

თამაზ თეთრუაშვილი: ყველა ჩემი უფროსია, არ მახსოვს ვინ იყო.

 

ფირუზ წულუკიძე: მე გავრბოდი და თქვენ მე დამეწიეთ? ნაკაწრები ახსენეთ, მაინტერესებს მე მქონდა თუ არა თავი გატეხილი, წელის არეში ვიყავი თუ არა ჩალურჯებული, როცა თქვენ გადამიყვანეთ პროკურატურის შენობაში?

 

თამაზ თეთრუაშვილი: არა, კარგად არ გარბოდით, ისე… კი მე დაგეწიეთ. ჩალურჯებები გქონდათ შუბლზე, თავზე არ დამინახია, ზურგზეც, წელის არეშიც იყავით ჩალურჯებული, კი.

ფირუზ წულუკიძე ევროპის ჩემპიონია ჭიდაობაში. მას თემურ ბახუნტარიძე წვრთნიდა. იუსუფ ლაკიევი საქართველოში საზღვრის დარღვევით შემოვიდა და თურქეთში გადასვლას გეგმავდა, რაშიც მას, გამოძიების ვერსიით, ქართველი მასპინძლები ეხმარებოდნენ. თემურ ბახუნტარიძე ამტკიცებს, რომ მათ რელიგიური ნიშნით დევნიდნენ და სწორედ ამიტომ დააკავეს.

გასულ კვირას სასამართლო პროცესი კი იმით დაიწყო, რომ ადვოკატმა გიორგი ხიმშიაშვილმა მოსამართლეს სთხოვა ფირუზ წულუკიძისთვის ფოტოების ჩვენების უფლება მიეცა. წულუკიძეს პატიმრობაში ყოფნის დროს შვილი შეეძინა და მას ბავშვის ფოტოები აჩვენეს.

განსასჯელები ბათუმში 2013 წლის 13 სექტემბერს, ღამით დააკავეს. 

ნეტგაზეთის მასალების სხვა გამოცემებში გადაბეჭდვის წესი
ნათია როყვა