მშენებარე კორპუსები დამცავი ბადეების გარეშე და დაჯარიმების სტატისტიკა ბათუმში

ბოლო წლებში არაერთი შემთხვევა დაფიქსირდა საქართველოში, როდესაც მშენებლობიდან ჩამოვარდნილმა მასალამ ადამიანები იმსხვერპლა. მიუხედავად ამისა, ბათუმში მშენებარე მაღლივი კორპუსების დიდ ნაწილზე დღესაც არ არის დამაგრებული დამცავი ბადეები, რომლებიც უზრუნველყოფდა ფეხით მოსიარულეთა უსაფრთხოებას და ასევე, შეამცირებდა სამშენებლო მტვრის გავრცელებას გარემოში.

მშენებლობაზე დამცავი ბადის არქონის შემთხვევაში, პროდუქტის უსაფრთხოებისა და თავისუფალი მიმოქცევის კოდექსით გათვალისწინებულია ჯარიმა – 500 ლარის ოდენობით, დაჯარიმების შემდეგ დარღვევის გამოუსწორებლობის შემთხვევაში კი მშენებარე კომპანია 1500 ლარით ჯარიმდება.

მშენებარე კორპუსი მელიქიშვილის ქუჩაზე

როგორც ბათუმის ზედამხედველობის სამსახურში გვითხრეს, წელს ბათუმში, ამ მიზეზით 19 ობიექტზე დაფიქსირდა სამშენებლო სამართალდარღვევა, მათგან 6-მა კომპანიამ გამოასწორა დარღვევა, 7 – დაჯარიმდა, 6-ზე კი მიმდინარეობს საქმის წარმოება – „ანუ ნაწილს დაკისრებული აქვს საჯარიმო სანქცია, ნაწილზე კი მიცემულია გონივრული ვადა, რათა აღმოფხვრან სამართალდარღვევა. გონივრულ ვადას ადგილზე გასული თანამშრომლები აფასებენ, თუ  რა სიდიდის ობიექტია, თუ რა დრო სჭირდება დარღვევის გამოსწორებას…“ – ამბობს ბათუმის მერიის ზედამხედველობის სამსახურის სამშენებლო საქმიანობაზე სახელმწიფო ხედამხედველობის განყოფილების მთავარი სპეციალისტი თენგიზ ბოლქვაძე.

გასულ წელს ბათუმში ასეთი 58 დარღვევა დაფიქსირდა, მათგან 11 ობიექტზე კი დღემდე გრძელდება საქმის წარმოება.

ამავე თემაზე: 

როცა მშენებარე კორპუსი სახიფათო ხდება (ფოტო)