2-დან 14 მაისამდე ბათუმის ქუჩებში ოცი მხატვარი ღია ცის ქვეშ ახალ ნამუშევრებს შექმნის. „ბათუმური გაზაფხული“ – ასე ეწოდება საერთაშორისო პლენერის – „მეგობრობის პალიტრა – ბათუმი 2017“ – პირველ ეტაპს, რომელშიც ქართველი და უცხოელი მხატვრები მიიღებენ მონაწილეობას.
პლენერის [ფერწერა ღია ცის ქვეშ] პირველი ეტაპი 14 მაისს დასრულდება, 2 ივნისიდან 14 ივნისამდე კი მხატვრები ბათუმურ ზაფხულს დახატავენ – ეს პროექტის მეორე ეტაპია.
პლენერი აჭარაში მეხუთედ ტარდება. წელს მასში 20 მხატვარი მონაწილეობს, მათგან ათი უცხოელია.
ბათუმის გარდა მხატვრებს მიეცემათ საშუალება მოინახულონ აჭარის რეგიონის სხვადასხვა ადგილი, უმეტესად მაღალმთიანი ხულოს მიდამოები და იქაც იმუშაონ.
თითოელი ეტაპის დასრულების შემდეგ იგეგმება ღონისძიების ფარგლებში შექმნილი ნამუშევრების გამოფენა, რომელიც ნიკოლოზ კანდელაკის სახელობის ბათუმი სამხატვრო სკოლაში მოეწყობა.
პროექტი მონაწილეებითვის მასტერკლასებისა და ღონისძიებების მრავალფეროვან პროგრამას ითვალისწინებს. სამხატვრო სკოლის დირექტორის გურამ ფუტკარაძის თქმით, მასტერკლასები უმეტესად ფერწერასა და ხატვაში ჩატარდება, რომლებსაც პროფესიონალი მხატვრები ჩაუტარებენ სამხატვრო სკოლის სტუდენტებს.
პროექტს ახორციელებს „საქართველოს კულტურის ხელშეწყობის და განვითარების ფონდი“ ლიტვურ ორგანიზაციასთან – „ARTCOMAS“-სთან და პოლონელ მხატვართან, ედვარდ გალუსტოვთან თანამშრომლობით.
პლენერის დასრულების შემდეგ პარტნორების ხელშეწყობით დაიგეგმება ადგილობრივი მხატვრების ვიზიტი ლიტვასა და პოლონეთში.
პროექტი ხორციელდება აჭარის განათლების სამინისტროს პროგრამის – „კულტურის პოპულარიზაცია და შემოქმედებითი ინდუსტრიების ხელშეწყობა“ – ფარგლებში და მიზნად ისახავს ქართველი მხატვრებისათვის პროფესიული კონტაქტების დამყარებაში ხელშეწყობას უცხოელ მხატვრებთან.
