Batumelebi | ბათუმში ტურებს მოკლავენ ბათუმში ტურებს მოკლავენ – Batumelebi
RU | GE  

ბათუმში ტურებს მოკლავენ

 

ბათუმში ტურებს მონადირეები მოკლავენ. გადაწყვეტილება ბათუმის მერიის ადმინისტრაციამ მიიღო. 

 

„გარეული ცხოველების თავდასხმისას მოქალაქეს აქვს ცხოველის ლიკვიდაციის უფლება, თუმცა თვითმმართველობამ მოსახლეობის უსაფრთხოების მიზნით გადაწყვიტა ღონისძიებაში სპეციალისტების ჩართვა,“ – აღნიშნა მერიის ადმინისტრაციის წარმომადგენელმა გიორგი ტუღუშმა დღეს მერიის ადმინისტრაციაში გამართულ სპეციალურ  ბრიფინგზე.

 

ტურების ლიკვიდაცია მას შემდეგ გადაწყდა რაც რამდენიმე კვირის წინ ქალაქის შემოერთებულ ტერიტორიაზე, კახაბრისა და მწვანე კონცხის დასახლებაში ადამიანის დაკბენის ორი შემთხვევა დაფიქსირდა.  უბნის რწმუნებულებმა დახმარების თხოვნით მერიას წერილობით მიმართა.

 

როგორც მერიის საინფორმაციო სამსახური იუწყება მერიის კომპეტენციაში აღნიშნული პრობლემის მოგვარება – ცხოველების ლიკვიდაცია არ შედის. ამიტომ ბათუმის მერიამ პრობლემის მოსაგვარებლად საქართველოს გარემოსა და ბუნებრივი რესურსების დაცვის სამინისტროს მიმართა.  სამინისტროსა და ბათუმის მერიას შორის 25 მარტს გაფორმდა ხელშეკრულება, რომელიც ქალაქის ტერიტორიაზე გარეული ცხოველების (ტურის) გარკვეული რაოდენობის ამოღებას ითვალისწინებს. მერიის თხოვნით სპეციალისტები (მონადირეები) ტურების გარემოდან ამოღებას 2014 წლის 31 ივლისამდე, უსასყიდლოდ შეასრულებენ.

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი