მოსამართლე თამარ ბეჟანიშვილი ხვალ 10:30 საათზე გამოაცხადებს განაჩენს.
განსასჯელები ხულიგნობის ბრალდებას აღიარებენ, განზრახ მკვლელობაში კი თავს უდანაშუალოდ მიიჩნევენ.
„მე ვერ დავიბრალებ იმას, რაც არ ჩამიდენია“, – უთხრა მოსამართლეს განსასჯელმა.
შემთხვევა ქობულეთში გასული წლის ზაფხულში მოხდა. ბრალდების მტკიცებით, დაკავებულმა გ.გ-მ განზრახ წინასწარი დაგეგმით ორი ადამიანი ცივი იარაღით, (დანით) დაჭრა.
შელაპარაკება ქობულეთში, ერთ-ერთ რესტორანში მუსიკის ჩართვის მოთხოვნით დაიწყო.
დაცვის მხარე ამბობს, რომ საქმეში არ არსებობს ცივი იარაღი, ან მასზე ჩატარებული ექსპერტიზის დასკვნა, რომლითაც დაზარალებულები დაჭრეს და ასევე, მათი ჩვენებით (მოწმეების) ირკვევა, რომ ზუსტად არ იციან ვინ დაჭრა ისინი.
საბოლოოდ პროკურორმა რამაზ შავაძემ მოსამართლეს გამამტყუნებელი განაჩენის გამოტანა სთხოვა.
თენგიზ კახიძის, ერთ-ერთი განსასჯელის ადვოკატის დასკვნითი სიტყვა კი, რომლითაც მოსამართლეს მიმართა ასეთი იყო: „ჩემი ათწლიანი საადვოკატო მოღვაწეობის პერიოდში ჩემდა საბედნიეროდ მრავალჯერ მქონია პატივი, რომ მიმეღო მონაწილეობა თქვენი თავმჯდომარეობით გამართულ სასამართლო სხდომებზე, რომლის პერიოდშიც შემიძლია გულწრფელად ვაღიარო, რომ მიმიღია როგორც იურისტს შინაგანი სიამოვნება, ვინაიდან თქვენ მაშინაც კი, როცა თითქმის შეუძლებელი იყო სასამართლოს მიერ შედარებით ჰუმანური გადაწყვეტილებების მიღება, მაშინაც კი ბედავდით და ახერხებდით დაგეცვათ ბრალდებულის კონსტიტუციით მინიჭებული კანონიერი ინტერესი, რის საფუძველზეც იღებდით შედარებით სამართლიან ობიექტურ და ჰუმანურ ვერდიქტს.
და დღეს, როცა უფლის ნებით ჩვენს ქვეყანაში დამკვიდრდა სამართლიანი სასამართლოს რეალობა, დღეს როცა მართლაც სასამართლო ხელისუფლებას მიეცა სრული თავისუფლება განაჩენის მიღების შემთხვევაში, მე როგორც რიგით მოქალაქეს და თქვენს კოლეგას ღრმად მჯერავს, რომ თქვენი ღირსების მიერ არ იქნება ნაღალატევი ის თქვენთვის.
ჩვეული სამართლიანობის ტრადიცია და ამ შემთხვევაშიც თქვენი მესვეურობით იზეიმებს სამართალი. ამ სიტყვებს ვაცხადებ ყოველგვარი მლიქვნელობისა და პირფერობის გარეშე. ბრალდებულის ოჯახისა და ნათესავების, აქ დამსწრე საზოგადოების სახელით თავს ვაძლევს უფლებას წინასწარ გადაგიხადოთ მადლობა სამართლიანი, ობიექტური, მიუკერძოებელი განაჩენის მიღებისთვის.
ამ სიტყვებს გეფიცებით ჩემს ოჯახს, ვაცხადებ გულწრფელად. უფალი იყოს თქვენი და ჩვენი სამშობლოს მფარველი“.
