Batumelebi | „ბათომის“ საჯარო ლექცია და დისკუსია კონსერვაციაზე „ბათომის“ საჯარო ლექცია და დისკუსია კონსერვაციაზე – Batumelebi
RU | GE  

„ბათომის“ საჯარო ლექცია და დისკუსია კონსერვაციაზე

31 მარტს, 12 საათზე, ბათუმის ხელოვნების სასწავლო უნივერსიტეტის საკონფერენციო დარბაზში საზოგადოება „ბათომი“, ბათუმის ხელოვნების სასწავლო უნივერსიტეტთან  თანამშრომლობით, ატარებს საჯარო ლექციასა და დისკუსიას თემაზე: კედლის მხატვრობისა და ფასადის დეკორატიული ელემენტების საკონსერვაციო პროექტის მომზადება და პრაქტიკა.

ლექციაზე  განხილული იქნება კედლის მხატვრობისა და ისტორიული შენობის დეკორატიული ელემენტების კონსერვაცია–რესტავრაციის საკითხები – პროექტირება, მართვა და რესტავრაცია. ასევე, განხილული იქნება დაფინანსების შესაძლო ვარიანტები, წინასაკონსერვაციო კვლევის მნიშვნელობა, დესტრუქციული და არადესტრუქციული, თანამედროვე და ტრადიციული მეთოდები კონკრეტული მაგალითების გამოყენებით.

ლექციას გაუძღვება  ლელა ნინოშვილი, თბილისის სახელმწიფო სამხატვრო აკადემიის მაგისტრი ქვის რესტავრაციისა და კედლის მხატვრობის მიმართულებით. ლელა სწავლობდა რომის ლა საპიენცას უნივერსიტეტში არქიტექტურის რესტავრაციას და შვეიცარიის ლუგანოს უნივერსიტეტში (SUPSI) ქვისა და კედლის მხატვრობის კონსერვაციას, გავლილი აქვს ICCROM-ის მე–19 საერთაშორისო საწვრთნელი კურსი ქვის კონსერვაციის მიმართულებით.

2006–2010 წლებში ლელა მუშაობდა შუასაუკუნეების კედლის მხატვრობის რესტავრაციის მიმართულებით. 2012 წლიდან მუშაობს ძეგლებისა და ღირსშესანიშნავი ადგილების საერთაშორისო საბჭოს საქართველოს ეროვნულ კომიტეტში (ICOMOS- საქართველო) კედლის მხატვრობის, ქვის რესტავრაციისა და სამშენებლო მასალების სპეციალისტის მიმართულებით.

ლექცია ორ საათს გაგრძელდება. ფორმატი თავისუფალია, შესაძლებელი იქნება კითხვების დასმა და დისკუსიაში მონაწილეობის მიღება.

ფოტოზე: კედლის მხატვრობის გადარჩენის სამუშაოები ვარძიაში

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com