ბათუმში, ოძელაშვილის ქუჩის 11 ნომერში მდებარე მრავალსართულიან საცხოვრებელ კორპუსს დღეს, 27 მარტს, დილით ცეცხლი გაუჩნდა. ცეცხლი კორპუსის სახურავზე გაჩნდა. ბათუმის სახანძრო სამსახურის ინფორმაციით, ხანძარი ამ დროისთვის ლოკალიზებულია და დაშავებულები არ არიან.
„სახლის სახურავის თითქმის 80% დაიწვა. სახლზე, მეექვსე სართული, მანსარდა უნდა დაედგათ და ატანილი იყო სამშენებლო მასალები, რომელიც ხანძარმა გაანადგურა“ – გვითხრეს სახანძრო სამსახურში. მათივე ინფორმაციით, ხანძრის ჩასაქრობად ბათუმის სახანძროს 13 ბრიგადა მუშაობდა.
ხანძრის გამომწვევი მიზეზი ჯერჯერობით უცნობია და მას გამოძიება დაადგენს.
შსს-ს ინფორმაციით, საქმე აღძრულია სს კოდექსის 187-ე მუხლის მეორე ნაწილით.