“სასტუმრო „პრინცესას“, იგივე ძველი ფოსტის შენობას ბათუმში, რომელიც მემედ აბაშიძის #33-ში მდებარეობს, ბარათაშვილის ქუჩიდან ეტლით მოსარგებლეებისთვის პანდუსი ისე აქვს დამონტაჟებული, რომ ტროტუარი თითქმის სრულად არის ათვისებული, რის გამოც გამვლელები იქვე გაჩერებულ მანქანებს გარსუვლიან და მანქანების სავალ ნაწილზე გადასვლა უწევთ.
ბათუმის მერიის ზედამხედველობის სამსახურში გვითხრეს, რომ სტანდარტის მიხედვით ტროტუარზე ფეხით მოსიარულეებისთვის სავალი ნაწილი მინიმუმ 80 სანტიმეტრი და მაქსიმუმ 150 სანტიმეტრი უნდა იყოს, თუმცა იმის დასადგენად, დარღვეულია თუ არა კანონი ამ კონკრეტული შენობის შემთხვევაში, კულტურული მემკვიდრეობის დაცვის სააგენტოში გადაგვამისამართეს, რადგან შენობას ძეგლის სტატუსი აქვს.
აჭარის კულტურული მემკვიდრეობის დაცვის სააგენტოს დირექტორის ახლადდანიშნული მოვალეობის შემსრულებელი ლაშა ასლანიშვილი ამბობს, რომ თუ ეს პროექტით არ იყო გათვალისწინებული, ადგილზე მონიტორინგის ჯგუფი გავა.
