მუნიციპალური ტრანსპორტის მძღოლებს, სატრანსპორტო ადმინისტრაციასა და ბათუმის საკრებულოს თავმჯდომარეს შორის გამართული დისკუსია შეთანხმებით დასრულდა. ხვალიდან ბათუმში ავტობუსები ჩვეულებრივი განრიგით იმუშავებენ.
მიღწეული შეთანხმების შედეგად მძღოლების საათობრივი ანაზღაურება პირველ ეტაპზე 4 ლარით განისაზღვრება, შემდგომში გაზრდის პერსპექტივით.
“გაფორმდება წერილობითი შეთანხმება. საკრებულოს თავმჯდომარე, სატრანსპორტო ადმინისტრაციის ხელმძღვანელი და მე მოვაწერთ ხელს სამმხრივ შეთანხმებას, სადაც გაწერილი იქნება პირობები, რითაც დარეგულირდება ჩვენი შემდგომი ურთიერთობა. კერძოდ, მიეცემა ერთი თვის ვადა ადმინისტრაციას, რათა მოამზადოს ოპტიმიზაციის პროექტი. ვალდებულებას იღებს დირექცია, რომ ამ ოპტიმიზაციით გამონახავს გარკვეულ თანხას. პროექტი გადაეცემა საკრებულოს, საკრებულო იღებს ვალდებულეას ამავე შეთანხმებით, რომ განიხილავს უახლოეს სხდომაზე და ამ გამონახულ თანხას მიმართავს ხელფასისკენ. ჩვენ ვიღებთ ვალდებულებას, რომ შევწყვეტთ გაფიცვებს,” – განაცხადა დისკუსიის დასრულების შემდგომ პროფესიული კავშირების აჭარის რესპუბლიკური გაერთიანების თავმჯდომარემ ილია ვერძაძემ.
