Batumelebi | როგორ დაიცავს ვახო წულაძე გარემოს აჭარაში როგორ დაიცავს ვახო წულაძე გარემოს აჭარაში – Batumelebi
RU | GE  

როგორ დაიცავს ვახო წულაძე გარემოს აჭარაში

ცაგო კახაბერიძე

 

 

მუშაობის დაწყებიდან ოცდაამეერთე დღეს აჭარის გარემოს დაცვის სამმართველოს ახალმა ხელმძღვანელმა თანამშრომლების კარგად გაცნობა,  ბიუჯეტის მზა პროექტის კორექტირება, რამდენიმე საქმიანი შეხვედრა, ორი მოადგილის შეცვლა, კიდევ ერთი ახალი თანამშრომლის აყვანა და საკუთარი კაბინეტიდან პრეზიდენტის ფოტოს გატანა მოასწრო. 

 

ვახო წულაძემ სამსახურში მისვლის დღიდანვე თანამშრომლებს „ძილის რეჟიმიდან აქტიურ ორგანოდ გადაქცევისთვის“ ექვსი თვის განმავლობაში 24-საათიანი მუშაობა მოსთხოვა. მკაცრად აქვს გაწერილი ჟურნალისტებთან ურთიერთობის გრაფიკიც. რატომ ჩქარობს, როგორი იქნება აჭარის გარემოს დაცვითი პოლიტიკა მისი დანიშვნის შემდეგ, რის შეცვლას გეგმავს 33 წლის ბიოეკოლოგი სამმართველოში და ვინ ჩაანაცვლებს პრეზიდენტის პორტრეტს სამმართველოს პირველი კაცის კაბინეტში? – ამ კითხვებზე პასუხის გასაცემად დრო მან ათდღიანი ლოდინის შემდეგ გამონახა.

 

იმის გათვალისწინებით, რა ინფორმაციის მიღებაც თანამშრომლებისგან უკვე მოასწარით, რა არის პირველ რიგში გასაკეთებელი აჭარაში იმისთვის, რომ გარემო იყოს დაცული? 

– გამომდინარე იქედან, რომ პრიორიტეტებს ის პრობლემატიკა განსაზღვრავს, რომელიც ჩვენს რეგიონშია, ამ ეტაპზე ვერაფერს გამოვყოფ. 2013 წლის ბიუჯეტის პროექტში ძირითადად ნაპირგამაგრებითი სამუშაოების დაფინანსება გვაქვს მოთხოვნილი, რაც სამწუხაროდ ბოლო წლების განმავლობაში საჭირო მოცულობით არ ხორციელდებოდა. არა მგონია, რომ ეს ვიღაცის მიზანმიმართული ქმედება ყოფილიყო, ალბათ უფრო ბიუჯეტში არ იყო საკმარისი თანხა. შეიძლება მოტივირებულად ვერც ხსნიდნენ საჭიროებას, მაგრამ დამოკიდებულება ამ საკითხის მიმართ, როგორც შევამჩნიე, ადეკვატური არ იყო, თუნდაც 2013 წლის იმ ბიუჯეტის პროექტში, რომელიც დამხვდა. გასულ წლებში რეალურად საჭირო მოცულობის 20-30 პროცენტი იყო შეტანილი. როცა კომისიის წევრებს ამის შესახებ ვკითხე, მათი მხრიდან იყო დამოკიდებულება _ რასაც გვაძლევდნენ იმის მიხედვით ვმოქმედებდითო. წელს იქნება ცოტა სხვაგვარად. ამ კუთხით ბიუჯეტში გაზრდილ დაფინანსებას ვითხოვ, შარშან თუ სადღაც ასი ათას ლარამდე იყო, წელს 350 ათას ვითხოვთ. 

 

 

დაფინანსების გარდა რა არის საჭირო იმისათვის, რომ გარემოს დაცვის სამმართველოს მუშაობა გახდეს უფრო ქმედითი, ვიდრე დღემდე იყო?

– კანონმდებლობა უნდა შეიცვალოს. ჩემთვის ცნობილია, რომ საქართველოს ცენტრალური ხელისუფლება მუშაობს ამ საკითხზე და ცდილობს ცვლილებები შეიტანოს გარემოს დაცვით კანონმდებლობაში. კანონმდებლობა საშინელ დღეშია ტყის მართვის მიმართულებითაც.  მაგალითად, შუახევში ხალხი იძახის ტყის ჭრა უკანონოდ ხდებაო. ტყის რესურსების გამოყოფას ანუ სოციალურ ჭრას მუნიციპალიტეტების დაკვეთით ვაწარმოებთ ჩვენ. ანუ, როცა მოსახლეობას აქვს სურვილი და საჭიროება იმისა, რომ სახლში რაღაც სამუშაოები ჩაატაროს, მოქალაქე  უკავშირდება მუნიციპალიტეტს, მუნიციპალიტეტი გვწერს ჩვენ წერილს და შემდეგ ვცდილობთ, რომ მოთხოვნა დავაკმაყოფილოთ. მოგეხსენებათ, მაღალმთიანეთში ძირითადად ხის სახლებია და იატაკის გამოცვლიდან დაწყებული დამხმარე ნაგებობების მშენებლობამდე ყველაფერი ხის მასალით კეთდება. სამწუხაროდ არის ფაქტები, როცა ეს სამასალე ხე ჩამოდის ქალაქში და იყიდება ჩუმად,  რაც საკმაოდ დიდ პრობლემას წარმოადგენს. სამწუხაროდ ასეთი ეჭვის არსებობისას ყოველთვის  გარემოს დაცვის სამმართველოსკენ იშვერენ ხელს.

კონკრეტული პრიორიტეტის გამოყოფა კი ამ ეტაპზე გამიჭირდება. შემიძლია მხოლოდ ის გითხრათ, რომ მშვენიერი კოლექტივი დამხვდა, მათ ძალიან კარგად იციან თავიანთი საქმე და გარკვეული ხედვები აქვთ. მომავალი წლის სამუშაო გეგმებზე  დავიწყეთ მუშაობა.

 

 

თუმცა დანიშვნის დღიდანვე უარყოფითად შეაფასეთ  მათი მუშაობა. თქვით, რომ სამმართველო ძილის რეჟიმში მუშაობდა…

-არა, მე მათი მუშაობა ცუდად არ შემიფასებია, ზოგადად, გარემოს მიმართ ინდიფერენტული დამოკიდებულება ვიგულისხმე. პირდაპირ გეუბნებით, რომ ეს იყო ჯოხი, რომელიც ბევრ ბორბალში გაეკვეხა, ბევრი ფიქრის შემდეგ კი აიღეს და ეს ჯოხი მაქსიმალურად დაამოკლეს. თუ თქვენ გადახედავთ წინა წლებში სამმართველოს თანამშრომლების მიერ მომზადებულ მოთხოვნებს და ანგარიშებს, მიხვდებით, რომ აქ პროფესიონალები მუშაობენ.  

 

 

თქვენი წინამორბედი მთავრობისგან უფლებების გაზრდას ითხოვდა, თქვენც იგივე მოთხოვნები გაქვთ?

– არა, მე მეტ უფლებებს არ ვითხოვ. კანონმდებლობის ოპტიმიზაციაა საჭირო, რომ რეალურად  გადანაწილდეს უფლება-მოვალეობები რეგიონსა და ცენტრს შორის, რისკენაც ჩვენ მივდივართ.

თქვენი წინამორბედი მიიჩნევდა, რომ ანგარიშვალდებული იყო მხოლოდ რეგიონის მთავრობის თავმჯდომარესთან და გარემოს დაცვის მინისტრი კონკრეტული დავალების მისაცემად მას ვერ დაურეკავდა.  თქვენ როგორ იმუშავებთ?

 

 

– მე ვიმეგობრებ გარემოს დაცვის მინისტრთან. ყოველდღე ვგეგმავ ქალბატონ ხათუნასთან დარეკვას. ჩვენ არ ვიცნობთ ერთმანეთს. იქედან გამომდინარე, რომ მე ჯერ კიდევ არა ვარ გარკვეული ბევრ ნიუანსში და არ ვიცი რა კითხვებს დამისვამს, მჭირდება მომზადება.  არ მიყვარს დამოკიდებულება, მოდი, დღეს რაღაცას გავაკეთებ და „რაც იქნება – იქნება” – მე ასე ვერ მოვიქცევი.  მზად უნდა ვიყო. არ მიყვარს, როდესაც მისვამენ კითხვას და ამ კითხვაზე პასუხი არ მაქვს. რამდენიმე დღეში ალბათ დავურეკავ ქალბატონ ხათუნას და ვთხოვ, ერთობლივი შეხვედრა გავმართოთ. შემდეგ კვირაში კი ალბათ ჩავალ თბილისში, თანამშრომლებთან ერთად. სურვილი მაქვს, გავიაროთ ჩვენი ერთობლივად მუშაობის პერსპექტივები.

 

 

როგორც ვიცი, სიახლეები გაქვთ  საკადრო პოლიტიკის თვალსაზრისითაც…

– მე არავინ გამითავისუფლებია, ერთი თანაშემწე წავიდა ჩემი მოსვლის დღიდან. მთავრობის თავმჯდომარემ კიდევ ორი მოადგილის წასვლის განცხადება დააკმაყოფილა.

 

თქვენს კაბინეტში პრეზიდენტის ფოტოს ბიძინა ივანიშვილის ფოტო ხომ არ ჩაანაცვლებს?

– არა, ვაჟა-ფშაველას პორტრეტს ველოდებით.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე