უმაღლეს საბჭოში პრემიები შეხვდათ ჯამბულ კურცხალიძეს, ვლადიმერ ხუბულავას, ალეკო ბაუჟაძეს, მარინა ბერიძეს, შალვა ჯინჭარაძეს, პლატონ მანჯგალაძესა და რამაზ ბოლქვაძეს. თითოეული მათგანი ერთ თვეზე მეტია, რაც უმაღლეს საბჭოში დასაქმდა. უმაღლესი საბჭოდან მოწოდებული დოკუმენტების თანახმად, ზოგიერთი მათგანი მოვალეობას ასრულებს, ზოგიერთი უკვე დაინიშნა თანამდებობაზე.
მაგალითად, აჭარის უმაღლესი საბჭოს აპარატის უფროსის მოადგილის მოვალეობის შესასრულებლად ჯამბულ კურცხალიძე 12 ნოემბერს გაამწესეს. მან სამი კვირის მუშაობის თავზე 1121 ლარი მიიღო ხელფასის სახით, რასაც დაემატა პრემიაც – 560 ლარი. ცოტა უფრო მეტი, 1770 ლარი მიიღო იმავე თანამდებობაზე მყოფმა, ოღონდ შვებულებაში გასულმა სუზანა ვაშაყმაძემ. ნოემბრის თვეში უმაღლესმა საბჭომ ამ პრინციპით – ერთ თანამდებობაზე ორი მოხელე – ხელფასები ზუსტად 7 თანამდებობის პირს მისცა.
რამდენად კანონიერი და მართლზომიერია ბიუჯეტის ფულის ამ სახით დახარჯვა? – უმაღლეს საბჭოში მიაჩნიათ, რომ აპარატის გამართულად მუშაობისთვის ამის გაკეთება აუცილებელია.
აპარატის უფროსი რამაზ ბოლქვაძე „ძველსა“ და „ახლებს“ შორის არსებულ „საპრემიო სხვაობას“ კი შემდეგი გარემოებით ხსნის: „თუ ნახავთ ოქტომბრის თვის პრემიებს, აღმოაჩენთ, რომ ყველა თანამშრომელს 100 პროცენტით აქვს პრემია მიღებული. სწორედ ამიტომ ვერ მიიღეს მათ ამ თვეში პრემია – დადგენილი წესით, ყოველთვიური პრემია ხელფასის ოდენობის 50 პროცენტია და არა – 100“.
რამაზ ბოლქვაძის თქმით, პრემიებთან დაკავშირებით ახალი ხელმძღვანელობის პოზიცია თანამშრომლებისთვის ცნობილია. ამას საფინანსო-სამეურნეო უზრუნველყოფის განყოფილების უფროსი ილია თურმანიძე ადასტურებს. განათლების, მეცნიერების, კულტურისა და სპორტის საკითხთა კომისიის აპარატის უფროსი ნაირა აბულაძე კი ამბობს, რომ პრემიების გაცემის ახალი წესის შესახებ არაფერი სმენია. ნაირა აბულაძემ, ზოგადად, არც ის იცის, ვინ აიღო პრემია და ვინ არა: „ეს უფროსების გადასაწყვეტია“.
პრემიების მიმღებთა სიაში არის საზოგადოებასთან ურთიერთობის დეპარტამენტის ახალი უფროსი მარინა ბერიძე. მას 20 დღეში აქვს მიღებული 1416 ლარი ხელფასის სახით და 708 ლარი პრემია. მარინა ბერიძე დეპუტატ მურმან დუმბაძის ძმის ცოლია. ის ამბობს, რომ უმაღლეს საბჭოში შვიდი წელი მუშაობდა, შემდეგ კი „მიხეილ მახარაძემ გააგდო“.
მარინა ბერიძეს აღიზიანებს კითხვა – დანიშნეს თუ არა უმაღლეს საბჭოში იმის გამო, რომ მურმან დუმბაძის რძალია? ის ფიქრობს, რომ პირიქით – 2009 წელს მურმან დუმბაძის რძლობის გამო გაუშვეს სამსახურიდან. „მე ჩემს ადგილზე დავბრუნდი ახლა“, – ამბობს მარინა ბერიძე, რომელიც 2009 წლამდე საქმის წარმოების განყოფილებაში წამყვან სპეციალისტად მუშაობდა.
„ჩემს ადგილზე“ სააკაშვილის ხელისუფლების პირობებში ვლადიმერ მამულაძე მუშაობდა. მარინა ბერიძის დანიშვნის შემდეგ, სხვებისგან განსხვავებით, ამ მოხელემ სამსახური შეინარჩუნა, ოღონდ წამყვან სპეციალისტად ჩამოაქვეითეს.
ვლადიმერ მამულაძისგან განსხვავებით სამსახური ვერ შეინარჩუნა აბესალომ ასლანიძემ – უმაღლესი საბჭოს კაბინეტის ყოფილმა უფროსმა: „ჯერჯერობით შვებულებაში ვარ. ჩემი მოლოდინი ის არის, რომ განცხადება დაწერილი მაქვს გათავისუფლებაზე. როცა ოჯახს ჩემი ხელფასის გარდა სხვა შემოსავალი არ ჰქონდა, წასვლის სურვილი არ შეიძლება მქონოდა, მაგრამ მგონი ნორმალურია ჩემი წასვლა – ახალი თავმჯდომარე მოვიდა და თავისი კაბინეტის უფროსი სჭირდება“.
აბესალომ ასლანიძე ვლადიმერ ხუბულავამ შეცვალა. ეს უკანასკნელი ამბობს, რომ მხოლოდ მოვალეობის შემსრულებლად დაინიშნა. ვლადიმერ ხუბულავა ვარაუდობს, რომ მის მიერ დაკავებულ თანამდებობაზე კონკურსი მაქსიმუმ 4 თვეში გამოცხადდება.
აჭარის უმაღლეს საბჭოს 9-წლიანი არსებობის პერიოდში თანამშრომლების შესარჩევად კონკურსი არც ერთხელ არ გამოუცხადებია. აქამდე მოხელეები დეპუტატების სურვილების მიხედვით ინიშნებიან.
