კომისიებსა და ფრაქციებში მთავრობის შემადგენლობის განხილვის პროცედურები დაიწყო

აჭარის მთავრობის შემადგენლობის დამტკიცებასთან დაკავშირებით საკანონმდებლო ორგანოს კომისიებსა და ფრაქციებში განხილვის პროცედურები დღეს არის ჩანიშნული. განხილვის პროცედურებს მინისტრობის ოთხივე კანდიდატი დაესწრება. აჭარის უმაღლესი საბჭოს კომისიებს, ფრაქციებსა და ბიუროს საკანონმდებლო ორგანოს რეგლამენტის 111-ე მუხლის თანახმად, ამ საკითხზე მსჯელობისთვის ჯამში 7-დღიანი ვადა აქვთ.

აჭარის მთავრობის თავმჯდომარემ, ზურაბ პატარაძემ, აჭარის უმაღლეს საბჭოს მთავრობის შემადგენლობა შესაბამისი კანონმდებლობით გათვალისწინებულ ვადებში წარუდგინა, მან ფინანსთა და ეკონომიკის მინისტრის თანამდებობაზე რამაზ ბოლქვაძე, სოფლის მეურნეობის მინისტრად ლაშა კომახიძე, ჯანმრთელობისა და სოციალური დაცვის მინისტრად ზაალ მიქელაძე, ხოლო განათლების, კულტურისა და სპორტის მინისტრად ინგა შამილიშვილის კანდიდატურები შეარჩია.

მინისტრობის კანდიდატებიდან ორი ახალია. ზაალ მიქელაძე აქამდე ამავე სამინისტროს საყოველთაო დაზღვევის პროგრამის რეგიონალური კოორდინატორი იყო, ხოლო ინგა შამილიშვილი ბათუმის შოთა რუსთაველის სახელმწიფო უნივერსიტეტის პრორექტორად მუშაობდა.

მთავრობის შემადგენლობის დამტკიცებას, ამავე კანონმდებლობით, უმაღლესი საბჭოს სხდომაზე დამსწრეთა უმრავლესობის, მაგრამ უმაღლესი საბჭოს სრული შემადგენლობის არანაკლებ ერთი მესამედის მხარდაჭერა სჭირდება. მთავრობის შემადგენლობას რიგგარეშე სხდომაზე უყრიან კენჭს.