ბათუმსა და მთლიანად აჭარაში ბუნებრივი აირის მიწოდება დღეს, 16 დეკემბერს, დღის მეორე ნახევარში სრულად უნდა აღდგეს. ამის შესახებ „ბათუმელებს“ კომპანია „სოკარ ჯორჯია გაზში“ უთხრეს. კომპანიის ინფორმაციით, გაზის მიწოდების შეწყვეტის მიზეზი „წნევის დაწევა გახდა და მიმდინარეობს შესაბამისი სამუშაოები“.
აჭარაში, მათ შორის ქალაქ ბათუმში, აბონენტებს ბუნებრივი აირის მიწოდება წუხელ შეუწყდათ.
გაზის შეწყვეტის გამო დღეს ბათუმის საჯარო სკოლებში სასწავლო პროცესიც შეწყდა.
რაც შეეხება საბავშვო ბაღებს, ბაღების გაერთიანების ხელმძღვანელის, ნატალია ზაქარეიშვილის ინფორმაციით, ბათუმის ყველა ბაღი გათბობისთვის იყენებს ელექტროღუმელს და სააღმზრდელო პროცესი ყველგან მიმდინარეობს: „უბრალოდ, არის ბაღები, სადაც მშობლებმა არ მიიყვანეს ბავშვები და შესაძლოა, ასეთი ბაღები დაიკეტოს. რამდენიმე ბაღს კი უკვე გაზიც მიეწოდება“.
ბათუმში გუშინ, 15 დეკემბერს, დღისით თოვდა, საღამოს კი თოვა შეწყდა და ტემპერატურა დაეცა. ქალაქში მოყინულია გზები.
ამავე თემაზე:
