დღეს, 9 დეკემბერს, შუახევის მუნიციპალიტეტშიც გამოიდარა, თუმცა გუშინ მოსული დიდი თოვლის გამო შუახევის მაღალმთიან სოფლებში, მათ შორის: „წელათში, მაწყვალთასა და ნაღვარევში მოძრაობა შესაძლებელია მხოლოდ მაღალი გამავლობის ავტომობილებით. სასწავლო პროცესი კვლავ შეჩერებულია სოფელ წაბლანასა და სოფელ ნაღვარევის სკოლებში.
„ჩვენ თემის რწმუნებულებთან გვაქვს სატელეფონო კონტაქტი, თუ ვინმე იქნება ისეთი, რომელიც ექვემდებარება აუცილებელ გადაყვანას ან სამედიცინო დაწესებულებაში ან კიდევ სხვაგან, ამასთან დაკავშირებით სამაშველო სამსახურები, მუნიციპალიტეტში არსებულ კომისიის შტაბთან ერთად მაქსიმუმს გავაკეთებთ, რომ არავინ დაზარალდეს და ყველა ადამიანი იქნას შესაბამის დაწესებულებაში გადაყვანილი,“ – ამბობს ტარიელ ებრალიძე, შუახევის მუნიციპალიტეტის გამგებელი.
მისივე ინფორმაციით, ამ დროისთვის ელექტროენერგია შუახევში მცხოვრებ ყველა აბონენტს მიეწოდება.
შუახევის მუნიციპალიტეტის გამგებლის ინფორმაციით, გომარდულის მიმართულებით ამ დროისთვის ოთხი ერთეული ტექნიკა მუშაობს, რათა 8-კილომეტრიანი მონაკვეთი გაიწმინდოს – ” რადგან მოთხოვნა დიდია გომარდულის გახსნაზე, აღნიშნული მონაკვეთი დაახლოებით ნახევარ საათში გაიწმინდება,” – თქვა ტარიელ ებრალიძემ.
